أرجوا المساعدة بأسرع وقت إذا تكرمتم
أول حاجة هبدأ بيها الحمد لله فى السراء والضراء
بعد مشكلتى مع نقصان الميه واللى لسه حتى معرفتش اتحلت ولا لسه لانها متبانش فى يوم
يشاء السميع العليم ان علبة الفيوزات تولع لوحدها كدا من غير مقدمات وهحكيلكم على القصة بالتفصيل لعل وعسى يطلع موضوع صغير ونلحق حاجة والحمد لله على كل شئ
اللى حصل انى بعد صلاة الجمعة مباشرة توكلت على الله وكنت رايح مشوار لآخر شارع الهرم، يادوب مشيت دقيقتين وقولت اقف وبطلت العربية وقولت انزل اجيب علبة السجاير ولأول مرة أحس ان السجاير مفيدة فى حاجة :11:
نزلت وجيت اركب العربية تانى ببص لاقيت دخان طالع من علبة الفيوزات اتصمرت مكانى ومعرفتش اعمل ايه فكيت الأغطية الفبر وقولت الدخنة هديت حظى كان كويس ان الكهربائى كان على بعد خطوات قمت جارى عليه وعقبال مجيت المدام قالتلى وهى كانت فى العربية ان الدخنة زادت وطلعت نار والحمد لله طفيتها.
زقينا العربية لحد الورشة وكان الاتى ان علبة الفيوزات مكان فيوزين فيها مش نافعين ومش عارف هيحل الموضوع دا ازاى بس قالى انك عندك ماس مستمر فى مكان ما ولسه هنفك بكرة التابلوه ونشوف اللعبكة دى جاية منين لان فى لعبكة فى السلوك عندك ومبدأيا كدا الفيوز اللى انضرب كان فيوز طرمبة البنزين ومكانتش العربية بتدور بعد معمل كوبرى كدا ووصلات دارت بس الماس مستمر وبكرة هيبدأ يشتغل فيها ويشوف الشورت دا جاى منين بالظبط.
معلومات ممكن تفيد حصلت معايا ليلة الموضوع دا
اولا انا فكيت سيلك البوجيهات علشان كنت ببص على البوجيهات وبطمن عليها فممكن وانا بشد واحد منهم يكون لمس او قطع او اى كان وهو دا السبب ؟
ثانيا هل فيه علاقة بين اللى حصل دا وغسيل دورة التبريد لما غيرت الريدياتير امبارح
ثالثا ممكن تكون فيشة علبة البيئة بعد فكها هى اللى عملت كدا.
ياريت نحاول نلاقى حل واعرف هل الكهربائى صح فى انه هيفك التابلوه ولا بيفتح شغل ولا ايه الموضوع
مستنى رأيكم وياريت تلحقونى بجد لأنى من ساعة محصل الموضوع دا وانا نفسيا تعبان جدا ومتضايق من اللى حصل دا وربنا كريم ويسترها