الموضوع: رحلة الى اوروبا .. بعض الاسئلة ؟؟

لو تبع شركة سياحة هما هيظبطوا كل حاجة ...

لو السبب الرئيسى سياحة لمدة بسيطة إسبوع مثلا هتدخل بسهولة ..

المشاركة الأصلية كتبت بواسطة zalpany2000

السلام عليكم ورحمة الله

احييك علي الفكرة .. بس احب اقولك انها غير عملية ... لانها هاتبقي مكلفة جدا لو هاتعملها بنفسك الا اذا كان عندك خبرة كويسة ومعرفة ودراية بكل دولة حضرتك هاتزورها

لكن بما ان الناس اتكلمت عن الفيز وامكانية الحصول عليها لدول الاتحاد الاوروبي انا هاتكلم من واقع خبرتي انا
اولا تكاليف الفيزا لاي دولة 50 - 60 يورو فقط لا غير -و اليورو تقريبا 8.20 جنيه- ... وفي بعض الحالات بتتعفي من مصاريف الفيزا ... في حالات السفر لمشروعات تبادل ثقافي او شبابي ... او رحلة علمية ... او لظروف انسانية زي رعاية مريض من الاقرباء او الاضطهاد السياسي -والعياذ بالله- من الدولة الام

وطبعا الفيزا دي اسمها شنجل .. يعني ممكن تاخد فيزا شنجل من سفارة اسبانيا و تطلع بيها فرنسا ... ده عادي جدا و كذلك التنقل بين الدول الاوروبية

ماعدا انجلترا .. مش انجلترا بس لا uk كلها يعني انجلترا و اسكوتنلادا وويلز .. ليهم فيزا خاصة بيهم

انواع الفيز بتختلف بناء علي الغرض من السفر... بس كل الفيز بتشترك ان سيادتك يكون ليك حساب في البنك تجيب كشف بيه -سواء دفتر توفيرأو فيزا او حساب جاري- وتقدمه للسفارة
وخطاب hr من جهة العمل .
ولو نوع الفيزا عمل او تبادل ثقافي او اي حاجه تانية غير السياحة بتجيب حضرتك كمان جواب الدعوة من المكان اللي حضرتك رايحه

ولازم تعمل حاجه اسمها تأمين مسافر في واحدة من شركات التأمين .. وقيمة البوليصة اللي حضرتك بتدفعها بتتحدد بناء علي الوقت اللي انت هاتقضيه

بالنسبة للسفارات .. السفارة الالمانية مش غلسة ولا حاجه يمكن ارحم من سفارة فرنسا و ايطاليا
ايطاليا زحمة بشكل مستفز

بس هو بشكل عام التعامل علي الشباك بتاع السفارات مش لذيذ .. لازم تكون مجهز ورقك كويس

بالنسبة لحجز تذاكر الطيران ... اكذوبة بقي ان مصر للطيران هي الارخص .. فيه شركات كتير محترمة بتعمل عروض ارخص بمراحل من مصر للطيران .. بس حضرتك عليك وعل مكتب سياحة مش شركة الطيران مباشرة ... وقدر الامكان هات التذاكر قبل موعد السفر بشهر علي الاقل علشان تاخد تخفيض كويس

بالنسبة للاقامة .. فعلا زي ما تقدم مجموعة من الاخوة
احب اقولك ان طرق الاقامة في الدول الاوروبية كتيييييييييييييييييير جدا وبرضو دي عايزة حد حرك وفاهم
1 - الفنادق والاوتيلات أسعارها غالية نسبيا
2- بيوت الشباب خدمة جيدة واسعار متوسطة
3- بيوت المضيفين "غالبا مجانية ولكن لابد من التنسيق معهم قبل السفر" وعلي فكرة في اسر كتييير جدا بتحب تستضيف الناس اللي جايين اقامات قصيرة في دولة من الدول
4- حاجه اسمها scout و دي زي بيت شباب لاكن مستواه صعب شوية وبيبقي بتكلفة زهيدة جدا جدا او بدون تكاليف

بالنسبة للانتقالات الداخلية .. غالية جدا ... اسعارالتاكسي افترا ... و الاوتوبيس نسبيا ارخص من التاكسي و القطار
القطار غالي يكاد يقارب سعر الطيران خاصة في الرحلات بين الدول الاوروبية

تحديدا ألمانيا و عن تجربة القطر من ليبزج الي برلين تقريبا يكلف 50 يورو


بالنسبة للاكل و الشرب
مش غالي
بالنسبة للمحالات المشهورة في اوروبا كلها "الاشهر subway" ممكن تاكل ب 5 يورو وجبة كمبو
ولو حضرتك عايز تبعد عن اللحوم والدواجن فيه محلات بتبيع سمك takeaway زي محل nordsea fish ده هايل جدا جدا .. السندويتش تقريبا من 2.5 يورو لحد 5 يورو برضو

مطاعم الاكل الشيك غالية جدا ... خصوصا فرنسا

الشرب ... اولا مية الحنفية هايلة للشرب
المياه المعدنية غالية جدا مقارنة بمشروبات تانية - صندوق البيرة 24 زجاجه ب 5 يورو - وسعر زجاجه المية المعدنية ال فيتال 2.5 يورو

المزارات السياحية دي بقي علي حسب

اخيرا وليس اخرا .. ما انصحكش تسافر اكتر من دولة في وقت قصير كده ... ركز في مكان علشان تشوفه كويس وتفهمه .. وعموما اوروبا كلها شبه بعضها .. بس لو هاتزور ركز في مدن كبيرة

ارشحلك اسبانيا ، ايطاليا ،هولندا، فرنسا ، بلجيكا ، وممكن ألمانيا علي الترتيب

تحياتي و يا رب اكون قدرت اساعد شوية
و اسف للاطالة

مشاء الله معلومات وفيرة جدا :) ..

بس هل الكلام البعد الفيزا دة .. على اساس اني طالع لوحدي ولا مع شركة سياحة ؟

المشاركة الأصلية كتبت بواسطة wal

بص هى المشكلة ان الجنيه الاسترلينى تكلفته مرتفعة امام الجنية المصرى يعنى تقريبا الجنية الاسترلينى يعادل عشرة جنية مصرى بس مش عارف حاليا هو بكام باظبط

الاقامة فى لندن هى اللى سعرها مرتفع يعنى مثلا لو فردين ممكن تقعدوا الليلة من 70 الى 100 استرلينى ودا هيبقى فندق ثلاث نجوم بس يفى بالغرض

بعد كده الاكل مش غالى والمواصلات معقولة يعنى بتجيب كارت عامل زى الفيزا وبتركب بيه الاوتوبيس والاندرجراوند معا بحوالى 25 استرلينى والكارت مدته اسبوع وتركب وتنزل فى اى وقت

المتاحف فى منها كتير مجانا والباقى باسعار رمزية ماعدا متحف الشمع غالى شوية

سعر التاشيرة من مصر هتكلفك حوالى 750 جنية مصرى وتذكرة الطيران ذهاب وعودة بحوالى3600 جنية مصرى صبعا مصر للطيران

التسوق والشراء فى بريطانيا رائع ومالوش مثيل فى اوروبا لدرجة هتلاقى ناس من مختلف الجنسيات من دول اوروبا بيشتروا من لندن لانهم بيعملوا خصومات رائعة وحقيقية فعلا مش زى اللى عندنا

كلام زاى الفل ..

بس نفس السؤال .. هل دة لو لوحدي ولا مع شركة سياحة ؟

اظن ان شركة السياحة بتتكفل بكل حاجة و تقولي التكلفة الكلية ..

فياترى التكلفة بتاعت شركات السياحة دي تبقى عاملة ازاى ؟

المشاركة الأصلية كتبت بواسطة أحمد كمال

قصدك شنجن :)

بص اسهل فيزا شنجن تاخدها حاليا هي ايطاليا او اسبانيا او هولندا

و على فكرة هي مش مستحيلة لو شغال في مكان كويس و دخلك كويس و عندك ما يثبت انك مش هتسافر عشان تكت و تكسر فيزا و تلبد ...... و كل ما يبقى فيه روابط اكتر تربطك بمصر زي املاك او عقارات او سيارات او وظيفة او اسرة و وضع مستقر بيطمئنوا اكتر

يا نهار أبيض...كده يا أحمد بك.... تشك فيا... مكانش العشم

( شنجل ) دي سمعتها من واحد لطيف جدااااا قدام سفارة الصين و هو اساسا مخلصاتي

و مش قادر اقولك عملت ايه أول ما سمعتها..... لكن شبطت في لساني من ساعتها و هي شنجل :)

طبعا المصطلحات اللي سمعتها من الأخ ده لم تتوقف عند شنجل فقط, لاااااا ده سيل من المصطلحات

أَطاليا, دورر (دولر يعني), نفر (never).... اوووووووووووه ده انا سمعت كلام

بس كده تظن فيا هذا الظن بردو....

المشاركة الأصلية كتبت بواسطة ahmed-moga

بشمهندس محمد بيتريق زي فيلم همام في امستر دام لما كان الراجل النصاب بيقوله (أحلي فيزا شنجل)هههههههههههههه مش كده يابشمهندس محمد

حبيبي يا احمد باشا..... فاهمني والله..... بس الراجل ده كان واحد زيه بالظبط بيتكلم معايا بجد

و صباح الضحك الهستيري على كمية المصطلحات الراااااائعه.....

الكلام ده طبعا لو حضرتك طالع مع نفسك مش مع شركة سياحية ولا حاجه