عندى مشاكل بتواجهنى فى اللوجان
اولآ فى صفاره فى العجل الامامى لما بضغط على الفرامل
طبعآ مش بتصفر الا اذا كنت جايب الغيار الاول والتانى عند التهدئه
رئى اصدقائى ان تيل الفرامل بيتاكل او ناشف شويه
ما علينا
تانى مشكله عندى ظهرت قريبآ
ان فى هواء ساخن بيدخل جوه العربيه
وتحديدآ من تحت الدريكسيون او من فتحات التكييف جمب الدوسات
الله اعلم برضو الحراره دى جايه منين بضبط
بس طبعآ دى حرارة الموتور اللى بتدخل
مش عارف ايه حلها دى كمان
تالت مشكله ان دواسه البنزين فيها رعشه
طبعآ المشكله دى عرفت انها مع كله مش انا لوحدى
وكمان هزة الفتيس
بس الحمد لله مشكله دواسة البنزين خفت عن الاول خالص
لان عربيتى معدى بيها ال 7000 كيلو
من الواضح انها بتتلين مع الوقت
رابع مشكله بقى اللهم صلى على النبى
ان العربيه بتحدف منى يمين لما بسيب الدريكسيون
ودى تقريبآ محتاجه ضبط زوايا على حد علمى
خامس مشكله بقى
ان فى مفارق فى الاكصدام الخلفى حوالى سم عن الصاج
مش متقفل كويس بمعنى اصح
انا محتار ومش عارف اعمل ايه بضبط
اروح للتوكيل ؟
وهل هروح ادفع دم قلبي هناك
ولا اخلص نفسى عند اي ميكانيكى واريح دماغى
الا انا روحتلهم تانى يوم اما جبت العربيه
تخيلو ليه ؟
وانا وقاعد فى العربيه تحت بيتنا فى امان الله
ومشغل الكاسيت وعامل اكتشف الغرائب اللى موجوده فى العربيه
زي مثلآ كلكس العربيه الغريب اللى موجود فى دراع الاشاره !!!!!!!
ده انا اكتشفته بعد يوم كامل !!!!
وزى مثلآ الزجاج الخلفى اللى بينزل من مفاتيج ورا فرامل اليد !!!!!!!!!
المهم يوميها وانا قاعد بكتشف الغرائب دى وبتعرف على العربيه عشان علاقتنا هتطول
فجأه لاقيت صوت قنبله !!!!!!!!!!!!!
انا قولت فى امبوبه ولا طوبه كبيره اتحدفت على سقف العربيه ولا على الشنطه
ابص ورايا الاقى الازاز اللى ورا جاله سرطان وبقى حتت فى مكانه
انا ازبهليت وفضلت متنح ربع ساعه
المهم طلعت تانى يوم على التوكيل طبعآ دى العربيه مش بقالها 48 ساعه معايا
دخلت عليهم وقالولى اومال فين الازاز ؟؟؟؟؟
اقولهم ازاز ايه بقولك العربيه الازاز جاله سرطان مره واحده وطرشق
قالى مش ينفع كان لازم تيجى بيه وهو متركب عشان نصوره !!!!
تصوره ازاى يا عم الحج ده مع اول زلطه فى الشارع وانا وجاى الازاز فضل يقع جوا العربيه
عقبال ما وصلت كان كل الازاز واقع فى العربيه
انت بتتكلم فى ايه بقولك ازاز جاله سرطان
قالى مش ينفع لازم تركب ازاز جديد على حسابك
قولتله وكام هيبقى حسابى ده ؟
قالى الازاز عامل 1600 جنيه بالمصنعيه .. ده بعد التخفيض كمان
الظاهر انه ضبط الرقم ده على اساس الماتور 1600 سى سى
والله حاجه تضحك
المهم طبعآ معملتوش ومشيت اصلآ وكرهت التوكيل
وبعدها وانا وماشى قابلت واحد راكب لوجان والسكه واقفه
قام فاتح الازاز ومكلمنى قالى قالولك ايه فى التوكيل !!!!!!!!
قولتله زي الفل
قالى انا عملته عند محل هنا فى اخر الشارع ب 400 جنيه
طبعآ روحت تانى يوم وعملته بره ب 400 جنيه وريحت نفوخى
ودى كانت اول مشكله وبدايه مبشره
طولت عليكم انا عارف
المهم فيدونى يا زملائى اعمل ايه انا دلوقتى
الا انا خلاص اتخنقت وقربت اكره العربيه اساسآ :original:
على فكره انا من اسكندريه
وصباح الفل
برجاء مراعاة الدقة الاملائية في الصلاة على النبي الكريم مشرف رينو