الموضوع: المواصفات القياسية المصرية للسيارات

حصريا لنايل موتورز:

صباح اليوم (الثلاثاء 16/2/2010) في برنامج صباح الخير يا مصر .. تم استضافة رئيس الهيئة المصرية للمواصفات القياسية .. ودار الحديث حول المواصفات القياسية المصرية للسيارات التي يتم إعدادها في الوقت الحالي (أو في طور الإنتهاء من تحديد ملامحها النهائية) .

وتابع رئيس الهيئة في حديثه عن المواصفات القياسية التي يجب توافرها في السيارات التي يتم تصنيعها أو استيرادها للسوق المصري ، وكذلك قطع الغيار المستوردة أو المصنعة في السوق المصرية .. ومن ضمنها :

1) أنظمة الكبح (الفرامل) يجب أن تشمل مواصفات معينة .. واعتقد أنه يجب احتوائها على نظام (ABS) "اجتهاد شخصي" .
2) أن يكون هناك محفز (فلتر) مركب في الشكمان وذلك للتقليل من الملوثات المنبعثة من العادم .. وأوضح أن هذا المحفز يجب أن يحد الملوثات (ثاني أكسيد الكربون والغازات الأخرى) بنسبة 70% على الأقل .. وسيتم تركيبه في السيارات القديمة وفحصه عند الفحص الدوري للسيارات في المرور للتأكد من وجودة وأنه يقوم بعمله .
3) انظمة الإنارة في السيارة .. يجب ألا تكون مبهرة ومسلطة على السيارات القادمة في الاتجاه المعاكس .
واعترضه المذيع بسؤال عن الزينون وأنه يأتي مع بعض السيارات المستوردة من الخارج .. أجاب أن الزينون في حد ذاته ليس ممنوع ولكن يجب أن تكون شدة أضائته وطريقة توجيهه للطريق وفق معايير ومقاييس معينة .
4) الكلاكس .. له نسبة في قوة صوته وفقاً لمقاييس ومعايير موضوعة .
5) الكاوتش .. له مواصفات ومقاييس معينة تناسب الأجواء المصرية .
6) وبالنسبة لقطع الغيار .. لها مواصفات معينة .. وسوف يتم تصميم علامة مائية يلصق عليها لتوضيح مطابقتها من عدمه (وذلك للقضاء على قطع الغيار المضروبة).

وأضاف بأنه تم الاتفاق على هذه المواصفات بالتنسيق مع وزارة الصناعة ، شعبة مصنعي السيارات ، وقد تم إعلام جميع القائمين على هذه الصناعة (مصنعين - مستوردين - مصانع قطع الغيار) بهذه المواصفات ، وسيتم العمل بها بعد فترة انتقاليه مدتها 6 أشهر لتوفيق الأوضاع .

المهم بقى في الحديث ده .. ممكن نطلع بنتائج مفداها الأتي :
1) أنه في خلال من 6 إلى 8 أشهر سوف تظهر في السوق سيارات (سواء تم استيرادها من الخارج أو مصنعة محلياً) لها هذه المواصفات .. معنى كدة أن اللي في نيته يشتري عربية في الوقت الحالي يستنى شوية .. ولا العملية مش حتفرق
2) بدء تضييق الخناق على أصحاب السيارات القديمة عند تجديد الرخص بالمواصفات دي .. لحد ما يقولوا حقي برقبتي ويا أما ويرموا عربياتهم أو يشتروا عربيات جديدة .والخروج من مأزق الإحلال للملاكي بشكل شيك لعدم تحميل ميزانية الدولة أيه أعباء كما حدث في التاكسي .
3) بارقة أمل في صناعة واستيراد السيارات أنها تكون بشكل أمن ومناسب للسوق المصرية
دعوة للنقاش في هذا الحوار

المشاركة الأصلية كتبت بواسطة m_a_gamal

يا باشا صعب ان المواصفات القياسية تلزم الشركات المصنعة والوكلاء بتجهيز العربيات ب abs و airbags في مصر، ده حتى المواصفات الخليجية اللب هي سبقتنا بكتير ما فيهاش الحاجات دي كتجهيزات قياسية، هي بس بيبقى في توصيف ليها في حالة تجهيز العربية بيها ولكنها مش اجبارية.

ملحوظة مهمة:
في ناس كتير في مصر بتتكلم عن ال ABS وانه ضروري وبيخلي كفاءة الفرامل أحسن، لكن العكس هو الصحيح، ال ABS بيزود مسافة التوقف بتاعة العربية على الطرق الجافة (وده حال طرقنا اغلب ايام السنة) ولكنه بيمنع انغلاق العجل في حالة الفرملة الشديدة على الطرق الزلقة مما يسهل المناورة بالسيارة باستخدام الدريكسيون.

مش شرط حضرتك اير باج وايه بي اس (بس حاسس أنهم حيبقوا من ضمن الشروط واجبارية) .. فيه مثلاً الكاوتش أو نظام تعليق معين .. وأكيد بعد ما شافوا فوضى التوكتوك واشباه العربيات اللي ملت الشارع وسببت الكثير من الحوادث عاوزين يحدوا برضه منها .

المشاركة الأصلية كتبت بواسطة M.Osman

طب السؤال هنا ... هل العربية التوكتوك ام 3 عجلات فيها المواصفات دي ؟ ولا انا اللي هجمعها و هما مش واخدين بالهم ؟؟؟

يا باشا حضرتك تجمع اللي أنت عاوزه .. اشمعنى يعني .. واكيد برضه التوكتوك حيراعوا فيه الموضوع ده ها ها ها

المشاركة الأصلية كتبت بواسطة Terrible_DaRsH

هما اخدوا القرار ده بعد ما طبخوا مشروع التاكسي الجديد و خلصوا على اللانوس و الفيرنا !

لو على المواصفات دى اسعار العربيات هتولع و كمان عربيات كتير مش هتتباع , اولهم الانوس و اللوجان الـــــخ .

ما ممكن يحطوا في اللانوس والفيرا واللوجان المواصفات دي وساعتها اسعارها حترفع من الستينات إلى التمانينات ، والحاجة لو تكلفتها الإجمالية 5000 جنية حيضيفوا على تمن العربية 8000 جنية على الأقل .. وهو النظام كدة لو عاجب الناس .

المشاركة الأصلية كتبت بواسطة ainshouka

مش عارف ليه حاسس ان من ورا الموضوع دا سبوبة حتطلع لناس معينة

دا بلدنا مش من النوع اللى بتهتم بمواصفات ولا نيلة

دحنا مش قادرين نوفر انبوبة بوتاجاز حنتكلم عن مواصفات قياسية

بلاش اوهام

مش أوهام ولا حاجة المواصفات دي حتطبق .. وموضوع السبوبة ده .. ممكن يكون تعويض عن خسائر الفترة اللي فاتت للعاملين في مجال السيارات .
بس على فكرة الراجل قال في وسط كلامه .. أنهم بيراعوا أحدث المواصفات المطبقة عالمياً لمواكبة العالمية وفتح اسواقنا على العالم (اعتقد بيتكلم على قطع الغيار مش العربيات المجمعة في مصر) .
وبعدين ليه لآه ما أنا سامع أن شركة بروتون اشترت شركة النصر للسيارات وفي صدد إنشاء خط تجميع لسياراتها في مصر .. وأكيد السيارات المجمعة دي حيكون فيها نسبة مكون محلي .. وعلشان تصدر المنتج ده وتنافس بيه في المنطقة لازم يكون بمواصفات عالمية (مش بطنابير في أول ألف كيلو تقفع ولا تيل يتاكل بسرعة .. إلخ)

المشاركة الأصلية كتبت بواسطة 3llamy

عالبركه
اعتقد انه الموصفات جيده ظاهريا
وفي انتظار التطبيق و نشوف النيه على ايه

يا رب تبقى النيه كويسة ومتكونش في ظاهرها الرحمة وفي باطنها العذاب .