ازاى تختار الموتوسيكل الى يناسبك ( كستم - ريسينج - تريلا)
معلش بقة انا تانى
النهاردة بقة تعالو نتكلم على شخصيتك واية الموتوسيكل الى يناسب حضرتك دة على اد معلوماتى الصغيرة ونفسى برضو استفاد من رايكم
الكستم اسعارة تبدا من 17الف
يصلح للسن الكبير والشباب بس مش الشباب الصغير علشان ثقل حجمة (وزنة تقيل )
مميزاتة:
1-مواتير جامدة جدا وقليل لما تلاقى حد بيعمل عمرة والكلام دة وولا بيفرق معاها شتاء او صيف طالما بتغير زيت وتزود مياة
2-لو حضرتك من النوع الكلاسك والشياكة ولازم تروح شغلك بلبس كلاسك فهيكون هو الموتوسيكل الوحيد الى ينفع لحضرتك دة غير انة كمان الطقم الجلد والخوذة بيعملو شغل بس الجينز مم يعنى
3- ثابت جدا فى الجرى علشان مش موتوسيكل خفيف وكمان محور الاتزان بتاعة
4- شكل الاستانلس والجنوط وانسيابية الموتوسيكل ملفتة وكمان من الموتوسيكلات المفضلة للجنس الاخر
5- ودة الاهم الفرامل بتعتة بتوقفة فى مكانة الفرامل قوية وهو تقيل فبيثبت
6- مش بيتعب الجسم ولا الظهر فى السواقة
7 -يصلح للسن الكبير
العيوب
حجمة كبير شوية يعنى بياخد مكان فى الركن ومش اى حتة ضيقة يعدى منها زى باقى الموتوسيكلات
مش بيطلع على الرصيف والحركات دية
قطع الغيار كلها موجودة الجديد والاستعمال سعرة معقول بس احسن حاجة ان كل قطع الغيار موجودة طبعا انا بتكلم على الاستيد والشادو ولو انت جايب حاجة حالتها كويسة يبقى زيت وفلتر ومياة وبعدين كوتش بعد عمر طويل
التريلا اسعار تبدا من 12 الف
يصلح للشباب فقط
التريلا بقة عكس الكستم تماما يعنى لعب وشقلبة ومراجيح وجينز وكدة
مميزاتة
1- موتوسيكل خفيف جدا فى الحركة طبعا مش اصدى تشيلة وتخدة معاك يعنى
2-سهل الحركة فى الشوارع المصرية بالذات تعدى بية رصيف تمشى على الرمل او على الاسفلت كلة شغال
3- ينفع الناس الطويلة فقط بداية من 170 سنتيمتر ودية اقل حاجة
4- ممكن تركنة فوق رصيف وممكن تنيمة على جمبة كلة شغال
5-قطع الغيار بتعتة ارخص من الريسينج والكستم
ولو شغلك فى موقع او رمل والحجات دية ينفع اوى بس مش اى حد يسوقة فى الرمل عاوز تمرين
بس طبعا مينفعش تلبس كلاسك وتسوقة وطبعا علشان عالى مش اى حد هيركب وراك وطبعا انتو فهمين اصدى يعنى من الاخر موتوسيكل بتاعك لوحدك
واخيرا الريسينج الباشا الاسعار تبدا من 14 الف
طبعا شبابى من الدرجة الاولى لانة تعبير عن القوة
موتوسيكل الناس الى مبتهزرش وطبعا غنى عن التعريف موتوسيكل مش عالى الارتفاع مواتير جمدة جدا ملفتة لنظر كل الشباب وخصوصا ما بين 16 الى 28 سنة واكتر بس مش بعد ال 40
مميزاتة
1- شى واحد وهو اهم شى صمم لية وهية السرعة
2- بيعمل شغل حلو.... فاهمين ولا اقول
عيوبة
1-مشاكل بسبب السخونة لجو مصر بالاضافة انة موتور حرقة ولفاتة عالية
2- بعض قطع الغيار الغالية او المش موجودة خصوصا فى السى سى العالى فوق ال 900
3-مش هياكل مع البس الكلاسك اوى
4- الكاوتش بتاعة ميكلش مع شوارعنا طبعا انتو عارفين لية علشان شوارعنا نضيفة زيادة
وفى الاخر احب اقولكم انى معلوماتى على ادى ويارب اكون افدت اى حد واحب اسمع رايكم وكلة فى الاول والاخر علشان كلنا نستفاد