الموضوع: مساعدة بخصوص بيجو 206

اييييه يا رجالة، مش ده قسم بيجو برده و لا انا غلطان فالعنواااان

والله يا كوكو أنا معنديش فكرة عن مشاكل الكهربا دي

وبعدين صاحبي معاه 207 2009 ومفهاش أي مشكلة لحد دلوقتي...

ممكن تقولنا ايه المشاكل اللي انت سمعت عنها؟؟

وبعدين على فكرة دخول عرين الأسد مش زي طلوعه!

دي تجربة قيادة عن العربية تشمل بعض المميزات والعيوب منقول من موقع آخر، يا رب تكون مفيدة بالنسبة لك..


تجربة السيارة بيجو 206 سيارة الشباب والسيارة الجميلة فى حجمها ومتعة قيادتها فهى سيارة سهلة الركن سريعة الانظلاق

الموتور
يوجد اثنين الاول1400 سى سى ولكن الذى تم تجربته هو الثانى والذى سعته 1100 سى سى أقصى العزم للموتورعند عدد لفات 2500 لفة فى الدقيقة 94 نيوتن/م
العربية طلعتها جامدة و سحبها لحد 120 كويس بعد كده بتبقى بطيئة لحد 160 (أقصى سرعة) مع العلم إنى مش من هواة الجرى و القرص على العربية
العربية دى فى السفر أحلى سرعة ليها و اللى بحس ان العربية بتبقى مسترحة فيها هى 130 بعد كده بيبقى صوت الموتور عالى
الكماليات
تكييف – باور – سنتر بريموت – زجاج كهرباء امامى فقط – أربع سماعات فى الأبواب – عداد رحلات
العربية 1400 بتزيد فوج لايت امامى
بالنسبة للمميزات
شكل جذاب لحد دلوقتى رغم ان مضى عليه مدة
إستهلاك بنزين رائع حوالى 250 كم فى الصفيحة داخل المدينة فقط
تقفيل داخلى و خامات ما شاء الله بتتحمل
أدائها ممتاز حتى مع الموتور 1100 سى سى لكن طبعآ ال1400 سى سى هيكون أحسن بكتيير
تكييفها يعتبر جيد مش ضعيف حتى فى ساعة الظهر لكن مش فى قوة التكييفات اليابانى زى الهوندا مثلآ نظرآ لحجم الموتور برضه
ثباتها فوق الممتاز رغم حجمها الصغير حتى على السرعات العالية و فى الملفات
بالنسبة للعيوب
أسعار قطع غيارها مرتفعة لإن المفروض عربية من موديل 2001 لحد دلوقتى تكون قطع غيارها رخصت عن كده
الدركسيون بتاعها تقيل شوية يعنى الباور مش زى الكورى او اليابانى بس هو فى المقابل بيبقى ثابت على السرعات العالية
مفيهاش الكماليات الكتير المبهرة زى اللى موجودة فى العربيات دلوقتى حتى ال207 تعتبر فاضية و هى بتزيد فقط عن 206 مرايات كهرباء لكن طبعآ فى الأداء ففى فرق كبير
التكييف بيأثر على سحبها لكن مش بيخنقها يعنى مش هتحس إنها بطة
هى دى العيوب اللى حسيتها فى العربية دى
بالنسبة لحجم العربية
لكن هرجع و أقول العربية دى مش بتاعة عائلات كبيرة و شنط كبيرة و كتيرة
هى العربية دى بتناسب الشباب أكتر او الأسرة اللى عددها صغير و مش بتشيل كتير
فهى مسألة نسبية و ممكن البعض يراها ميزة و البعض الآخر يراها عيب
التوكيل و مراكز الخدمة
التوكيل يعتبر جيد بصراحة ناس محترمين و مواعيدهم فى التسليم مظبوطة و الحمد لله عمرى ما غيرت حاجة فى العربية و رجعت ليهم تانى بنفس العيب
هم مشكلتهم ان مصنعياتهم غالية يعنى فى اقل حاجة ممكن تدفع 100 جنيه مصنعية
بس فى المقابل هم عندهم العدد اللازمة لفك كل جزء فى العربية يعنى مفيش شغل الميكانيكية و الخبط اللى بيعملوه

الف شكر ليك عالرد يا NiceGoodFair (كلو معا بعضه كدة )
و انا سمعت ان مشاكل الكهرباء فى 206 موتور 1400 سى سى، ايه هيا بالظبط بقى هوا ده اللى بسأل عليييه .
و شكلى مش هخوش عرين الأسد ده اصلا و هرجع ادور على بولو و لا ابيزا 2001 بس برده 1400

والله فعلا أنا نفسي أساعدك بس ما عنديش أي فكرة.....

ومرسي على ذوقك..

يا باشا كفاية روحك الحلوة و انك نفسك تساعد
الف شكر لحضرتك

أي خدمة يا باشا أنا تحت أمرك....

بص كده على الموضوع ده:
http://www.nilemotors.net/Nile/30335-206.html

ربنا يوفقك للأحسن

ربنا يخلى حضرتك و متشكر جدا و انا استفدت جدا من اللينك
بس مستنى برده بااااقى اعضاء بيجو الجامديين يفيدونى ف 1400