محتاج نصيحة اخوية

**theking2690** · 26-12-2007 06:34 PM

انا كنت عاوز اخد ارائكم فى موضوع انا بأذن الله هشترى عربية و الميزانية مش هتزيد عن 80,000 و بالنسبالى العربية ديه هتكون اول عربية بعد العربية اللى اتعلمت عليها السواقة فيات 127 فأنا الصراحة محتار بين عربيات كتيره و الصراحة انا عايز عربية مناسبة لسنى انا عندى 18 سنة و انها تستحمل استعمال الشباب و الصراحة انا محتار كمان انها تكون عرية مانيوال احسنلى و لا اتوماتيك و العربيات اللى انا محتار بينها هى:
1-جولف 4
2-اوبل فكترا
3-هيونداى النترا
4-bmw e36
5-هيونداى ماتريكس
6-دايوو جولييت
7-ميتسوبيشى لانسر
9-نيسان صنى
10-سيات ابيزا
11-جين 2 بس ديه مقلق منها اوى علشان كل الاعضاء اجمعوا ان الفينيش بتاع العربية مش اد كده و انا الصراحة بحب العربية تبقى على الفرازة

و انا محتار بين دول و عايز اعرف منكم انهى احسنهم سواء من ناحية قطع الغيار و المتانة والثبات بتاع العربية و الحاجات دي يعنى فأنا عاوز ياريت لو حد نصحنى بعربية من دول يقولى ايه السبب فى اختياره ليها و ايه مميزاتها و ايه عيوبها و كمان لو حد عنده اى اقتراح تانى انا مرحب ان انا اسمعه و يا ريت مكونش طولت عليكم انا كتبت الموضوع هنا لأن فى المنتدى العام مفيش غير 3 ردوا عليا يا ريت هنا حد ينصحنى اعمل ايه:)

**fahd_628** · 26-12-2007 06:50 PM

انا رأى الشخصى البحت ان انت معاك مبلغ يجيب عربية زيرو كويسة و برضة الزيرو لية فرحتة غير المستعمل و بتحس كدة بأرتياح نفسى انك انت اول واحد سقت العربية و عارف انت عامل فيها لكن المستعمل بيبقى مجهول نوعا ما فا انا رأى انت تشوف حاجة جديدة

و بالنسبة للسيارات فى فئة ال 80 - 85 فا عندك

الياريس

عربية عائلية و عملية و واسعة و محرك 1300 موفر فى البنزين و هو نفس محرك الكورولا 2007 يعيبها قلة الكماليات فى الهاف اوبشن و قيادتها صعبة نوعا ما فيها حتت طالعة كتيير لبرة و مش بتشوف الكابوت خالص خالص ولا حتى لو لزقت راسك فى السقف و الشنطة عالية اوى و مش بتشوف ورا كويس خالص بصراحة انا شايف ان قيادتها مزعجة ( بالنسبة ليا ) و كمان ثباتها مش اد كدة بس هية عالية عن الأرض و مبتحكش فى اغلب المطبات

الجين 2 الى انت متخوف منها

شكل جميل جدا ثبات ممتاز جدا جدا جدا جدا و محرك قوى 1600 سى سى طبعا مش موفر فى البنزين زى الياريس و الوسع الداخلى مش زى الياريس بس معقول جدا سرعة و عربية تنفع جدا لشاب و بتنزل بكماليات بالهبل مثال ( ABS - 2Airbags - سنترلوك - 4 زجاج كهرباء - انزار - مانع سرقة - جنوط سبور - فوج لايتس - مش حقول طبعا تكييف و باور - تعديل النور الأمامى بمحرك من الداخل ممكن تخلية ينزل لتحت او يطلع لفوق حسب ما انت عاوز و بتعدل الكرسى فوق و تحت و الدركسيون برضة فوق و تحت ) و حاجات كتيير و على فكرة صاجها قوى جدا جدا جدا اقوى من تقريبا كل العربيات الى فى فئتها

بالنسبة لقطع غيار موجودة خارج التوكيل عند اكثر من محل متخصص فى بروتون و حتلاقى عناوينهم و ارقام تليفوناتهم و حتلاقينى عامل مواضيع كتيرة عن الجين 2 و فيديوهات جميلة جدا جدا جدا عن العربية و على فكرة عيوب التقفيل تم تفاديها فى موديلات 2007 حتلاقى كل الى بيشتكى من عيوب التقفيل فى موديلات 2005 - 2006 و لكن 2007 بشهادة اكثر من عضو مفيهاش الحمد لله عيوب فى التقفيل

لو بقى حاجة مستعملة عندك الجولف 4 عربية 100 100 بس قطع الغيار بقى ( المانى )

لانسر برضة كويسة جدا

ماتريكس ممتازة لو عربية عائلية

اوبل فيكترا عربية 100 100

شوف انت بقى محتاج اية :) انا عارف انى حيرتك زيادة :)

**theking2690** · 26-12-2007 07:08 PM

متشكر اوى على الرد الجميل ده يا استاذ فهد و الجين 2 اللى مخوفنى منها كمان سعر اعادة البيع و قطع الغيار

**wildwest100** · 26-12-2007 07:19 PM

loook
golf 4
seat ibiza ut not 1000 cc 1400 cc it'sok
julite wenta tezabatha
we akeed lancer
they are the best

**theking2690** · 26-12-2007 07:30 PM

انا بحب الابيزا بس المشكلة عندى ان الموديلات اللى فوق ال 2000 كلها 1000 cc ما عدا طبعا الجديدة 1400cc

**MoToRiZeR** · 26-12-2007 07:34 PM

Gulf في المستعمل

ياريس في الجديد

**محمد المصرى** · 26-12-2007 07:58 PM

بس يا باشا

انت فكرتنى بشبابى

انا كان نفسى اركب كل العربيات وخصوصا الهاتش باك

عشان كده عمرى ما فكرت اجيب زيرو لان ده طبيعة الانسان دايما عايز كل حاجة
انا بحب اركب العربية سنة اثنين اكتر حاجة 3 سنوات وطبعا مش عايز اخسر فلوسى
عشان كده وانت شاب صغير
الاول اركب هاتش باك لان ده ليه متعة خاصة جدا وكمان بعد كده هيبقى نفسك تركبه ومش هتقدر
عشان ان شاء الله هتكون عايز عربية تشيل عيلة فى المستقبل

وبعدين اركب مانيوال فى الاول لانه برده ممتع فى السواقة والشد

عشان كده انا بنصحك بالجولف 4 عربية رائعة رائعة
او ابيزا الجديدة شوف حاجة استعمال نظيف يعنى كسر زيرو
( العربيتين دول ليهم متعة خاصة جدا وبرده ده راى شخصى )

الفيكترا مش سنك خالص بس طبعاً لو هتركب 2000 cc ده حلوة اوى ( بس اسمع ان مشاكها كتيرة )

وطبعاً انا منصحكش بزيرو عشان زى ما قولتلك انت صغير وهتلاقى نفسك كل يوم تغير عربية
وعايز تجرى وتشد وهتضايق لو عربية زيرو واتخبطت
اما المستعمل فمبتزعلش عليه اوى

ده راى وبرده راى شخصى

**theking2690** · 26-12-2007 08:03 PM

مشكور جدا يا استاذ محمد انت وdehumanizer على الرد الجميل ده و انا مستنى اكتر عربية هتاخد اكتر اصوات و بأذن الله ربنا يوفقنى و اجيبها ومسنى باقى الردود

**Sharky** · 26-12-2007 09:09 PM

رأى الشخصى بالترتيب:
1-جولف 4
2- تويوتا ياريس
3- ميسوبيشى لانسر
4-اوبل فكترا
5-نيسان صنى
6- بروتون جين 2
7-سيات ابيزا
8- bmw e36
9- هيونداى ماتريكس
10-هيونداى إلنترا
11-دايو جوليت