نصيحه بخصوص بلي العجل الامامي - لانوس 1
السلام عليكم ياجماعه
من فتره قريبه جداا بدات اسمع صوت خشونه في البلي الامامي خاصه مع السرعه , وبصراحه قررت اني اغيير البلي الامامي , واغيير البلي الخلفي كمان لو لزم الامر
المهم النهارده نزلت شارع شامبليون في وسط البلد عند موزع اسمه سرور , اظن انه معروف شويه , وسألته على البلي فقالي :-
عنده الكوري الـ GM الاصلي بـ 160 جنيه الاتنين اللي ادام , والاتنين اللي ورا بـ 130 جنيه , وطبعا شوفت البلي وفعلا محفور عليه Korea
وسألت عند موزع تاني فقالي :-
عنده الألماني احسن من الكوري 100 مره (قال : الكوري الاصلي ده مضروووووب) الاتنين اللي ادام بـ 180 جنيه , والاتنين اللي ورا بـ 160 جنيه
بصراحه انا اسمع ان جوده الالماني احسن , وده طبعا اذا كان اصلي
فياريت ياجماعه لو حد عنده نصيحه سواء في النوع او المكان اللي اشتري منه يقولي , لاني بدات احتار بعد ما كنت مستقر على البلي الاصلي الكوري
على فكره انا سألت كمان (عند سرور) على طقم الدبرياج قالي عنده فاليو اصلي بـ 300 جنيه
وطلمبه الميا الكوري الاصلي بـ 90 جنيه , وعنده نوع الماني بـ 110 على ما اتذكر
ايه رأيكم في الاسعار دي ؟ لاني عايز اعمل شويه صيانه للعربيه