الموضوع: يعني اشتغل سواق موكروباظ مثلا و لا اعمل ايه ؟

المشاركة الأصلية كتبت بواسطة nomercy22

وانا كمان عاطل معايا بكالوريوس تجاره ودبلومه في الاوراكل فينانشيال

ابشررررررر
انا باخد كورس الـoracle financial

المشاركة الأصلية كتبت بواسطة abdm

بصوا يا شباب فى الوقت الحالى للآسف الشباب ممكن يشتغل أى شغلانة بس بتفرق نوع الشغلانة دى من شخص لآخر حسب العمر يعنى لو سنة كبير هيحتاج شغلانة تجيبلة عائد كبير أما لو سنة صغير ممكن أى شغلانة بأى مرتب فى البداية وبعد كدة لما يقدم فى الشغل مرتبة بيزيد وبيترقى مع الزمن ونصيحة أحب أقولهلكم

أولا : أنا بالنسبالى فى أسوء الآحوال ممكن أشتغل فى أعمال حرفية لآنها بتدخل عائد كبير شوية ممكن يفتح بيت
ذى مثلا النقاشة وأنا بحبها ودة لآن سنى كبير ومحتاج دخل عالى شوية

حاجة تانى المفروض كل أنسان للآسف فى الزمن دة لا يعتمد على مؤهلة فقط لازم يكون معاة أى حرفة تانى أو مهنة تانى يحاول يتعلمها أثناء الدراسة علشان لما يتخرج يلاقى شغل جاهز

حاجة ثالثة ودية أحسن حاجة وهى أن كل واحد يحاول يشتغل بالمؤهل بتاعة كعمل حر فى أى مكان يعنى محامى فى مكتب أو مجموعة مع بعضهم أو محاسب فى أى مكان كويس أو يفتحوا مكتب محاسبة مع مجموعة مع بعض وكذلك أى مهنة
عيب الطريق الثالث دة أنة نتائجة وأنتاجة ومكاسبة بتيجى بس على المدى البعيد فمحتاج صبر جامد قوى واللى يصبر ينول ومميزاتة أنك بتشتغل فى المهنة بتاعتك وبالمؤهل بتاعك وبيكون ليك خبرة كبيرة بعد كدة

حاجة رابعة لو فى أى أمكانية لعمل مشروع أو العمل فى أى مهنة غير المؤهل حتى لو فى مطاعم التيك أواى أو أى مكان تانى بس يكون كويس تبتدى فية من الصفر مع الوقت بيكون ليك شأن وبتترقى وبيزيد مرتبك .

أو تروح لمؤخذة تتعلم أى صنعة بردة من الصفر صبى عند عفشجى أو ميكانيكى أو أى مهنة تبع شغل السيارات ودى مع الزمن بتكسب دهب أو حلاق يعنى كوافير رجالى وبعد ماتكسب خبرة تفتح محل أو أى مشروع تانى

الخلاصة : الواحد يحاول يدور ويختار المهنة اللى عايز يشتغل فيها طول عمرة وأيضا المكان الكويس المحترم اللى عايز يشتغل فية ويكون شايف أنة ممكن يكون فية مستقبل وسهل قوى أنة يبتدى فية من الصفر ويستحمل لغاية ما يوصل ومرتبة يزيد ويترقى كمان ودة بيحصل كتير قوى جدا بس عايز صبر وواحد عندة أستعداد ويكون سنة صغير علشان هيبتدى من الصفر وأن شاء الله ممكن خلال 5 سنين يكون أستقر بأذن الله ويقدر يفتح بيت ويجوز ويكون أسرة
والله الموفق

كلامك سليم و فعلا العمل فى حد ذاته ليس صعبا و ليس بعيد المنال يعنى ممكن تشتغل فى اى وقت بس الفكرة حتشتغل ايه و تشتغل بكام و ازاى تشتغل يعنى ( مؤهلاتك او خبراتك الفنية ) فى مجال العمل و لهذا يجب على كل شخص النظر للامام دائما و البدء من الان فى التخطيط بشكل سليم
و فعلا كما قلت انت حتى لو قام الشخص بالعمل فى عمل حرفى على اساس انه مثلا بيجيب فلوس كتير و سهل الالتحاق فيه بدون مؤهلات فهو محتاج ايضا ان يقطع المشوار من اوله من صبى الى متدرب الى محترف الى صاحب ورشة حتى يكون العائد المادى مجزى

بس ايضا هناك شىء يجب على الجميع من الشباب ان يعلموه - سهل عليك انك تسيب العمل النهاردة و تقعد فى البيت لحد ما تلاقى شغل احسن بس صعب عليك بكرة لما يكون عليك مسئولية اسرة وأعباءها ان تفكر حتى فى الانتقال من عمل الى عمل اخر و لو كان افضل من العمل السابق لانه سوف يترتب عليه تغيير فى عادات الاسرة و نظامها فى بعض الاحيان نظرا لتغيير عمل رب البيت

انا مثلا تركت عمل اشتغلت فيه 13 سنة و ذهبت الى عمل اخر او بمعنى اخر عملت كاريير سويتش اى ان مجال العمل و طبيعة الشركة تختلف تماما عن السابق و كان عندى شعور ممتزج بين الخوف الشديد و الاندفاع و النهور فى نفس وقت و لا اعلم كيف بس الحمدالله و التوفيق من عند الله مشيت الامور كما يجب - و بعد فترة من الانتقال اكتشفت ان خطوة التغيير كانت مطلوبة من زمان مع ان العمل السابق كان مريح و فيه مميزات و مع ان ايضا مواعيد العمل و نظامه يختلف كثيرا و ساعات العمل تزيد فى بعض الاحيان كثيرا عن السابق بس يجب على الشخص دائما اكتساب خبرات جديدة و الاختلاط ببيئات عمل جديدة لما فيه من اثر جيد مستقبلا

النقطة المهمة فى الموضوع هو ان سوق العمل يحتاج الى الكثير - اهرام يوم الجمعة بيقول كدة ، بس يجب اختيار التخصص المطلوب و النجاح فيه حتى نلاقى نفسنا مطلوبين من قبل اصحاب العمل

تمنياتى بالتوفيق للجميع