اقتباس المشاركة الأصلية كتبت بواسطة momopersona مشاهدة المشاركة
يا جماعه انا عندى 18 سنه بس
وان شاء الله محبط جدا وشكلى هاسيب الدراسه لانى بئيت باعتبرها وقت ضائع من عمرنا
وتفكيرى رايح لانى اجيب تاكسى فيرنا او اسبرانزا بالتقسيط
وطبعا واكيد والدى لازم يساعدنى على الاقل ب 20 الف مقدم وبضمان مرتبه
واعتقد انه مشروع ممتاز مقارنة بالحال اللى احنا فيه واللى معاه تمن تاكسى حقه مايترددش حتى لو كان خريج ايه
مفيش مجال دلوائتى للبريستيج خالص
كله زى بعضه واللى بيعرف يجيب فلوس(بالحلال) اكتر وبمجهود اقل هو الافضل
فكرو معايا فى الفكره
ومميزاتها كتيييييير جدا
1- مش شغال عند حد
2- زمن الشغل (براحتك)
3- اجزاتك انت حر فيها
4- شغلانه سهله مقارنة بأى شغلانه
5- مكسبها كبير

عيوبها:
1- محتاجه رأس مال
2- مش مضمونه لاقدر الله (حادثه) بس فى تأمين طبعا
3- بريسنيج مش تمام

عايز رأيكو معايا فى الفكره ؟؟؟؟؟؟
لالا لا
ايه اللي انت بتقولوا دا

اوعي تفكر كده دراسة ايه اللي انت عايز تسبها

انت اجتهد و اعمل اللي عليك و ربنا هيرزقك و توكل عليه

و بعدين لما تروح تتقدم لواحده هتقول لها ايه؟

و اوعي تفتكر ان التاكسي شغله سهله و يعدين انت اكيد هتجيبه اقساط عارف انتي لازم تشتغل كام ساعه في اليو علشان تقدر تسدد الاقساط دي غير مصرفاتك الشخصيه مش اقل من 15 ساعه

انا اعرف واحد عنده 60 سنه دلوئتي و من عيله محترمه جدا جدا كل اخواته داكتره و مهندسين واساتذة جامعه وولادهم ما شاء الله عليهم

الراجل دا ادلع و هو صغير و قال زيك كده و وقف لحد ثانوية عامه و مانجحش فيها

والده ساعده و جابلوا تاكسي طبعا ماستحملش و هو شهرين وباعه و بعد كده اشتغل مندوب مبيعات لكذا سنه و لحد ما الشركة اللي بيشتغل فيها و كان صاحبها معرفه من طرف عيلته علشان كده شغله ,اتقفلت الشركه و طبعا هو راح يدور علي شغل و بالرغم انه عنده خبره اول حاجه في السي في بتاعته لازم يكتب معاه شهادة ايه

و الناس كانت بتستغرب انه مش معاه شهاده

انت عارفه دلوئتي لولا الله ثم ميراثه من اهله كان شحت و فيه مشكله بتقابله دلوئتي صحيح انت مش هتهم بها الان بس بعد كده هتندم اشد الندم لما توصل لسنه

عنده بنتين كل اللي يجي يتقدم لهم طبعا بيسال عن وظيفة والدهم و شهادته و لما بيعرفوا بيطلوعوا يجروا

ع العلم ان الراجل دا ساكن في منطقة من ارقي المناطق و و بناته حلوين جدا ما شاء الله و كمان مستواهم عالي لن اصلا عيلته مستواه عالي

والله دلوئتي بيقولي انا ندمان اشد الندم اني ما كملت دراستي و عمري ما هنسي يوم ما رجع من مقابلة وظيفه مرة و ازاي عاملوه لما عرفوا انه مش معاه شهاده

نصيحه من اختك الكبيرة اوعي تعمل كده والله هتندم

و يا جماعه بلاش الاحباط دا و يارت تخلوا بالكم ان غيركم بيقرا كلامك و ممكن يأثر فيه و يقول طيب اتعب و اعلم ليه و انا في الاخر هكون كده

انا عارفه ان حال البلد زي الزفت و انا نفسي بمر باللي انتم بتمروا به بل و اكتر لاني منتقبة و ماحدش بيرضي يشغلني علشان النقاب بالرغم من شهادتي و تعليمي

بس والله توكلوا علي ربنا هتلاقوه بيرزقكم ازاي ماتعرفوش و بيفتح لكم ابواب رزق ما كنتوش تفكروا بها ابدا