دلوقتى انا لفت نظرى وجود عدد لا باس بيها من قريباتى و زميلاتى فى العمل مش متجوزين و هم على خلق و دين و اكيد فى المقابل فيه شباب بيدور على بنت الحلال و مش لاقى
و لما قعدت اتناقش مع اصحابى لقينا ان اهم مشكلتين هما :
1- ضعف الروابط الاجتماعى
2- سوء الحالة الاقتصادية
و فيه مشاكل هامشية زى العرى و الانحلال و ما شبه ذلك
المهم مسكنا النقطتين دول و ناقشنهم
النقطة التانية دى مفيش فى ايدينا حل ليها لان الرزق من عند الله و حلها يحتاج تغيرات سياسية كبرى
النقطة الاولى دى لعبتنا و دى الحلول اللى وصلنا ليها
1- موقع على النت ( فكرة اتعملت كذا مرة وفاشلت بس لو اتعملت بطريقة غير ربحية وبدعاية جيدة ممكن تلاقى اقبال )
2- كل واحد يعرف اتنين عاوزين يتجوزوا يعرفهم ببعض و ده نسبته ضعيفة انك تلاقى 2 مناسبين لبعض على الاقل تعليميا او اجتماعيا
3- الخطبة - الست اللى بنشوفها فى الافلام الابيض و اسود - و ده حل بطل من زمان و ملوش وجود و لو اتوجد هل هيحل المشكلة ولا لا
4- الزيارات الاجتماعية العائلية و برضه تقريبا النتيجة هتكون زى نقطة 2
و دى الحلول اللى وصلنا لها و فيه حل خامس اقترحوا احد الافراد و هو اننا نبعت لبلال فضل فكرة مبادرة يتبانها المصرى اليوم او الدستور و هتبقى زى موقع النت بس من خلال صفحات الجرايد - بس بما اننا مجتمعات شرقية الاقبال هيكون قليل لان الجرايد هتكون فى ايد كل بنى ادم عكس موقع النت مش هيدور عليه غير اللى عاوز يتجوز -
و مناقشتنا خلصت على كده .
لكن الحل اللى عجب معظمنا هو موقع نت مجانى ذو ادارة محترمة و يسبقه دعاية جيدة و يخدم قطع عريض من الناس مش واحد او اتنين بس الحل ده خارج مقدرتنا لانه عاوز تمويل ووقت وحتى لو قدرنا ننلم و نمول مين هيدير ؟؟؟؟
و انا حبيت اعرض الموضوع معاكم لان المنتدى فيه فئات عمرية متفوتة و بالتالى ممكن يكون عندكم افكار اسهل و تحقق المطلوب و هو خدمة ناس كتيير سواء نعرفها او لا
و فى انتظار اراءكم و مناقشتكم
المفضلات