عندي كشف لجنة عليا السبت دة و مش عارف هعمل اية ؟؟؟؟

**dr_abooody** · 03-03-2010 05:32 PM

السلام عليكم

انا خلاص داخل على المرحلة الاخيرة من الجيش و هي اللجنة العليا
و احنا عشان اطباء كلنا اترشحنا ظباط احتياط
المشكلة هي اني عندي السكر و باخد انسولين فمش عارف يوميها اروح و انا مش واخد الانسولين عشان السكر يبقى عالي بس المشكلة اليوم طويل و ممكن اتعب

فيا ريت لو حد عندة فكرة عن اية اللي هيحصل يقولي و هل هنتحجز هناك في الحلمية ؟

**M.Osman** · 03-03-2010 07:18 PM

هو دا أول يوم ليك في حلمية الزيتون ؟؟ يعني اول يوم كشف طبي هناك ؟

لأن اللجنة الطبية العليا بتكون بعد الكشف .. بعد ما تتعرضوا على الدكاترة و تقول للدكتور المختص اللي هيمر عليك انك عندك كذا...
ساعتها هيحولك على اللجنة العليا و دي على حسب التخصص برضه .. افتكر انا كنت عصبية بعتوني مستشفى كوبري القبة العسكري (تاني يوم) .. في تخصصات تانية اتعرضت هناك تاني يوم برضه ...

الموضوع كله خلص بعد 4 ايام ...
إعمل حسابك انك ممكن تتأخر بالليل و خد معاك موبيلك عادي بس خليه مقفول لحد ما تطلع خارج المنطقة

و رأيي انك ما تبطلش الانسولين ولا حاجة .. خد معاك ورقك و روشتتاتك و الانسولين نفسه لو نفع ....

**wahba87** · 04-03-2010 12:52 AM

انا هحكيلك اليوم مشى معايا ازاى زى ما انا فاكر

مبدئيا خد معاك 3 صور شخصية او اكتر بالاضافة لكل ورقك عشان انا يومها مكانش معايا صور كفاية و كانت مشكلة

اول ما بتدخل بتقولهم انك مؤهل عالى بيقولك تمشى ازاى , بتروح لعسكرى كده يبص عليك و يشوفك حالق دقنك ولا لأ , بعد كده بيسألك انت تبع تجنيد ايه , و بيديك ورقتين يدبسلك صورتين عليهم

و بتدخل ساحة كده , اول ما بتدخل فى عسكرى بيقيس الوزن و الطول و يكتبهملك فى الورق , بعد كده بتقعد تكتب البيانات فى الورق اللى خدته ده (بيانات كتيييييييييييير عن اى حاجة تتخيلها)

بعد كده بيقولولكوا اقلعوا الهدوم و انتم قاعدين ,و الدكاترة هم اللى بيعدوا عليكم - الموضوع طبعا بياخد وقت - , و المشكلة اللى عندك بتقولها للدكتور المناسب , و يستحسن يكون معاك روشتات و حاجات تثبت مرضك , و الافضل انها تكون من مستشفى حكومى و عليها ختم النسر

كل دكتور بيكتبلك ملاحظاته فى الورقة اللى معاك , على فكرة بتكشف كل التخصصات مش بس اللى مكتوبلك فيه لجنة عليا

بعد ما مجموعتك تخلص كشف , بتلبسوا الهدوم ,و بتروحوا تقفوا طابور عند دكتور تانى , بيبص عليك بصة سريعة و يسألك عندك اى مشكلة فى نتائج الكشف اللى مكتوبالك ؟ , و يمضيلك و تدخل مكان تانى

بتروح لعسكرى تديلوا ال 110 جند , بيسجل بياناتك على الكمبيوتر و عسكرى تانى بيقولك تقعد فين

حسب دورك , بتدخلوا 10 مع بعض على حجرة كشف الهيئة , رتب كتير قدامك كده , و بتتسئلوا واحد واحد , السؤال الاساسى "اسمك و طولك ووزنك ؟" , لو عجبته بيقولك اتقدم و يتكلم معاك شوية و ترغب او لا ترغب والحاجات دى

بعد كده بتخرج تاخد ختم على ال 110 جند و تروح

على فكرة الموضوع بياخد وقت (انت و نصيبك) , احنا قعدنا اكتر من ساعة او ساعة و نصف نستنى دكتور العظام فقط !! , يعنى انصحك تاخد علاجك محدش يضمن الظروف

يا رب ماكونش نسيت حاجة , ربنا يوفقك ان شاء الله و تاخد اعفاء نهائى , و ميكونش ليك نصيب تدخل معايا دفعة 138 ضباط احتياط

انصحك تروح بدرى , انا روحت 8 و كنت حاسس انى متأخر و كان المكان زحمة , و فى ناس راحوا 10 اتزعقلهم , يعنى روح على 7 عشان تخلص على طول

**Eng.Osama.Afifi** · 04-03-2010 02:51 AM

عندك سكر وعديت من الكشف الطبي الأولاني ؟
ربنا يكرمك إن شاء الله وتطلع في اللجنة العليا ... روح وخد معاك كل حاجة تثبت إنك مريض.

أنا أبن عمي كان زيك كدة وطلع من الجيش بسبب السكر

ربنا يكرمك ويوفقك وتطلع منه على خير

أبقى طمنى بقى

**dr_abooody** · 05-03-2010 04:31 PM

الله يطمنكم يا جماعة
ربنا يستر بكرة
و يا ريت لو حد عندة اضافات يبقى جزاه الله خيراا

**I.S.L.A.M** · 05-03-2010 04:53 PM

ياباشا مش تقلل خالص مفيش ضابط احتياط خالص بيدخل وهو عنده اى امراض من النوع دع عشان الكليه بتبقى صعبة جدا وهم بيبقو عاملين حساب المواضيع دى هم مش عايزين يجيبو لنفسهم مصيبة وطمن نفسك انت كده هتخرج من الجيش خالص الموضوع بس هياخد وقت مش اكتر