الموضوع: استهلاك بنزين لانسر 1300 بومة 2008 مانيوال خليجى

السلام عليكم يا رجال الميتسوبيشى العظام

انا قررت اعمل قياس دقيق لإستهلاك البنزين فى العربية اللانسر اللى معايا.. 1300 سى سى مانيوال خليجى موديل 2008 روحت مليت تانك البنزين لآخره.. لغاية ما مسدس البنزين فصل من الراجل كذا مرة... انا حطيت بنزين 92 من بنزينة فى روكسى نضيفة جدا.. و بعد ما حطيت البنزين و حاسبت الراجل. شغلت العربية و روحت مصفر العداد بتاع الرحلات.. يعنى خليته على الزيرو .. و انطلقت بالعربية.. و سوقت العربية فى ظروف مختلفة .. منها مشاوير لمدينة 6 اكتوبر و التجمع الخامس و الشروق على سرعات 90 و 100 و 120 و منها مشاوير فى اماكن زحمة على الاول و التانى لأكثر من 4 ساعات... المهم فى الاخر مؤشر البنزين بقى فى منتصف الربع الاخير من المقياس و العربية عملت 490 كيلو بالتمام و الكمال .. و لسه فاضل حوالى نص الربع من التانك... ده غير طبعا البنزين الإحتياطى اللى انا سمعت انه حوالى 10 لتر تقريبا ...
ايه رايكو يا جماعة فى الحكاية دى ؟؟؟؟ مع العلم ان انا بعمل الصيانة الدورية فى التوكيل و العربية بتاعتى عاملة 17 الف كيلو من ساعة ما جيبتها

المشاركة الأصلية كتبت بواسطة kok3

لا يقارن استهلاك لانسر 1300 باى عربيه تانيه استهلاك بنزين يكاد يكون معدوم انا كان معايا اوبل فكترا قبل كدا ولما غيرت وجبت لانسر 1300 مانيوال مكنتش مصدق نفسى من استهلاك البنزين الذى يكاد لا يذكر بالنسبه للاوبل حلوفه البنزين انا كنت بحط 20 لتر فى الاوبل يدوب العداد بيتحرك لفوق شرطه ولا حاجه وامشى شويه صغيرين خالص الاقى نزل تانى التنك كان مساحته 60 لتر او اكتر شويه اما الانسر التنك اخره 40 فلما بحط صفيحه بلاقى العداد راح عند الاخر تقريبا وامشى قد ما امشى مبنزلش غير بالعافيه فرق رهيب بالنسبالى فى التوفير فى البنزين وخصوصا انا بمشى كتير جدا بالعربيه اول ما جبت الانسر اثبتتلى فعلا وعمليا ان اختيارى كان ناجح مليون الميه والجماعه اللى بيتكلمو عن الشد والفحت والردم والكلام دا مش فى مصر يا جماعه الكلام دا شد ايه اللى بترغو فيه بمكنه 1500 و 1600 برا 3000 سى سى وانت طالع دا بقى المكن اللى تشد بيه مش لعب العيال اللى هنا فى مصر + ان اصلا الطرق الزباله اللى هنا فى مصر متشيلش شده واحده تقطم ام العربيه مع اول مطب ودا اللى خلا اختيارى يكون 1300 سى سى بعد الاوبل شارهه استهلاك البنزين البلد دى عايزه الخيارات العمليه اللى تنجزك وفى نفس الوقت توفرلك وتحافظ على جيب حضرتك دا انا ليا ذكريات فى قطع الغيار بتاعه الاوبل ربنا ما يورى حد والله انا فاكر اخر اسبوع قبل ما ابيعها كنت بصرف عليها فى اخر اسبوع اكتر من 6000 جنيه اسكتره وطرمبه البور وحوارات تودى فى داهيه لا لا بجد الحمد لله انا اخترت اللانسر مع انى ايام ما كنت بغير عربيتى كنت بفكر اشترى هيونداى كوبيه كانت عجبانى قوى العربيه دى بس لما سالت عليها اتضح ان مصر دى ليها نظام خاص فى كل حاجه عربيه هتشتريها ومتفكرش تبيعها علشان محدش هيشتريها منك من الاخر كانك بتدفع فلوسك فى الهوى فى عربيه مش هتاخد منها غير شكل بس على الفاضى فكان خيار الانسر بالنسبالى انسب خيار وبصراحه العربيه معايا بقالها سنتين دلوقتى مريحانى اخر راحه وحلفت بعدها لن اخرج عن شركه لانسر ما حييت لما اغير اجيب الاعلى فى نفس الشركه لن اخرج عنها ابدا طول ما انا فى مصر :)

عندك حق وكلامك مظبوط متين الميه
انا معايا 1300 مانيوال 2009
استهلاكها للبنزين يكاد يكون معدوم فعلا..بجد استهلاك خرافى مفيش احسن من كده
ولا طالبة شد ولا فحت ولا ردم لان الطرق فى مصر مش مساعدة زى محضرتك قولت وكمان الشد اخرته وحشة
ده وانا بفكر فى ال 1300 سمعت عليها كلام وشتايم وانتقادات من ناحية السحب..بجد حسسونى انى هركب عربية كارو!!!! رغم ان اللانسر طول عمرها 1300 بس بعد مال 1600 نزلت والناس لقتها بتجرى عن ال 1300 بقت ال 1300 ياااى :)
فعلا فى مصر الفتايين كتير ... ربنا يرحمنا منهم