صيانة ال 5000 فى منصور التجمع الخامس
النهاردة رحت عملت صيانة ال 5000 كم فى منصور التجمع الخامس و التفاصيل فى النقاط التالية:
- حجزت بالتليفون من 3 ايام و اخدت ميعاد الساعة 10:45
- اتلخبطت و رحت الساعة 09:45 بس الناس كانوا فى منتهى الزوق و العربية دخلت بعد حوالى ربع ساعة بس.
- مدير المركز م/ محمود حنفى استلم منى العربية و سألنى عن ملاحظاتى و مكنش عندى غير ملحوظة عن صوت تكتكة بتيجى من تحت العربية بعد لما اعمل مشوار و ابطل الموتور.
- سألنى هستخدم زيت 5000 ولا 10000، اخترت ال 10000، هما بيستخدموا زيوت شل.
- بعد كشف قرروا تغيير الجهاز بتاع بخار البنزين اللى ناحية العجلة الخلفية يمين علشان صوت التكتكة منها.
- غيروا الزيت و الفلتر و نضفوا فلتر الهواء و البنزين و كشفوا على كل اجزاء العربية و نضفوا التيل و الطنابير بالهوا.
- الصيانة مجانا، دفعت 268 زيت و فلتر.
- الصيانة اخدت ساعة.
- المعاملة هناك محترمة جدا و شغلهم نضيف.
- احسن حاجة عجبتنى انى كنت جنب العربية، و مسموح تقف على ايد الفنيين و قالولى خليك على راحتك فى اى سؤال او ملحوظة و هما شغالين بقوا يقولولى على تفاصيل اللى بيعملوه و الاحسن ايه للعربية و انا كالعادة عشت فى دور اللى مش فاهم حاجة علشان اشوف هيقولوا ايه، بس كلامهم طلع موضوعى و مفيش فتى.
- المركز فى بنزينة شل فى شارع ال 90 بالتجمع الخامس و فى البنزينة فى مكدونالدز و سيلنترو غير الماركت بتاع البنزينة، يعنى الواحد هيلاقى اى حاجة ممكن يحتاجها.
انا بصراحة كنت متخوف جدا من منصور بعد اللى قرأته و سمعته، بس ربنا يسهل و يكمل على كده.
صيانة 5000 وصوت موتور اوبترا 2010
ان شاء الله عز وجل يوم السبت القادم حاجز عند منصور التجمع الخامس اول صيانه للعربيه 5000ك
العربيه اوبترا 2010 عامله حتي الان 4500ك وانا فهمت من مشاركه الاخوه الافاضل ايه اللي سوف يتم في صيانة 5000ك ......بس انا كان ليه استفسار ارجو منكم جميعا افادتي فيه قبل ذهابي للصيانه كما قلت من قبل العربيه 2010 اتوماتيك...... لاحظت من فتره رعشه بسيطه جدا في موتور العربيه وبالذات في الصباح هيه مش واضحه ولكن انا حسيت بيها لدرجه ان كرسي القياده تحتيا شعرت بيه بيترعش تحتيا...فعلا الرعشه مش عاليه ولكن انا حاسس بيها ....او ممكن تقول ان( رتم)
صوت الموتور مش واحد مره يعلي ومره ينزل ....لكن ارجع واقول تاني انه مش واضح ...
هل ممكن يكون السبب اني قربت علي 5000 ك ده تاثير زيت الموتور عاوز يتغير ولا ايه ...؟
انا حبيت اخد رايكم قبل ما اروح للصيانه علشان اكون عارف باتكلم علي ايه مع المهندس اللي في الصيانه.
وكذلك في شئ اخر حسيت في الفتيس لما اجي اغير من p الي D احس برعشه في الفتيس بس الكلام ده في الصباح قبل مااروح الشغل وبعد كده الرعشه دي بتروح(علي فكره انا باسخن العربيه كويس علي الاقل 5 دقائق قيل ما اتحرك بالعربيه) انا طولت عليكم ......ارجوا افادتي وجزاكم الله خير