الموضوع: تجربتى مع fuel system cleaner

الطريقه الصح لاستخدام منظف الرشاشات او منظف نظام الوقود انك و انت في المحطه تحطه على نص التنك و تكمل تفويل النص التاني. غلط تحطه على التانك و هوه فاضي و غلط تحطه على كمية بنزين قليله و تمشي بيه لانه كده هيكون مركز جدا و ممكن يضر الاجزاء البلاستيكيه في دورة البنزين.

كمان المفروض متستعملوش كتير و ده بيكون مكتوب على العلبه (كل 25000 كم مثلا) بس مش فاكر الرقم بالتحديد.
لو العربيه اصلا مفيهاش مشكله مش هتحس بفرق بعد استخدامه.

المشاركة الأصلية كتبت بواسطة horsepower

السلام عليكم,

إن شاء الله مفيش ضرر من إضافة سائل التنظيف على تنك شبه فاضي ويتم تفويل التنك عليه ... للأسباب الآتية:

1. بدون الدخول في تفاصيل الخامات المصنع منها تنك البنزين وأجزاء نظام الحقن ... أحب أوضح إن سائل تنظيف نظام الحقن ليس له أي تأثير على المواد البلاستيكية لأنه بيشتغل على إزالة الصدأ عن الأجزاء المعدنية والمواد العضوية المتراكمة فقط ... عبوة سائل التنظيف أساسا من البلاستيك.
2. كمية عبوة سائل التنظيف كلها 200 ملل أول عن آخر ... طبعا مش معنى كدة نحطها على 2 ليتر بنزين ... لو حطيتها على 20 ليتر التركيز طبعا هيكون عالي بس ملوش أي ضرر ولا هينظف زيادة (لأنه زي ما قلت بيشتغل لإزالة الصدأ فقط) ... طبعا أفضل نتيجة يتم الحصول عليها هي أفضل نسبة تركيز لأكبر كمية وقود لأن التنظيف هيكون أفضل لما يمر 50 ليتر بنزين بالمنظف عن لو مر 20 ليتر بالمنظف.
3. إن شاء الله برضه مفيش لا ضرر ولا إستفادة من وضع سائل التنظيف على فترات قصيرة ... إللي كان مكتوب على المنتج إللي إستعملته إن يتم تكرار التنظيف كل 40000 كم بإستخدام نفس المنتج ... و ده مش معناه إني لو إستعملته كل 10000 مثلا غلط .. لأ ... بس مفيش نتيجة ملحوظة هتحصل ... ولو إني أفضل إستخدامه كل 20000 مثلا نظرا لسوء مستوى الوقود في مصر و تأكيد أصدقاء إن البنزين عندنا فيه نسبة مياه وده بيسبب صدأ أسرع من الطبيعي.
4. لو نظام الحقن مفهوش ترسبات, أو عليه ترسبات تصل للإنسداد الكلي السائل ده مش هيعمل نتيجة لأنه لازم يمر من الرشاشات علشان ينظفها ... لو رشاش مسدود تماما مش هيعمل فيه حاجة.

1- على فكره الدور الرئيسي لسائل تنظيف الرشاشات مش ازالة الصدأ و لكن ازالة ترسبات صمغيه بتتكون مع الوقت على الرشاشات حتى لو البنزين كويس. كون علبة السائل من البلاستيك ده مش دليل على انه لا ضرر من السائل المركز على البلاستيك لان النوضوع ده يعتمد على خواص البلاستيك نفسه.
2- مش كل ما يكن التركيز اعلى يبقى التنظيف احسن. الشركه المصنعه بتكتب على العلبه الحد الادنى و الاقصى اللي تتحط عليه العلبه. لو كمية البنزين قلت عن الحد الادنى يبقى غلط لان التركيز عالي.. و لو الكميه زادت التركيز هيقل و مش هينضف كويس.
3- اذا كان الصانع بيقول نستخدم المنتج كل 40000 كم نستخدمه احنا كل 10000 و نقول احسن؟ مهو لو الاحسن يستخدم على فترات اقرب كان صانع المنظف قال لانه من مصلحته يبيع.. بس هوه مش عايز يتحمل مسؤولية الضرر اللي ممكن يحصل من الاستعمال الكثيف.
4- كلامك صح.

المشاركة الأصلية كتبت بواسطة horsepower

السلام عليكم,
1. حضرتك مصر إنك تأكد معلومة إن سائل تنظيف نظام الحقن لا يزيل الصدأ ... معليش ده مش صح أبدا ... أرجوك إقرأ في المواضيع الآتيه:
best fuel system cleaner - lovetoknow best
red line fuel system cleaner
و لو دورت على google هتلاقي كل الشركات بتقول كدة.
يبقى سائل التنظيف بيزيل الصدأ و الترسبات العضوية زي ما قلت لحضرتك.
2. حضرتك كاتب نفس معنى الكلام إللي أنا كاتبه.
3. موضوع إستخدام السائل ده كل قد إيه ... مثال صغير: أنا بستخدم زيت موبيل 1 إللي المفروض بيتغير كل 10000 كم و رغم كدة أنا بغيره كل 7500 إلى 8000 كم ... أعتقد 80% من الناس بتعمل كدة رغم إن الزيت ده المفروض إنه زي المستورد مفيش فرق بس الموتور بيكون أنعم وصوته بيهدأ بمجرد تغير الزيت ... و برضه ممكن تسيبه لحد 10000 زي ما الشركة بتقول إن شاء الله مش هيحصل مشاكل بس الأداء بيفرق بين موتور عليه زيت جديد و موتور عليه زيت مستهلك 8000 كم ... صح!
حضرتك أنا ضد إن تكون هناك قاعدة ثابتة لفترات تغيير أي شيء لأن مفيش حد زي التاني, واحد بيستخدم العربية كل يوم وواحد بيحرق على الموتور كتير وواحد بيمشي مسافات طويلة وواحد بيمشي مشاوير صغيرة بس كتيرة كل يوم (الموتور بيسخن و يبرد عدد مرات أكتر من إللي بيسافر مثلا) ... إلخ
كل واحد دكتور عربيته عارف بيستخدمها إزاي والمفروض يعمل إيه لو عايز يحافظ عليها.
و شكرا لك ... وأرجو أن تتقبل كلامي بصدر رحب
(أحمد سامي)

انا متقبل الحوار مع حضرتك جدا و مستمتع بيه كمان و اسمحلي اوضح:

١- انا مقولتش ان المنظف مش بيشيل الصدأ... بس قولت ان دوره الاساسي مش ازالة الصدأ و لكن الترسبات الصمغيه.
كمان اللينكين اللي حضرتك حاططهم اول واحد مذكرش حاجه عن الصدأ و لكن ذكر الترسبات اللي قصدي عليها. و على فكره منتج من اللي في اللينك اسمه gumout و اظن الاسم يتحدث عن نفسه هوه بيشيل ايه.
اللينك التاني ذكر الصدأ فعلا من ضمن خواص المنظف (و ده انا مش مختلف معاك فيه اصلا و لكن بقول انه مش الدور الاساسي للمنظف).
٢- لا مش بنقول نفس الكلام.... الاختلاف اني بقول لو حطينا المنظف على كمية بنزين قليله (قليله دي اكبر من ٢ لتر بردو) هيكون مضر في حضرتك بتقول ان حتى لو التركيز عالي مش هينضف زياده بس مش هيضر.
٣- مثال الزيت مينفعش هنا خالص... فعلا الزيت لو غيرته بدري مش هيضر و ده لانه تركيزه ملناش تحكم فيه... يعني لو غيرته بدري من باب الاحتياط ممكن ميكونش مفيد... بس بالتأكيد مش هيضر. ده غير ان الزيت اصلا ليه مواصفات من مصنع السياره و احنا بنتلزم بيها. المنتج اللي بنتكلم عليه اضافه تضاف للوقود و ليست من السوائل الضروريه لتشغيل السياره زي الزيت. بل بالعكس مصنعي سيارات كتير بيمنعوا في الكتالوج وضع اي اضافات على الوقود و علشان كده لازم لما نستعمل الحاجات دي نستعملها بحرص شديد.

شكرا على الحوار الممتع

أنت سرفيست ياباشا ولا لسه؟ وطلما بتعدى الـ 120 يبقى البنزين هيطير بسرعة يعنى جرب كدة تمشى في يوم على سرعة 100 وأحسب أستهلاك البنزين هتلقيها فرقت كثير، وأجهزة ايه اللى تقصدها ممكن توضحلنا شوية هيه عبارة عن اية؟ واكشف على ضغط هوا الكاوتش كل فترة ولو عندك اى حاجه في شنطة العربية ملهاش لزمة شيلها

المشاركة الأصلية كتبت بواسطة arabmarket

يا جماعه بعد ما حطيت الFUEL CLEANER العربيه بتاكل بنزين بشراااااااااهه غريبه مكنتش كده اول ما جبتها !!

horse power بيقول ان ده طبيعى وان ده معناه انه فهلا نضف كويس ... هو حاجه كويسه انى الرشاشات تكون نضفت ويكون أثر تأثير كويس لكن مش كويس على جيبى

حد سمع عن الاجهزه الصغيره الى بتبحط فى العربيه عشن توفير البنزين وهل فعلا ليها مفعول وملهاش ضرر على العربيه ولا ؟؟

انا مشوارى اليومى كبير run away والعربيه مغريه فى الجرى والجرى بيسحب بنزين طبعا

اخوكم
هيثم سلطان

----------------------------------------
بالنسبة للأجهزة اللي بتقلل استهلاك البنزين اعتقد الوحيد المتاح هنا في مصر هوا ان ك تعمل Chip تتركب في Control Unit بتاع عربيتك بس دة هيخنق العربية شوية

و الحل التاني انك تنقل علي 2.5 , 3 و تحسس علي دواسة البنزين