الموضوع: جوله وشراء شويه اكسسوارات

المشاركة الأصلية كتبت بواسطة mizamega

معلش :u_thin1[1]:هوة بيتوصل بالسمعات العربية ازاي؟؟؟؟؟

بص ياباشا

عشان توصله بسماعات العربيه انت الاول بتجيب قائمه fm وبعدين بتختار الموجه اللى عايز تظبط عليها الراديو مثلا 100.6 وتحتها فى مربع بتعمل عليه علامه صح ده عشان يحرج الصوت من سماعات العربيه وبعد كده اخرج من قائمه ال fm واختار اى قائمه انت عايزها لو عايز تشغل افلام او ال gps حتلاقى الصوت بيخرج من سماعات العربيه مش من الجهاز نفسه

طيب حضرتك لو مش عايز تقول انت جبيتو منين ممكن تبعتلي علي الخاص

المشاركة الأصلية كتبت بواسطة nour3alanour

أولا ألف مبروك علي الحاجات الحلوة اللي حضرتك اشتريتها
ثانيا هو الكونسول اللي بين الكرسيين مين اللي بيركبه؟ سروجي مثلا؟
وهل بيضايق عند استخدام فرامل اليد؟
وهستأذنك في صورة ليه لو أمكن توضح شكله وأماكن حامل الأكواب اللي فيه علشان انا رايحة التوفيقية ان شاء الله آخر الأسبوع ده وعايزة أجيبه باذن الله

الله يبارك فيكى يا نور وشكرا على كلامك الجميل

بصى يانور بالنسبه للكونسول بيكون فى علبه فيها الكونسول نفسه ومعاه قطعين صاج او حديد زى القواعد كده ودول اللى بيتثبت فيهم الكونسول من فوق ومن الناحيه التانيه من تحت بتتثبت فى العربيه وكيس فيه المسامير اللى بتحتاجيها فى التثبيت

انا مركبه بس هو لسه مش ثابت اقصد انه يادوب محطوط بين الكرسيين وبالنسبه للتثبيت ده مش صعب وانتى ممكن تعمليه بنفسك بس المشكله انه بيتثبت فى الفيبر مش الصاج مش عارف فاهمه قصدى ولا لا
ح احاول اشرحلك

انتى عارفه المكان اللى فيه الفتيس؟ ده المقروض انه بيكون زى علبه فيبر بتختلف شكلها من عربيه للتانيه وفى عربيات ممكن ماتكونش موجوده فيها المهم العلبه دى بتكون بتبتدى من اول تابلو العربيه وبتمشى جنب الكرسيين ودى ساعات بتكون طويله لحد اخر الكرسيين او قصيره لحد مكان الفتيس كده

الكونسول بيتثبت فى العلبه الفيبر دى ببساطه بمسامير بس المشكله عندى ان العلبه دى عندى قصيره فمفيش مكان يتثبت فيه الكونسول بس ناس كتير قالولى ان السروجى بيظبط الموضوع ده

بس على فكره حتى وانا مش مثبته هو كويس مش مضايقنى كده

بالنسبه لفرامل اليد هو عندى مغطى نص دراع الفرامل بس اعتقد انه مش بيضايق فى استعملها انا مش عارف عشان انا عربيتى اوتوماتيك فا مش بستعمل فرامل اليد بس ح اجرب وارد عليكى بكره ان شاء الله

وبالنسبه للصور برضه اسمحيلى لحد بكره وانا ح اصوره بالتفصيل وانزل الصور

كمان انا لمبارح شفت نفس الكونسول فى الهرم فلو انتى نازله مخصوص التوفيقيه عشان الكونسول فممكن توفرى المشوار وتجبيه من الهرم لو انتى ساكنه قريب منه

لو كده قوليلى وانا اوصف لك المكان

يارب اكون قدرت افيدك

واى استفسار تانى انا تحت امرك

المشاركة الأصلية كتبت بواسطة mizamega

طيب حضرتك لو مش عايز تقول انت جبيتو منين ممكن تبعتلي علي الخاص

معلش انا ما اخدتش بالى من سؤالك عن المكان

انا جبته من محل فى الدقى فى شارع الدقى نفسه قبل كوبرى الدقى وانت رايح من ناحيه الجامعه قدام المدرسه الالمانيه تقريبا بس مش فاكر اسم المحل بالظبط

المشاركة الأصلية كتبت بواسطة nour3alanour

والله مش عارفة أشكر حضرتك ازا علي ردك الوافي
بجد ميرسي جدا ليك
أنا تقريبا فهمت قصد حضرتك بالنسبة لتثبيت الكونسول في الجزء ده بس كده ده معناه انهم بيخرموا في الجزء الفيبر ده علشان يثبتوه بالمسامير ولا ايه؟؟ هو ده اللي قالقني أوي بصراحة العربية لسة جديدة خالص ومش عايزة خريم ولعب فيها!
وعلي فكرة التوفيقية قريبة جدا مني لاني ساكنة في وسط البلد أصلا عند ميدان التحرير فيادوبك مسافة قريبة أوي
وان شاء الله هستني صور الكونسول علشان يبقي عنديفكرة أوضح عنه وعلي مهللك متتعبش نفسك وبعتذر لو بتعبك معايا
وألف شكر لحضرتك مرة تانية

تشكرينى على ايه بس انا معملتش حاجه
لا شكر على واجب يا نور واحنا كلنا هنا عشان لو نقدر نقدم ولو حاجه بسيطه للاعضاء وبجد شكرا على ذوقك وكلامك الجميل

بصى بقى بالنسبه لجزء التخريم فى الفايبر طبعا ح يكون فيه على الاقل خرم واحد من كل ناحيه عشان يتثبت فيه بس زى ماقولتلك انا حاطه من غير تثبيت ومش مضايقنى فى حاجه زى ما ح تشوفيه فى الصور
انا حاولت اصوره من كذا زاويه عشان انا عارف ان البنات بيهتموا بكل التفاصيل فحاولت انى اصوره بصريقه تخليكى متخيله كل حاجه فيه

يالا نبتدى

دى صوره الكونسول وهومقفول


دى صورته وهو مفتوح


ده و حامل الاكواب الامامى مفتوح




ودى وحامل الاكواب الامامى فيه كوبايه


ودول صورتين لحامل الكوبيات الخلفى (2 كوب)



ودول برضه 3 صور وكل الكونسول مفتوح
شايف فى الصوره الاولى دى مبين فيها القاعده اللى بيتثبت عليها الكونسول






ودى صوره لشكل القواعد انتى شايفه فيهم 3 خروم فى كل حامل دول اللى بيتثبت فيهم المسامير بس ممكن تستعملى مسمار واحد بس من كل ناحيه لو مش عايزه خروم كتير فى الفايبر



ودى صوره الكونسول وهو راكب فى العربيه عندى وزى ماقلت لك انا عندى مش مثبته بالمسامير
وزى ماانتى شايفه انه مظبوط مش محتاج التثبيت
كمان اعتقد انه مبين فلاامل اليد عشان تعرفى اذا كان ممكن يضايقك فى الاستخدام ولا لا
انا جربت فرامل اليد عندى ومفيهاش اى مشكله اقصد انه مش مضايق فى استعمال الفرامل خالص


يارب اكون قدرت اوضح لك اللى انتى عايزه وبرضه لو فى اى حاجه مش واضحه وعايزه تعرفيها قوليلى وانا تحت امرك

المشاركة الأصلية كتبت بواسطة magyver

الف مبروك علي العربية وعلي الاكسسوارات

الله يبارك فيك وشكرا لك