التقرير المفصل عن الجميلة ساجا الاخت الصغرى لكلا من ال جين 2 و البرسونا

بسم الله الرحمن الرحيم

اعرفكم باحب فى الاول نفسى
عمرو عبد الباقى
A_abdelbake@yahoo.com
موبيل 0126525352

و كنت من اوائل من اشتروا الساجا الاتوماتيك و امبارح كان اول مشوار ليها على الطريق فى المقابلة فى العين السخنة و طبعا بعد لما جربت العربية هاقول لكم على كل حاجة مميزات و عيوب

المميزات :

1. العربية بسم الله ما شاء الله فى العفشة حلوة جدا و نعمة قوى بجد و عالية عن الارض و انا كنت مركب فيها 3 ورا و انا و زميل ليا و كانت زى الفل لو هبطت على الارض و لا حاجة و قصدت اطلع بيها مطب عشان اشوفها تتحك من تحت و لا لا و لاقيتها تمام
2. العربية ثباتها عالى جدا و ممكن تشالوا الناس اللى كانت فى المقابلة لان حبيبتى عربيتى كانت معايا و الله بدون مبالغة العربية كانت 150 و 140 فى الملفات و لا اتحركت من الارض مع العلم انى كنت لوحدى يعنى العربية مش محملة و مع العلم ان العربية 900 كيلو متر بس يعنى الماكنة لسة مافتحتش
3. التجميع بجد العربية تجميعها فى الاتوماتيك معقول جدا جدا احسن من الفيرنا عن تجربة
4. العربية من الداخل واسعة جدا و شكلها من الخارج انسيابية قوى
5. الدريكسون و الباور حلو مش خفيف قوى فيقلق لا معقول جدا جدا
6. الفتيس بسم الله ماشاء الله حلو
7. السنسور بارك تمام التمام و مفيد جدا
8. الكاسيت محترم و السماعات صوتها عالى و نقية ( الكاسيت راديو و اوديو فقط انا بفضل دة لان ال mp3 مشاكلة كتير جدا بيقطع و كلام من ده )
9. الصالون مريح جدا جدا و الكرسى الامامى بيعلى و يوطى القاعده بتاعته
10. الشنطة واسعه و حلوة نفس حجم الانوس
11. خامات الابواب و التابلوة و الله بجد عالية جدا و الله و اللى عايز يشوف عربيتى و يقارن بين خامات الاسبرانزا و الصينى و الله احلى و اقيم الف مرة
12. العدادات انسيابية و جميلة جدا
13. الصاج خامته كويسة زية زى صاج اى عربية 6 ملى و على فكرة كل العربيات الموجوده حاليا اغلبها نفس الصاج
14. وزن العربية بسم الله ما شاء الله كويس و طبعا عشان الثبات و انا حكيت ليكوا علية
15. العربية مش بتسخن ابدا ابدا اكبر حاجة النص
16. التكييف بسم الله تمام بس عشان الناس تبقى عارفة لما بتشغل التكيف طبعا سحب العربية الاتوماتيك بيقل اكيد و البنزيين حرقة اعلى اما الموانيال فى السحب بيقل بنسبة قليلة جدا
17. طبعا الماكنة كام برو و الكل عارف التقنية بتاعت الكام برو عاملة اية فى الشد و طبعا نفس الماكنة دى موجودة فى الجين 2 بس 1600 و امبارح الجين كانت مقفلة 180 كيلوا فى الساعه و الناس هاترد و تاكد كلامى و اسالو ايمن و هيثم و عمرو ابو ميم
18. سعر العربية و لا فى الاحلام بالنسبة لامكانيتها و بمقارنة صغيرة قوى هاتعرفوا الفرق الاسبرانزا 516 سعرها 69 الف جنية صينى و مانيوال و 1600 و بالطبع الكل عارف ان مافيش ثبات و لا اى نوع من انواع الامان و الكل طبعا عارف الثبات فى الاسبرانزا عامل اية و التانية الفيرنا و ربنا مايوقعكوا فيها ابدا و الثالثة اللى من وجهة نظرى الشخصية مش حلوة اللانوس و الله كانت معاي و طلعت عينى و الله العظيم و لا ثبات و لا نيلة و لو كنت اجيب ال 120 كنت بخاف منها

دى بقى شوية صور للعربية و كل تفصيلة ليها

http://images.paultan.org/images/Pro...ton_Saga_1.jpg

http://images.paultan.org/images/Pro...ton_Saga_2.jpg

http://images.paultan.org/images/Pro...ga_4_Large.jpg

http://images.paultan.org/images/Pro...ga_5_Large.jpg
http://images.paultan.org/images/Pro...oweroutlet.jpg
http://images.paultan.org/images/Pro...ton_Saga_7.jpg
http://images.paultan.org/images/Pro...ton_Saga_8.jpg

http://images.paultan.org/images/Pro...on_Saga_11.jpg

http://images.paultan.org/images/Pro...a_23_Large.jpg

http://images.paultan.org/images/Pro...on_Saga_15.jpg

http://images.paultan.org/images/Pro...on_Saga_18.jpg

http://images.paultan.org/images/Pro...a_21_Large.jpg


http://images.paultan.org/images/Pro...on_Saga_22.jpg

http://images.paultan.org/images/Pro...on_Saga_28.jpg

http://images.paultan.org/images/Pro...on_Saga_32.jpg


http://images.paultan.org/images/Pro...on_Saga_35.jpg

ودى بقى زى حبيبتى طبق الاصل مع اختلاف الدركسيون مش كده لا فى الناحية التانية
http://images.paultan.org/images/Pro...on_Saga_39.jpg
و دى بقى صورة تست كراش و للاسف مافيش فيديو و اعتقد انه بالمنظر ده تاخد على الاقل 3 نجوم و الله اعلم

http://images.paultan.org/images/Pro...on_Saga_34.jpg

طيب نيجى للعيوب و بعض الحلول

1. مادة الدهان طبقة خفيفة شوية و بالتالى اى تجريح بيبقى مشكلة ( انا واحد حك العربية و ساب اللون بتاعه على عربيتى روحت اشتريت من التوفيقية علبة بولش امريكى و الله شال اللون و لا كانة كان موجود و البلوش اسمة Rubbing Compound 07 و دى صورتة بس العلبة خضراء و تمنة 25 جنية

http://ecx.images-amazon.com/images/...500_AA280_.jpg

2- يوجد صوت تزيقة شوية ادام و لما اتصلت بالتوكيل عشان الصيانة قالوا مافيش مشكلة هاتتعمل عادى تربيط عفشة و ان شاء الله لما اروح صيانة الالف هابقى اقول لكم اية اللى حصل 3- العربية استهلاكها فى البنزيين عالى شوية و لما برضوا تصلت بالمهندس امر الكوافى قالى ان ده عادى جدا لان الماكنة لسة مافتحتش و انها فى صيانة الالف هاتتظبط و ان شاء الله فى صيانة الخمس الاف هاتبقى المعدل الطبيعى او هاتوصل للمعدل الطبيعى فى استهلاك البنزيين 4- اهم حاجة خلو بالكو من المفتاح بتاع العربية و الريموت و خلى بالك كويس فى حالة تغيير البطارية لان فية حاجة اسمها الامبوليزر و ده عشان ماحدش يعمل مفتاح على العربية و يسرقها لان اى مفتاح مصطنع مش هايدور العربية 5- المدى بتاع الريموت ضعيف شوية و طبعا بعد شوية بحث لاقيت فيديو للمشكلة دى ممكن نشوفة و انا ان شاء الله هاحاول اجربة و اشوف

اضغط هنا لمشاهدة الفيديو

طيب بالنسبة للى تعاقد على العربية و عايز يعرف هايستلم اية

1- اولا قبل التعاقد اتصل بايمن عشان يعمل لك خصم كويس للاسف انا ما كنتش اعرف الموضوع ده فاتعمل لى خصم يعنى كويس
2- انت بتستلم العربية المفروض بعد شهر و لكن بيكلموك فى خلال اسبوع الى اسبوعين
3- بتستلم العربية و معاها شنطة العدة ( الكوريك و مفتاح العجل و القاطرة عبارة عن مسمار بيركب فى حالة شد العربية لا قدر الله و كمان مفك عادة و بيتقلب صليبة و اربع غطيان بتوع الجنوط العربية 4 جنط بس مش خمسة ) و كاتلوجات الكاسيت الكاسيت اوديو مش mp3 و طقم دواسات مافيش مثلث و لا طفاية سجاير و لا صباع ولاعه
4- و بعد اربع الى 5 ايام بتستلم الورق بتاعك اللى هو جواب المرو الموجه الى وحده المرور اللى انت تابع ليها ولازم تبقى عارف انت تبع مرور اية بالظبط و كمان صورة الافراج الجمركى بتاع العربية

طيب استلمت الورق هاتعمل بية اية اقولك انا بقى يا معلم الخطوات الصح عشان مش تتعب

1. تروح المرو بدرى الساعه 8.30 بالكتير هاتقف على شباك التامين الاجبارى تعمل التامين بالمده اللى انت عايزها
   
2. هاتكون الخزنة فتحت تروح تجيب ورق ترخيص اول مرة و فحص
   
3. و تنزل تانى تشترى طفاية و يختم لك الورقة بتاعت الطفاية
   
4. تشوف حد من العيال بتوع البصمة عشان يرفع البصمة الموتور و الشاسية ( خلى بالك بصمة الساجا بالنسبة للشاسية تحت الكرسى اليمين )
5. تروح للمهندس بتاع الفحص يفحص العربية و يمضيلك على الورق
   
6. تروح مكتب التصوير تصور البطاقة بتاعتك 3 صور و صورة من الورق اللى استلمتة من التوكيل صورة واحدة لانه هاياخد الاصل و انت الصورة خليها معاك و تشترى ملف و تطلب منه 2 ورقة استلام لوحات
   
7. تطلع للموظف بتاع الشباك هاستلم منك الورق و طبعا 10 جنية فتح دماغك بدل لما تقف لبكرة هايديك ورقة بالضريبة و عرفة انت عايز سنة و لا 3 سنوات و هايطلب منك ورق هاتدف فى الخزنة و ترجع لة تانى هايملى البيانات و يقول لك استنى شوية الورق هاياخد دورتة العادية و هاينادوا عليك يديولك الخصة و البطاقة و وورقة كمان تروح للشباك بتاع النمر هايديك كيس مسامير 4 مسمار و 4 غطاء بتوع النمرة و هايقولك استنى جمب العربية و فى عسكرى هاينزل يركبها لك ( حضر خمساية يا معلم عشان النمر )
8. العسكرى هايجي يركب لك النمر و مبروك عليك الساجا يا عسل و بقيت بروتوناوى لا و كمان ساجاوى

ملحوظة كبيرة
الضمان بقى 100 الف كم او 3 سنوات ايهما اقرب

للتعامل مع التوكيل يجب ان تقوم بالاتصال بالتوكيل عشان يحددوا ليك ميعاد


نصيحة لما تستلم العربية حط ورقة و قلم و اكتب كل ملاحظاتك على العربية عشان لما تروح صيانة الالف تبقى مش ناسى حاجة

نصيحة كمان اطلب الاستيكرز بتاع نايل موتورز لانك هايوفر ليك كتير لانك بتاخد خصم على الصيانات 10% و لو بحسبة بسيطة
الاستيكرز تمنة 20 جنية
صيانة الالف تمنها 172 جنية
يعنى ال 10 % 17 جنية
يبقى انت مش دفعت حاجة خالص و هاينفعك فى ال5000 و الصيانات اللى بعد كده ده غير الخصومات اللى بتتعمل من اماكن اخرى زى الكاوتش

اى استفسار انا موجود و رقمى فوق و انا تحت امركم و اتمنى ان الموضوع يكون عاجبكوا و اتمنى التثبيت لانى بجد تعبت قوى فى الموضوع ده و دى تانى مشاركة ليا

الله ينور عليك يا أستاذ عمرو
موضوع جميل جدا" ومميز
الف شكر عالتقرير الرائع وربنا يباركلك فيها عربيه ما شاء الله ممتاذه .

صورة عربيتى فى المقابلة

http://photos-b.ak.fbcdn.net/hphotos...3_445054_n.jpg

http://photos-a.ak.fbcdn.net/hphotos..._2539814_n.jpg

تقرير رائع يا استاذ عمرو وكنت منور واللة

شكرا يا ابو حميد و بجد و الله انت بنى ادم زى العسل و انا اتشرفت بمعرفتك انت و كل المجموعه بجد مجموعه حلوة جدا و ربنا يبارك فيكوا و يحرسكوا و يحميكوا انتو و عربياتكوا و على فكرة فى خبر حلو ان شاء الله قريب انا كنت فى التوفيقية و لاقيت محل مكتوب علية قطع غيار البروتون و دخلت و سالتة على شوية حاجات منها الزرار بتاع الزجاج بتاعك و قالى ان ان شاء الله الاسبوع الجاى حايدخل حاجات للويرا و الواجا و الجين 2 و انا هاتابعه ان شاء الله و اول لما الحاجة يجيبها هاعمل مشاركة باسعار قطع الغيار و اية المتوفر عنده كلة

شكرا يا استاذ عمرو على التقرير المفيد ده
وربنا يباركلك فيها يا باشا
ويديك خيرها ويكفيك شرها ان شاء الله
وانا شاهد عيان على ثبات العربيه فى منحنيات العين السخنه
وبجد عربيه محترمه جدا وينقصها الدعايه فقط

شكرا استالذ عمرو على التقرير والشرح الوافى وفعلا امبارح انا لاحظت مدى ثبات الساجا فى السرعات العالية واحنا راجعين ربنا يباركلك فيها واتشرفت جدا بممعرفة حضرتك وبقية الاعضاء المحترمين

الف الف مبرووووك ع الساجا وربنا يباركلك فيها

وشكرا ع التقرير يا باشا

تسلم الأيادى يا أ. عمرو على التقرير اللى زى الفل:S_thum1[1]:

ربنا يباركلك فيها ويحفظهالك من أى سوء

متنسلش تدبحلها أى حاجة وتطلعها لله :shyy:

وبجد والله إتشرفت بمعرفة حضرتك :satelite:

شكرا لكل الناس اللى عجبهم الموضوع و برضوا للى مش عاجبهم و انا اللى اتشرفت انى اكون معاكو بجد و الله حاجة تفرح انى لاقيت الحب ده بين الناس و سبحان الله شوفتوا العربيات بتعمل اية ربنا يدى كل المصريين و يكون معاهم بروتون عشان يبقوا بالحلاوة دى

ربنا يباركلك عمر باشا ويحميهالك ... :ask: عربيه جميله فعلا :verygood:
اهلا بيك :Y_hi_3[1]:
ربنا يوفق

عربيه اكثر تميزا واداء ربنا يباركلك فيها وتتهنى بيها يا استاذ عمر ان شاء الله ........

(ياريتني كنت معاكو)

:Y_hi_3[1]:
للاسف ظروف الشغل خلتني مجيش المقابلة وبصراحة كان نفسي اتعرف عليكو كلكو بس الوقت مااسعفنيش
ان شاء الله تتعوض في المقابلة اللي جاية وربنا يبركلكو

الف مبروك على الساجا و شكرا على التقرير الممتاز بتاعك و سعرها بصراحة تحفة بالنسبة للاوتو اللي بقى لابد منه دلوقتي للأسف =)

شكرا علي التقرير المميز دة انت جاوبت علي كل الاسئلة الي كنت عايز اسئلها
انا كنت مستني حد يعمل تقرير بالشكل دة عشان الواحد يطمن

:Ta_clap[1]::Ta_clap[1]::Ta_clap[1]::Ta_clap[1]:

الف مبروك يا باشا
ربنا يديك خيرها و يكفيك شرها
يا مفتري 150 و انت لسه بتلين انا بجيب 80 و انا بتقطع و خلاص هعيط
علي فكره انا كمان عربيتي سوداء بس مانيوال
وان شاء الله اشوفكوا المقابله الي جايه

واحنا كمان عايزين نشوفك

تقرير مفصل ورااائع وتسلم الأيادي والف مبروك

الف مبروك و مشكور على التقرير الجميل

اقتباس:

---

المشاركة الأصلية كتبت بواسطة د.محمود صلاح

تقرير مفصل ورااائع وتسلم الأيادي والف مبروك

---

إزيك يا دكتور ...

كابرس,132,برايد,تيريوس,جيلي
ميجان,أوبترا,فليشيا,كورولا بالترتيب

إيه يا دكتور كل العربيات دى بتاعتك ولا إيه؟:shyy:... ما شاء الله لا قوة إلا بالله ربنا يباركلك فيهم ويحفظهملك من أى سوء

موضوع جميل استمتعت بقراءته
شكرا ليك

الموضوع جميل جداً وأنا نفسى أجيب العربية دى وبقارنها مع اللوجان
بس المشكلة إن اللوجان تفوز فى أسعار قطع غيارها بعد إنتشارها فى السوق والتوكيل سمعته أحسن من عز العرب
هيه البروتون بس وبالأخص الساجا محتاجه شوية تعديلات فى أسعار قطع الغيار عشان هيه عالية أوى أوى أوى وده إلى مخوفنى
وكمان موضوع الإستهلاك العالى للبنزين

الف مبروك يا أ عمرو على الساجا و الف شكر على التقرير الرائع ده

بجد اتشرفت بمعرفتك فى المقابله .

اشوفك قريب على خير ان شاء الله

ربنا يباركلك في عربيتك الممتازة يا ريس ما شاء الله

شكراً على المجهود المبذول و هذا التقرير الجيد و الصور

اهلا بيك ..........وموضوع رائع

شكرا على كل الردود الجميلة دى
اما بخصوص ان اسعار قطع الغيار غالية شوية بالنسبة للساجا فانا شايف ان دة وضع طبيعى جدا لعدم انتشار العربية بالشكل الكافى و دة طبعا بيخلى المحلات مش بيجيبوا قطع الغيار بتاعتها وطبعا مع عدم اهتمام الوكيل بالدعاية ليها فدة ماثر طبعا على عدد المشتريين بس انا و الله و ناس كتير بنشوف حل برة التوكيل يعنى امبارح انا اعرف كام واحد من زمايلى مستوردين قطع غيار للهيونداى و الاوبل و قعدت و اتكلمت معاهم لية مش بيجيبوا قطع غيار للبرتون ووعدونى انهم هايشوفوا الموضوع ده يتم ازاى كمان فى كتير من الاعضاء فعلا لاقوا حلول و عملية جدا يعنى اسماء محلات بتبيع قطع الغيار بتاعت البروتون باسعار كويسة و كمان عايز اقولك على حاجة انا متاكد منها مليون المية لانى جربتها بنفسى
فى الاول كنت شارى عربية كيا برايد هاتشباك لمراتى سنة 1999 و الله العظيم كل الناس كرهتنى فى عشتى و كلام مش هاقولك علية لدرجة انى فكرت ابيع العربية بعد ما اشترتها باسبوع و بعد كدة حصلت القضية بين التوكيلين و اتوقف استيراد قطع الغيار بتاعتها حوالى سنة و لما بدات افكر فى انى اشترى قطعه غيار بعد اربع سنين و الله لاقيتها فى اغلى حاجة بسيطة عن الفيات و دة طبعا للانتشار انما بمرورو الوقت هاتلاقى كل حاجتها و على فكرة برضوا ان قطع غيار الرتون لا يوجد منها تقليد حتى الان انما طبعا هايظهر و لو عايز تتاكد انزل النهاردة اشترى فانوس امامى لانوس مثلا هاتلاقية صينى و لا اقولك فاكر مراية الاوبل اللى واخدة جزء من الكبوت عارف كان تمنها كام فى التوكيل فى الاول انا اشترتها مع واحد صاحبى 1800 جنية الفردة عارف النهاردة تمنها كام لا تتعدى 250 جنية الصينى يعنى كل التوكيلات كده و مايغركش رخص قطع الغيار فى عربية مش فيها اى ثبات او اتزان اما بخصوصو مشكلة البنزين اعتقد ان المشكلة مش موجودة بدليل ان واحد زميل ليا معاه المانيوال و عاملة النهاردة حوالى 4000 كم و بتعمل معاه جوا االبلد حوالى 220 كم فى الصفيحة و على الطريق 100 فى ال 7لتر يعنى حوالى 275 الى 285 و اعتقد ان دة معدل كويس جدا انما ممكن يكون عندى مشكلة ما مثلا ان عربيتى اتوماتيك مثلا او ان لسة المكنة ما فتحتش و بالتالى لسة الاستهلاك عالى اما بخصوص الاستهلاك داخل البلد فدة لية عوامل كتير يعنى مثلا ماشى فى صلاح سالم باليليل بعد 12 مساء ها تستهلك بنين من اول صلاح سالم لحد المطار بنفس النسبة لو حضرتك مشيت فى صلاح سالم الساعه 3 العصر و ما ادراك ما 3 العصر فى صلاح سالم يبقى علية العوض فى اليوم اتضرب و صفيحة البنزين سافرت كمان و الله الثبات بتاع العربية اقسم بالله اعلى من النوبيرا كمان لانى ركبت النوبيرا و فتيسها احلى من النوبيرا كمان فى التجميع بالنسبة للاوتوماتيك
اخر نقطة بص مش كل حاجة نقول التوكيل لا احنا لازم نسعى شوية و ندور و نشارك بعض مثلا لو انت عارف حد بيبيع قطع الغيار بسعر كويس اعمل توبيك بالموضوع او لو فى مشكلة اكتبها و اخر نقطة انضم لمجموعه بروتون و انت هاتشوف الفرق فى التوكيل و الله انا النهاردة اتصلت بيهم و ادونى نمرة موبيل و كلمتهم محدش رد و بعدها ب5 دقايق لاقين الموبيل بيرن و كانت الانسة داليا و هيا المسئولة عن خدمة ما بعد البيع و اعتذرت عن عدم الرد عشان كان معاها ويتينج و لما عرفتها بنفسى سالتنى انا بشتكى من اية و قولت كل اللى عندى و حددت يوم الثلاثاء اللى جاى عشان اروح بالعربية لصيانة الالف و لكن لارتباطى يوم الثلاثاء اتفقت على الخميس

بص كل واحد و لية وجهة نظر النهاردة بتقول اللوجان مع العلم ان الكليو تفوق اللوجان بمراحل كتيرة جدا و مع ذلك كل الناس اشتكت منها انما زى ما حضرتك ذكرت ان التوكيل بدا يفوق نتمنى ان شاء الله توكيل عزب العرب يفوق بسرعه و انتوا هاتلاقو العربية مكسرة الدنيا و لا لوجان و لا ديولة و اسال مجرب انا اتهريت عربيات من الانوس للهيونداى ( معلومة غيرت رشاشات فى التوكيل ب 3650 جنية مع العلم ان تمنهم نفس اللى موجود فى التوكيل ب 700 جنية و تركيب 50 جنية عشان ماتقولش غالية ) كيا و اكسيل و سكودا فليشيا ( لمدة اسبوع و تم البيع بخسارة 3000 جنية مش عارف لية بس عرفت مؤخرا ) من الاخر اخوك اتمرمط شوية بس و الله نفسيا مرتاح و مطمئن مع معشوقتى الجديدة الساجا وحش فئة الوسط فى السيارت الاسيوية

كلامك جميل جداً ويدل على تفاؤل بمستقبل العربية

الف مبرووووك ع الساجا وربنا يباركلك فيها

وشكرا ع التقرير يا باشا

بجد تسلم ايدك وجزاك الله خيرا
انا عيزة أجيب العربية ديه بس مش عرفه أكلم مين او أبدء منين ياريت المساعدة

اقتباس:

---

المشاركة الأصلية كتبت بواسطة mansy

بجد تسلم ايدك وجزاك الله خيرا
انا عيزة أجيب العربية ديه بس مش عرفه أكلم مين او أبدء منين ياريت المساعدة

---

أهلا وسهلا بحضرتك ....

حضرتك ممكن تكلمى زميلنا فى المنتدى Ayman_52 وهو ممكن يحاول يظبطلك تخفيض لو فى...

ومبروك مقدما وإن شاء الله تستلمى على خير

تقرير رائع ياباشا تسلم إيديك ... على فكرة أنا رايح إنهارده أستلم الساجا من فرع العجوزة أدعولى أستلم على خير:120105~352:

اقتباس:

---

المشاركة الأصلية كتبت بواسطة mohtofy

تقرير رائع ياباشا تسلم إيديك ... على فكرة أنا رايح إنهارده أستلم الساجا من فرع العجوزة أدعولى أستلم على خير:120105~352:

---

الف مبروك يا باشا
وعايزينك تتواصل معانا خطوه بخطوه بئا

مبروك....ياريت الموضوع يتثبت

اقتباس:

---

المشاركة الأصلية كتبت بواسطة mansy

بجد تسلم ايدك وجزاك الله خيرا
انا عيزة أجيب العربية ديه بس مش عرفه أكلم مين او أبدء منين ياريت المساعدة

---

لو تحبى تعرفى اى معلومات عن العربية تحت امرك بجد بعد المقابلة اللى حصلت فى العين السخنة اتعلمت احب عربيتى و بالتالى و الحمد لله عرفت معلومات كتير عن العربية زى ان العربية اول موديل ليها عام 1998 فى ماليزيا و انها العربية الاكثر شعبية فى ماليزيا و عاملنها تاكسى كمان و لو اى اسائلة او عايزة تشوفى العربية ممكن تكلمينى و انا تحت امرك اما بخصوص السعر فبجد اللى هايفيدك ايمن فى الموضوع ده هايعمل لك تخفيض حلو قوى و كمان هايراعيكى فى الصيانة و كمان تبقى معانا فى الجروب حلو جدا و الله

مبروك يا باشا على العربية .. وربنا يباركلك فيها .. ومتنساش تدبح ليها حاجة (وتدينا من اللي حتدبحه .. تكون حته كويسة) .

وبرضه متنساش تديني اللفه اللي وعدتني بيها :driving:.. وإلا أنت عارف .:khd:

تقرير اكتر من رائع

ربنا يبارك في حضرتك وفي عربيتك ويكفيك شرها

اقتباس:

---

المشاركة الأصلية كتبت بواسطة amr1973

لو تحبى تعرفى اى معلومات عن العربية تحت امرك بجد بعد المقابلة اللى حصلت فى العين السخنة اتعلمت احب عربيتى و بالتالى و الحمد لله عرفت معلومات كتير عن العربية زى ان العربية اول موديل ليها عام 1998 فى ماليزيا و انها العربية الاكثر شعبية فى ماليزيا و عاملنها تاكسى كمان و لو اى اسائلة او عايزة تشوفى العربية ممكن تكلمينى و انا تحت امرك اما بخصوص السعر فبجد اللى هايفيدك ايمن فى الموضوع ده هايعمل لك تخفيض حلو قوى و كمان هايراعيكى فى الصيانة و كمان تبقى معانا فى الجروب حلو جدا و الله

---

أولا ألف مبروك على العربية يا أستاذ amr1973 .الساجا على فكرة أول موديل ليها 1985 والموديل الحالى ظهر 2008. ودى صفحة الويكيبيديا فيها موديلات الساجا وتاريخها http://en.wikipedia.org/wiki/Proton_Saga

الف مبروك ياباشا ربنا يديك خيرها ويكفيك شرها انا كنت ومازلت من اشد المعجبين بالساجا وكنت هاجيبها بس البرسونا خطفتنى