انت لو جيت تشوف الصنايعي ده كان ايه اصلا قبل مايشتغل هتلقاه كان صايع وراح اتعلم مهنه او فاشل في الدراسة يعني من الاخر هما اشكال بيئة بس فيه ناس كويسة
عرض للطباعة
انت لو جيت تشوف الصنايعي ده كان ايه اصلا قبل مايشتغل هتلقاه كان صايع وراح اتعلم مهنه او فاشل في الدراسة يعني من الاخر هما اشكال بيئة بس فيه ناس كويسة
واضح أن معظمكم متفق معايا وانا كنت عاوز اقول حاجه كمان
هو الصنايعى لو كان ذكى وعاوز يكسب كويس والواحد راح له عمل شغلانه وعملها على اكمل وجه مش برضه ده هيخلى الواحد منا مش هيروح غير ليه ولو حد سئله على حد هيوصفله الصنايعى المحترم على طول وده هيخليه بعد فتره مش ملاحق على الشغل
يعنى أنا مثلا من حوالى شهر الانذار علق وبقى يفتح ويفقل لوحده رحت اتصلت بالى مركبه قالى بكره وبكره اتصلت بيه لقيته نايم فى البيت وبيقولى أنا مريح اتصلت بيه اليوم الى بعده قالى بالليل بالليل قالى مش هينفع غير بالنهار عشان معنديش بلادوس أنا كنت عاوز اروح له عشان هو الى فاهم ركب الانذار ازاى وخفت لو رحت لحد تانى ميعرفش ( يعنى بمبدأ الى حضر العفريت هو الى يعرف يصرفه )
المهم سالت اخوانى فى قسم رينو قالولى على محل بتاع انذارات عشان اظبطه الصنايعى الى فى المحل راح مطلع الانذار وفى ثانيه شال فيشه كانت محطوطه غلط (فيشه وحده الرفع ) راح الانذار اتظبط فى ثانيه واحد وصمم أنه ما يخدش ولا تعريفه
وقالى أنا معملتش حاجه اخد عليها فلوس والله العظيم بالعافيه اتديته عشره جنيه وقلتله كان ممكن واحد غيرك يشتغلنى ويعملى البحر طحينه ويدفعنى اكتر من كده غير العطله ومشيت وأنا بادعيله
يعنى صنايعى كويس وفاهم وبيخاف ربنا
الهم بعد ما خد الفلوس بيبص لقى لمبه الليد بايظه ( اللمبه الى بتنور وتطفى اول ما الانذار يشتغل ) راح جاب واحده من عنده وركبها وقالى ديه عشان ابقى عملت أى حاجه ورايح عايد على تقفيل الانذار بالشطرطون عشان التقفيل مكنش حلو
بقيت فرحان جدا والله مش عشان الانذار اتصلح بس لكن كمان عشان حسيت أن لسه فى ناس محترمه
اهو واحد زى ده مستحيل أى حد يسالنى على تركيب انذار الا لما هبعته ليه على طول يعنى هو اكيد هيكسب فلوس اكتر من الصنايعى الاولانى الى لو حد سالنى عليه هقوله ابعد عنه بعد المشرقين
طبعا أنا مش عاوز اتكلم كمان عن الاجر من الله الى والبركه الى ربنا هيحطها فى صحه التانى ورزقه واولاده
يعنى كسبان من كل ناحيه
نفسى اعرف الصنايعى الاولانى أنا عمل الشغلانه اصلا بيفكر ازاى ؟
الصنايعى الأولانى بيبص تحت رجليه من مبدأ إحيينى النهاردة و موتنى بكره
و الصنايعى التمام بيبص للأمام و قادم الأيام و يحاول يربى زبون
الصنايعى الأولانى عايز يجيب تمن البيسه او الربع قرش و ما بيفكرش غير فى كده
الصنايعى الثانى بيفكر فى مستقبله و سمعته و مستقبل أسرته
هو فعلا نسبة الصنيعية الكويسين قليلة لكن فى الحمد لله صنايعية كويسين ويعرفو ربنا
لكن عن تجربة لكل واحد من الكويسين مميزات وعيوب
واحد بتلاقية بيشتغل حلو ومش عايز يفتح معاك شغل كتير فى العربية وبيعملك الشغلانة على القد بالظبط علشان يوفرلك
و واحد تانى ممكن يغرمك شوية زيادة ويظبطلك الللى رايح علشان تعملة وزيادة بس حراق شوية فى الفلوس
واحد تانى كويس بس بيكون عندة زحمة ولازم تستنى دورك أو تيجى تانى يوم يعنى لازم تتصل بية الآول تشوف ممكن تروحلة ولا لآ
الا طبعا فى الطوارىء ممكن تروحلة ويصلح المشكلة بس بردة بالدور
فالواحد لازم يجرب ويتعرف على دة ودة وممكن واحد يكون جنب البيت وواحد جنب الشغل أو بعيد شوية مش مشكلة علشان يعرف الحلو والوحش ويعرف بردة المشكلة دية يروح لمين فيهم يحلها بسرعة لو مستعجل
ونصيحة محدش يتعامل مع أى صنيعى ألا أذا كان متجرب قبل كدة من الآصدقاء أو الجيران أو الآقارب علشان ما يدبس فى واحد غشيم أو مش صنيعى
وربنا يسترها علينا جميعا
ياجماعه احنا كلنا اصبحنا لقمه للصنايعيه ( دا اذا كان فعلا صنايعي ) اصبحنا وجبة غداء لازم تتاكل لاانها ممكن مش ترجع تانى
وبالتالى لازم صاحب العربيه يتقلب كويس ويتعمل معاه احلى واجب ان جه تانى خير وبركه مجاش يبقى غيره جى
اعتقد دا المنطق اللى مالشى دلوقتى وخصوصا ان صبى فى ورشه خد محل ايجار جديد وجاب عده وعمل نفسه اسطى وهو مش فاهم حاجه
وقاسى الامرين ياصاحب العربيه
هم بيسايروا عامة الشعب من أمراض اجتماعية مثل النصب والتربح والفهلوة
بس لو انت زبون عند حد مستديم مستحيل يعمل معاك حركة وحشة
كل الكلام اللى فات ده جميل بس لحد دلوقت محدش قال مين الصنايعية الكويسين ويا ريت نحددها بالمناطق.
طيب ابدأ انا وبالله التوفيق.
منطقة حرفيين مدينة السلام:
1- احمد روكسى كهربائى
العنوان: بلوك 8
الراجل ده صنايعى و متهاود و امين
2- ناصر ميكانيكى بس السيارات القديمة فقط لكن الانجكشن و الكمبيوتر والحاجات الحديثة دى اعتقد بلاش.
العنوان: بلوك 8 بجوار الكهربائى.
الراجل ده صنايعى و متهاود و امين برده