السلام عليكم
موضوع عايزين ندردش فيه بعيد عن السياسة والحكومة وعلشان يبقى لينا دور بجد مش كلام
عايزك تعمل تجربة بسيطة اوى...ادخل اتوضا او اغسل وشك او ايدك وسد فتحة الحوض وبعد متخلص شوف استهلكت مياه اد ايه...وياسلام بقى لو تحسبها باللتر..حتلاقى نفسك بالميت خمسة ستة لتر:36_1_31:شوف بتكرر العملية دى كام مرة فى اليوم واحسب بقى (تكلفة تنقية المياه 2 جنيه للتر!!!!!!! يعنى انت ممكن تكون بتتوضا ب10 جنيه بس!!!!!)
مش عارف الناس ملاحظة ولا لا اننا عندنا مشكلة ضخمة جدا وهى المياه
من ناحية القلق اللى حاصل فى اتفاقيات حوض النيل وواضح انهم مصممين وحصتنا حتقل رغم التأكيدات الحكومية...بصرف النظر دلوقتى الحكومة غلطانة اسرائيل السبب...الخ متفرقش المهم ان الواقع ان حصتنا حتقل
طيب والاسوا كمان ان الفيضان جه السنة دى اقل من المتوقع:_Alshmokh08[1]:وبالتالى حيضطروا يسحبوا من بحيرة ناصر
طيب وانت عايز مننا ايه يا عم دلوقتى:ma(30):
ولا حاجة..الرسول شاف واحد بيتوضا بطريقتنا دلوقتى فقاله ما هذا السرف؟ فتقريبا الراجل رد انه بيحاول يحسن الوضوء...فالرسول عليه افضل الصلاة والسلام قال: ولو كنت على نهر جارى
يعنى متسرفش حتى لو عندك نهر بتاعك
مش مطلوب نتقشف ولا نبطل نستخدم مياه
كل المطلوب شوية حاجات بسيطة بس ممكن تفرق معانا كتير
كفاية ان كل بيت يوفر يوميا لتر واحد بس يعنى ممكن فى اليوم نوفر 10 مليون لتر يعنى فى السنة 3.5 مليار لتر......
طيب ازاى؟
بسيطة اوى ومن غير تريقة
- وطى المياه شوية مش لازم تفتح الحنفية على اقصى قوة ليها، حتفضل تنزل مياه كويسة بس حتقلل استهلاكك بمقدار الربع على الاقل
- ارجوك متفتحش الحنفية الا لما حتستعملها...يعنى نظام افتح الحنفية واروح ارود على التليفون وارجع دى مالهاش اى معنى...لو بتوضا وحترفع رجلك اقفل الحنفية الاول وبعدين لما ترفع رجلك ابقى افتحها تانى ...والله حتفرق:majd(4):
مرة كنت عند ناس والمياه مقطوعة وجابولى دورق فيه مياه علشان الوضوء وبقيت احط ايديى جواه واغسل ايدى واحط ايديى واغسل وشى واحط ايدى واغسل دراعى....والله مستهلكتش اكتر من كوباية مياه.....
- ارجوك لو بتحلق اتو بتغسل سنانك متفتحش المياه الا لما تحتاجها فعلا...صوت المياه مش حيساعدك فى حلاقة افض:_Alshmokh08[1]:
-السيدات وهما بيغسلوا الاطباق ياريت منسبش المياه مفتوحة ونقعد نصبن الاطباق..والله محنتعب لو قفلناها لغاية لما يجى وقت الشطف
-العربيات حدث ولا حرج..ارجوك فهم البواب بتاعك انه مش لازم شوارع المنطقة كلها تغرق علشان يعرفك انه غسلك العربية:36_1_34[1]:
-التخلف المسمى برمى المياه فى الشوارع لتلطيف الجو...ارجوك خليك ايجابى وفهم الناس الاغبيا دول يبطلوا تخلف شوية:ma(30):
ارجوك خليك ايجابى فى حاجة بسيطة بس حتفرق معانا كتير ومتقعدش تقول اصل الحكومة بتعمل وبتسوى..خليك ايجابى لنفسك ولاولادك
ارجوك افتكر الكلام ده وحاول تنشره على بيتك واولادك واصحابك وزمايلك فى الشغل...خليك ايجابى فى حاجة بسيطة وافتكر ان ربنا حيحاسبنا على كل نقطة مياه بنرميها فى الأرض بدون داع