تجربتى فى تغيير جوان وش السلندر وبعض المشكلات عند محمد عبده
بسم الله الرحمن الرحيم
الحمد لله أولا وأخيرا فى السراء والضراء...
بعد المعاناة اللى كنت بعانيها من مشكلة نقص المياه بإستمرار من القربة وبعد تغيير ريدياتير وطبة موتور استمر بعدهم الوضع بنقصان فى المياه، قولت اروح بقى لمحمد عبده اعمل كبس على دورة المياه واتصلت بيه فعلا وقولتله انا بكلمك من طرف اخونا ومستشارنا محمد ممدوح الراجل رحب بيا فعلا ورحتله يوم الخميس بالليل للأسف كان بيجرب عربية،، المهم عملى الكبس الحسنين وورونى بعينى المياه بتنقص منين وكان فيه رشح مياه من منطقتين اولا منطقة كوعة المياه بالترموستات جنب فلتر الهواء كدا وتانى واحدة كانت من جوان وش السلند لان المياه كان بتسرب برضوا من فوق الطبات بالضبط فى وش السلندر وبرضوا كان عندى مشكلة فى ماستر الدبرياج كان بيرشح زيت وكان الدبرياج بيعلق ساعات وكان فيه برضوا تسريب زيت فى الحوض حسن الكبير قال دا عاوز اويل سيل علبة دركسيون وواحد تانى بتاع بوبينة واتفقت انى اعدى عليه الجمعة بالليل علشان نشتغل..
بينى وبينكم كنت قلقان من حل وش الموتور جدا لاكن الاخوة هنا طمنونى منهم المستشار محمد ممدوح المهندس الكبير سمير عياد والحمد لله قولت الخيرة فيما اختاره الله وتوكلت على الله ورحت الجمعة بالليل لاقيت محمد عبده ورحب بيا جدا وقعدنا شوفنا هنجيب ايه وكان المطلوب كالتالى:
جوان وش سلندر..
ترومستات مياه...
كوعة مياه...
ماستر دبرياج...
أويل سيل علبة دركسيون...
أويل سيل بوبينة...
ماسورة مياه حوالى 5 سم خراط...
زيت باكم...
زيت باور...
بلية كاتينة كورى...
رحت جبتهم انا وحسن الكبير على الموتوسيكل عملوا كلهم حوالى 270ج.
وقعدت معاهم لحد متم حل وش الموتور وابص على الجوان متفحم وتمسكه فى ايدك يقشر دا غير ضعف الطبب كلها قومت جايب طقم طبات كمان علشان منخشش فى قصص تانى والحمد لله رحت استلمت العربية امبارح من محمد عبده بالليل وتم عمل اللازم...
بعد مركبت العربية حسيت بنعومة فى النقل والدبرياج عن الاول بكتير وحسيت ان العربية كمان مبتسخنش زى الاول بسرعة ولكن لسه تحت الاختبار معدل المياه زى مقال كمان محمد لازم تشيك على المياه وتبص عليها كل يوم لحد منشوف الدنيا ايه وإن شاء الله خير
ملحوظة كدا على السريع علشان الناس تبقى عارف محمد عبده دماغه ايه برضوا ودا انا استشفيته من الوقت اللى قعدته معاه.. الصراحة راجل محترم جدا وذوق فى التعامل ومن الاخر اللى اتعمل فى العربية دا كان بسبب بس المياه وهو مضربنيش على ايدى علشان اعمل الحاجات دى بس انا عقلتها طيب منا اعمل الموضوع مرة واحدة بدل مفتح تانى علشان اعمل حاجة هايفه وهو قالى المشاكل اللى موجودة واحد اتنين تلاتة وفى الاول وفى الاخر كله يرجعلك انت عاوز تعمل ايه والصح ايه وانا طبعا مبحبش اعمل حاجة فى عربيتى الا الصح فقررت انى اغير كل اللى سبق دا.. بخلاف طبعا انى عندى مشاكل فى العفشة من ساعة مجبت العربية وهو قالى فعلا العربية فيها كذا حاجة فى العفشة وبأمر الله هعملها قريب علشان ابقى كدا عملت الواجب مع العربية وزيادة علشان يوم مهتقصر معايا هعلقها من مراياتها :khd:...
وفى الاخر بشكر تانى اخونا محمد ممدوح على مشورته والاخ الكبير سمير عياد على تعبه معايا واسف طولت عليكم