حضرتك قصدك السوران ولا التوران ؟
أصل التوران قصة تانية خالص غير السوران أو الكارينز سواء من ناحية الموتور والفتيس ووسائل الأمان والكماليات ..... وطبعا السعر ....
لو حضرتك قصدك على التوران تبقى هي طبعا قولا واحدا مع كامل احترامي للكارينز لأن وجه الشبه الوحيد بينهم هو الشكل الخارجي....
التوران دي موتور الـ TSI 1400 فيه تربو تشارجر زي اللي في الباسات لكن يتفوق عنها في القدرة الحصانية لأنه 140 حصان والباسات 122 حصان .. في حين ان الكارينز موتور 1600 حوالي 124 حصان .... مع ملاحظة ان المدرسة الأوروبية في قياس القدرة الحصانية للموتور هي الـ net power اللي بيتم فيها قياس قدرة الموتور وهو متوصل بأجزاء معينة زي السيور والعادم ... في حين أن المدرسة الآسيوية بتكون gross power يعنى قدرة الموتور لوحده من غير ما يركب عليه أي حاجة ... طبعا المدرسة الأولى أقرب للواقعية بالنظر إلى أن حضرتك بتستخدم الموتور وهو كامل بتوصيلاته في السيارة .... وعلى فكرة توجد مواضيع كثيرة عن هذه المسألة كتبوها اخوة أفاضل في نايل متوتورز تقدر تعمل ليها بحث وتشوفها .....
موتور التوران بيطلع قوة 140 حصان وعزم 210 نيوتن ( عزم جبار) عند عدد لفات منخفض حوالي من 1500 إلى 2000 لفة.... انما الكارينزموتورها 124 حصان وبيطلع عزم 154 عند عدد 6300 لفة ( حسب كونتاكت كارز) ......
(ملحوظة : التوران لازم ليها بنزين 95 أو على أقل تقدير خليط بينه وبين 92 رغم عدم ترجيحي لذلك ... إنما 92 لوحده يبقى حتفقد الموتور في وقت ليس ببعيد )
كذلك ناقل الحركة بتاع التوران هو اعجوبة ومفخرة فولكس فاجن الـ DSG سلس النقلات ذو السبع سرعات ... وده برده في مواضيع كتيرة عنه في المنتدى تقدر حضرتك تتطلع عليها .. في حين ان الكارينز فتيس أوتوماتيك استربتونيك عادي ....
التوران فيها 6 أو 8 ايرباج ( مش متأكد ) ...... والكارينز حوالي 2 ايرباجز ومش في كل الفئات على ما أعتقد .....
التوران فيها أحد أهم وسائل الأمان التي في رأيي يتعين أن تكون ستاندرد في أي عربية جديدة حتى لو رفعت سعرها شوية ..... الـ ESP ( Electronic stability Program ) وده برده ليه مواضيع كتير في المنتدى شارحاه تفصيلا .... ولكنه باختصار هو برنامج الكتروني يستشعر لحظات فقد السيطرة على السيارة وبداية انحرافها عن الطريق جراء منحنى شديد أو تغيير اتجاه فجائي أو ما شابه ويقوم البرنامج عن طريق الفرامل بمحاولة استعادة ثبات السيارة وعدم خروجهاعن سيطرة السائق .... الخاصية دي أعتقد غير موجودة في الكارينز وبالذات اللي نازلة من الوكيل
التوران فيها 7 مقاعد لسبع أفراد نازلة بيهم .. الكارينز تسع خمس أفراد فقط بس معرفش فيه امكانية اضافة كرسيين ورا أو حد عملها فعلا ولا لا .....
مسألة بلد التجميع بالنسبة للتوران ... الحقيقة أنا مش متأكد إنما أعتقد انها ألماني ألماني .... لو الحقيقة غير كده ياريت حد من الإخوة يصحح ليا ....
نيجي بقى للسعر ... حسب موقع كونتاكت كارز الكارينز الأوتوماتيك بتعمل 112000 جنيه .... إنما التوران بتعمل 215 ألف جنيه ( السعر تم خفضه في التوكيل كعرض خاص بعد ما كانت 225 ألف ) .....
في النهاية أرجو لحضرتك التوفيق في الاختيار وربنا يبارك لك في السيارة التي سوف تقتنيها ان شاء الله ......
المفضلات