الموضوع: ولا أجمل و لا أحلى و لا أروع ........ ليفان 620 الجديده

I hope you are giving us a true picture of the car because actually i feel shocked to hear the name Lifan now.

المشاركة الأصلية كتبت بواسطة prince2005

I hope you are giving us a true picture of the car because actually i feel shocked to hear the name Lifan now.

أولا :- أحب أشكر كل الساده الأعضاء اللى باركوالى على العربيه و أخص بالشكر أ/ شريف مسئول المبيعات بالسعودى جروب .

ثانيا :- أنا حرصت على نقل الصوره الحقيقيه عن العربيه و بكل أمانه حتى إنى كتبت عن قطاش البطاريه اللى كان مفكوك و دى حاجه لا تذكر .و ما حدث مع صديقك شىء مؤسف بس العربيه الـ 620 مختلفه تماما و بصراحه متقفله بعنايه فائقه حتى أنا كنت ذكرت إن صوت الموتور عالى بعد الـ 1000 كم و كنت مستنى الـ 5000 كم علشان الصوت يهدى بس دلوقتى العربيه عامله 2500 كم و صوت الموتور هدى خالص و بصراحه أنا كنت قلقان منه علىشان صينى و المقارنه بينه و بين الموتور الآخر الـ Tritec اللى بينزل مع نفس الموديل بس سعره أغلى و لكنى لقيته موتور قوى و موضوع الصوت إنتهى و برضه الموضوع لسه مفتوح و أى ملاحظات بالسلب أو الأيجاب أنا هاذكرها إن شاء الله بكل أمانه حتى أنقل الصوره واضحه للساده الأعضاء و لإدارة المنتدى المحترمين اللى لازم أشكرهم على الجهد المميز و الحياديه .

اخى العزيز صاحب العربية موضوع الفتيس عيب تصنيع فى الليفان و عربية قريبتى فى التوكيل من 3 ايام عششان الفتيس مش بيغير الثالث الا بالعافية و عضة و بيقولوا ده طبيعى فى العربية و النهاردة اتاكدت انها عيب صناعه لان لاقيت كل مالكين العربية بيشتكوا من الموضوع ده و التوكيل و لا بيسال

المشاركة الأصلية كتبت بواسطة amr1973

اخى العزيز صاحب العربية موضوع الفتيس عيب تصنيع فى الليفان و عربية قريبتى فى التوكيل من 3 ايام عششان الفتيس مش بيغير الثالث الا بالعافية و عضة و بيقولوا ده طبيعى فى العربية و النهاردة اتاكدت انها عيب صناعه لان لاقيت كل مالكين العربية بيشتكوا من الموضوع ده و التوكيل و لا بيسال

أنا فى عربيتى لقيت عضه فى الأول فقط و لقيت عميل آخر بيشتكى من نفس الشىء و بعد ما بلغت التوكيل مع صيانة الـ 1000 كم إنتهت تماما و العربيه دلوقتى عامله 2500 كم مفيش أى ملحوظات على الفتيس و أنا مقدرش أعمم أى شىء إلا إذا كنت شفتها فى أكتر من عربيه و ده مش هيحصل إلا إذا كنت شغال فى التوكيل أو أكون سألت كل اللى أشتروا العربيه .

اخى العزيز على ما اظن حضرتك شغال فى التوكيل لان الكلام اللى حضرتك بتقولة مش عارف مش مستريح لية و عامل موضوع تانى بتتكلم عن العربية الليفان على انها سابقة اوانها و انها افضل من انواع اخرى بص بقى للعلم انا هاقولك على كل حاجة بجد من غير ما تزعل عشان انا عارف انك معاك 620 على حد قولك و بتقول فيها شعر
انا مع بنت اخت مراتى ليفان 320 المينى مش عايز اقولك عربية اد اية معفنة بجد و اسف على اللفظ المهم العربية كالعاده فيما يخص ليفان فيها مشكلة فتيس بياخد الغيار بالعافية و فيه عضة و كمان دقرة فى الفتيس تخيل لما روحت التوكيل يقولوا اية عشان تعرف التوكيل اية
1- مهندس صيانة اللى استلم العربية المهندس كريم قال ان ده فى تصميمم العربية و لما اصريت على انه عيب نده مهندس تانى اسمة محمد اكد على ان هناك عضة فى الفتيس
2- لم يتم ترصيص العجل فى الزيارة الاولى نظرا لعدم وجود الفنى كاننا فى ورشة و الصنايعي مجاش النهاردة
3- بعد الاصرار على وجود العيب طيب سيب العربية و تعالا استلمها بعد بكرة و بالفعل تم
4- لما روحت استلم العربية لسة مخرجتش تقريبا كانت بتعمل ببي لمده 3 ساعات و خرجت مع مهندس طلع جربها و رجع دخل بيها تانى قعدت كمان ساعتين
5- قابلت مسئول من المبيعات اللى اشتريت منه العربية فرع التحرير و اسمة قدرى تخيل قمة الاستخفاف بعقول الناس كان الناس كانت راكبة عربية كارو ان العضة دى امان للفتيس و ان التصميم بتاعها كده و دى عبقرية التصميم و التصنيع تخيل انت
6 - لما فرجت عليهم الناس نزل مدير المبيعات و مدير الصيانة و ناس من الصين و قابلت واحد صينى اسمة اليكس كمان و هاحط رقم موبيلة و اكد على ان الموضوع كلة عيب فى التصميم ورقم موبيلة 0108863053 و انة هايبعت للمصنع يشوف الموضوع ده
7- العربية خرجت برة مركز الصيانة لمده ساعه و بعد كده لما بسال قال لازم تمضى على ورق فى الحسابات تخيل الورق عبارة عن اية بنفس العبارة ( استملت السيارة بعد اجراء كافة الاصلاحات و السيارة تعمل بحالة جيدة و لا يوجد بها اى عيوب ) منتهى السرقة و النصب كمان
8- كلمت جهاز حماية المستهلك و اول كلمة رد عليها بيها لما عرف ان الشكوى بخصوص السعودى جروب رد و قال تانى احنا مش هانخلص المهم طلب منى ابعت لة صورة الرخصة و صورة تقارير الصيانة و صور الفواتير الخاصة بالشراء وشرح للمشكلة و قراية العداد و صورة كتيب الضمان
9- طبعا انا بعمل صيانة الالف المفروض انى استلم الضمان خاصة و انهم اول امبارح كانوا مسلمين لاكتر من 4 عربيات الضمان المهم لاقيت المهندس كريم بيقولى الضمانمش موجود حاليا بعد اسبوعين او ثلاثة ابقى تعالى استلمة طلبت منه ورقة تفيد الكلام ده مش عايز اقولك كانى طلبت منه 3 مليون جنية المهم اخدت ورقة تفيد عدم استلامى الضمان من الشركة
10 - اقسم بالله العربية فيها مشاكل بالهبل اكتر من عشر حجاجت الوحيدة اللى اتحلت تخيل اية صوت تزييق فى الزجاج و هو طالع و الباقى و لا اتلمس
11- فى الموضوع بتاع حضرتك بتقول ان موضوع الفتيس حالة فردية اتمنى انك توصل الى التوكيل و تقعد ساعة و شوف اليفان جاية باى عيب

بص من الاخر مش كون حضتك شارى العربية او شغال فى التوكيل تمدح فى العربية عمال على بطال و خلاص يا راجل فى صيانة ال 10000 عارف بياخد مقابل غيار الزيت كام 70 جنية و عارف واحد تانى النهاردة فى عربية qq مغير شداد شكمان و قعدتين موتور واخدين منه كام 685 جنية منهم 200 مصنعية
تحذير و انا هاعمل بية موضوع العربية مش تستاهل انك تشتريها خالص بسبب التوكيل و العربية زبالة و بيتهيالى انت شوفت الراجل صاحب الموضوع و انت افتريت علية وبتقول انه من شركة منافسة شركة اية يا عم و هيا دى شركة تتنافس دى اصلا شركة عجل و موتسيكلات العيب مش علية العيب على اللى اشتروا الزبالة ب 55 الف جنية و جاى كمان تخلى الناس تشترى ام 70000 جنية يا راجل حرام عليك الناس مش لاقية فلوسها فى الارض

أحب أوضحلك بعض النقاط اللى واضح فى كلامك إنك مفترضها و بتتكلم على أساسها :
أولا :- أنا مش شغال فى التوكيل
ثانيا :- أنا مهندس مدنى
ثالثا :- أنا مالك للعربيه فعلا .
رابعا:- أنا مقابلتش صاحب المشكله اللى بتتكلم عليها و مقولتش إنه من توكيل منافس فى أى مشاركه من مشاركاتى .
خامسا:- أنا كان معايا قبل العربيه دى لانوس 2004 ثم صنى 2007 خليجى و كانوا زيرو وأخيرا ميجان 2005 أوتوماتيك مستعمله قبل ما أجيب الليفان 620 .
أنا حرصت من بداية الموضوع إنى أقول و أكرر إن دى تجربتى أنا الشخصيه مع العربيه و التوكيل و ذكرت بكل أمانه اللى لقيته فى العربيه و إيه اللى حصل معايا فى التوكيل و كلامى مش حكم نهائى على العربيه ولا على التوكيل دى بأعتبرها شهاده منى كمالك لعربيه واحده من ألف عربيه تم بيعها من نفس الموديل .
والمشكله اللى حصلت معاك فى الموديل 320 و اللى حصلت مع الأخ التانى فى الموديل 520 بس أنا كل موضوعى على الموديل 620 و لو كلامك كان على نفس الموديل كان هيبقى منطقى لأن أنا مقدرش أحكم على الموديلين التانيين لأنى مركبتهمش ولا أمتلكهم و أنا عاذرك لأن مشكلتك تضايق و تضيع فرحة العربيه الجديده و منتظر أعرف منك المشكله هتتحل إزاى وياريت أى حد تانى من اللى قروا الموضوع و معاه العربيه الـ (620 ) يشارك و يقول لنا تجربته سواء وحشه أو كويسه و أعتبر يا أخى شهادتى رقم 1/1000 و لو عايز أى إثبات على صدق كلامى أنا معايا الرخصه و البطاقه و صور رخص العربيات اللى كانت معايا قبل كده و فاتورة صيانة الـ 1000 كم و العربيه موجوده كمان لو عايز تجربها ( ولا تكتموا الشهاده و من يكتمها فإنه آثم قلبه ).