بسم الله الرحمن الرحيم
السلام عليكم ورحمة الله وبركاته
النهارده عملت صيانة ال 20 الف لعربيتى فى المركز الرئيسى بالهرم كالعاده
كنت حاجز ميعاد من حوالى 10 ايام وكان ميعادى النهارده الساعه 12:45 شوفتوا الدقه :)
المهم روحت الساعه 12:30 تقريبا
جالى المهندس هانى عادل اللى برضه كالعاده هو اللى بيعمللى الصيانه
دى رابع صيانه معاه بالصدفه
سألنى قاللى صيانة ال 20 الف ؟ قولتله ايوه تمام
قاللى هاتغير زيت نوعه ايه قولتله لأ انا مغير زيت 10 الاف الصيانه اللى فاتت فمش هاغير قاللى تمام
سألنى عندك اى ملاحظات قولتله لأ كله تمام هى الصيانه العاديه وتربيط العفشه وكدا
قام كتب تربيط عفشه عشان يأكد انها تتربط
قاللى التكييف أخباره ايه ؟ قولتله هو كويس جدا وتبريده تمام بس بما اننا داخلين عالصيف شيك عليه
قاللى تمام وكتب برضه حكاية التكييف
استلم منى العربيه وطلب منى اروح اعمله أمر الشغل وقاللى العربيه هاتخلص حوالى الساعه 4
بس مادانيش البون بتاع المشروب زى الصيانه اللى فاتت :(
الصيانه اللى فاتت ادانى بون اشرب بيه مشروب مجانى فى الكافتيريا
تقريبا لقوها تكلفه عليهم قاموا لغوها :)
المهم دخلت استنى فى الاستراحه كانت حوالى الساعه بقت 1 وكنت واخد معايا اللاب توب عشان اتسلى
على الساعه حوالى 3 او 3 ونص طلعت أشوف ايه الاخبار لقيت العربيه خلصت
تفاصيل الفاتوره
صيانة كل 5 الاف : 153 جنيه
تنظيف فلتر التكييف : 34 جنيه !!!
ضريبه 10 % : 18.70 جنيه
الاجمالى 205.70 جنيه
قابلت المهندس سألته هو الفلتر اتغير ولا اتنضف قاللى لأ اتنضف فقط
قولتله طب مش المفروض تنضيف الفلتر دا بند من بنود الصيانه يعنى من ضمن الحاجات اللى تكلفتها 153 جنيه والمفروض مدفعش فلوس ؟
قاللى لأ دى حاجه خارج الصيانه زى الزيوت والمياه
المهم شكرته وروحت دفعت ومشيت
جربت التكييف بصراحه اتحسن عن الاول التبريد بقى اسرع واقوى مع انه كان قوى فى الاول بصراحه بقى ممتاز جدا
العفشه اتحسنت تحسن بسيط يا اما انا بيتهيألى ممكن تبقى زى ماهى
الموتور مغسول زى كل صيانه , اى نعم بيغسلوها بخرطوم مياه وفوطه واديها :) بس يلا المهم ان الموتور مايكونش عليه ضرر
اسف على الاطاله والى اللقاء فى الصيانه القادمه
المفضلات