لازم دايما يكون عندك صبر و احتمال و انت بتتعامل مع ابنك وخصوصا في السن ده. هو فعلا بيبقى فاهم بس فضوله و رغبته في المشاركة بتغلبه و أنت اللي لازم تحاول توازن الأمور. يعني في الموقف اللي حكيتهولنا ده ممكن زي ما ناس أقترحت انك تشغله في حاجة تانية. ممكن كمان تشغله عنك و تكون في نفس الوقت محسسه انه مشارك معاك. يعني تديلوه مفتاح أو الفوطة اللي بتنضف بيها مثلا و تقوله امسكلي ده و خد بالك منه كويس عشان لما أعوزه حطلبه منك و تديهولي على طول. و فعلا كل فترة تطلب منه الفوطة دي مثلا و تعمل نفسك بتمسح الكمبيوتر. أو لو في سن يقدر يميز أكتر تديلوا أكتر من حاجة من اللي انت بتستخدمها و كل ما تحتاج حاجة تطلبها منه. أهم حاجة انك تفهمه ايه اللي مسموح يمسكه و ايه اللي يتفرج بس و ما يمدش ايده عليه. انت بالطريقة دي بتشغلوا عنك و هو حيكون سعيد جدا انه بيساعدك. ولازم طبعا لما تخلص تمدحه و تقول لمامته انه كان شاطر و ساعدك عشان ده حيفرق معاه و يخليه يلتزم.
فيه حاجة كمان مهمة قوي, مينفعش تضرب ابنك او تعاقبه عشان متنرفز. لازم تتحكم كويس جدا في أعصابك و تاخد بالك ان العقاب ده بيكون وسيلة للتقويم مش انتقام. انت لما بتكون منفعل ساعات رد فعلك بيكون مبالغ فيه - و ده كلنا ساعات بنقع فيه - لكن الأسلم انك تحاول تهدي نفسك حتى لو حتعاقبه. وخد بالك ان الأطفال ذاكرتهم كويسة جدا عشان كدة لازم تحاول ان القواعد اللي بتحطها تكون واضحة ,يعني مش مرة يكون فيه عقاب قاسي و مرة لأ حسب المود بتاعك, العقاب ليه علاقة بحجم الخطأ مش بالحالة النفسية بتاعتك أنت. كمان لازم قبل العقاب تنبهه لغلطته و تحذره انه لو ما بطلش حتعاقبه, و مهم قوي انك لما تعاقب الطفل خصوصا في السن الصغيرة دي انك تفهمه ايه الغلطة اللي بتعاقبه عليها. و الأحسن دايما لما تقوله ميعملش حاجة حاول تفهمه انت ليه بتقول كدة. يعني مثلا في الموقف بتاعك تقوله انه مينفعش يمسك الكمبيوتر و انت بتصلحه عشان فيه حاجات ممكن تبوظ و ميبقاش عندنا كمبيوتر و كمان ممكن ايدك تتعور من الحاجات الحديد اللي في الكمبيوتر و أنا خايف عليك. الطفل ديما بتكون استجابته أفضل بكتير لما تتحاور معاه بالعقل مش بالأوامر المطلقة عشان ده بيحسسه بأهميته و انه مش مهمش.
لازم حضرتك تكون مدرك ان الطفل حتى لو بيعمل حاجة غلط من باب العند فده طبيعي لأنه بيحاول يكون ليه شخصية مستقلة و احنا دورنا اننا نحاول نوجه النزعة الاستقلالية دي صح مش نلغيها. يعني دايما حسسه ان فيه حاجات خاصة بيه هو اللي يقررها, كمثال لو خارجين مثلا تحطله جزمتين من بتوعه و تخليه يختار حيلبس انهي واحدة, و مامته بتوضبله سريره مثلا تخليه يختار الملاية اللي تفرشها, تخليه يختار ياكل في انهي طبق....الخ. ده بيساعد كتير انه بمرور الوقت يبقى بياخد قرار بسهولة و كمان مبيخليش عنده احساس انه كل حاجة مجبر عليها فيتمرد.