السلام عليكم و رحمة الله و بركاته
ارجو معرفة ما هى التلفيات المترتبة على استخدام مياه الحنفية بدلا من المياه الخضراء بالنسبة للدايو ؟
و شكرا جزيلا
السلام عليكم و رحمة الله و بركاته
ارجو معرفة ما هى التلفيات المترتبة على استخدام مياه الحنفية بدلا من المياه الخضراء بالنسبة للدايو ؟
و شكرا جزيلا
تقدر تقول عليها (اثار جانبيه) لإستخدام مياه عاديه وعلى سبيل المثال وليس الحصر :-
1- تكوين شوائب وصدأ داخل ميا التبريد
والنتيجه :-
انسداد المواسير الداخليه للردياتير مع الوقت , تأاكل بعض اجزاء دوره التبريد (مثل كوع الثرموستات) , الخ
2- انخفاض نسبه كفاءه التبريد
والنتيجه :-
ارتفاع درجه حراره المياه داخل دوره التبريد وده اكيد بيأثر على الاداء العام , تلف الريدياتير في أقرب فرصه
مجرد رأيي ووجهه نظر
بص نصيحة من اخ لأخ بلاش المياه العادية هى السبب فى بلاوى كتير منها كوعة المياه والترموستات دا غير ريادياتير دا غير انى وصلت تغيير جوان وش سلندر وطبعا خراطيم ومواسير وخلافه بتصدى فبلاش المياه العادية احسن لانها بتعمل ترسيبات من الصدأ وبتاكل فى كل حاجة فى الدورة بتاعت التبريد
لازم تحط ميه خضرا او حمرا حسب اللي كانت نزله في العربيه ،،،، بس تآخد بالك ان في انواع كتيره بتختلف حسب جوده لصنع و الاهم و هو التركيز ،،، انا اعدت استعمل تركيز 40 ٪ و دي تقريبا اغلى حاجه لمده 10 سنين تقريبا و الحمد لله مافيش سخونه بالمره و الحمد لله جابت العربيه وش برده و كمان بلوك و لما فيكيت الموتور الكل اجمع ان التاكل ده سبه التركيز العالي بتاع ميه التبريد .... فخد بالك
كلة زي بعضة ....المية الخضرا في مصر مضروبة ؛ماية عادية وعليها لون اخضر
انا بستخدم مياة مقطرة وبصراحة زى الفل
اهم حاجة انها خالية من الاملاح عشان المواسير والريداتير
جربت مياة خضرا امريكى ولونها اتحول لشفاف بعد يومين شكيت فيها قومت منزلها ومن وقتها وانا بستخدم مياة مقطرة وكل فين وفين لما بزود ها
ريح نفسك وهات ميه مقطرة ، بدون املاح ومافهاش صنعة ولا غش.
الانسان المصري بس .... هو اللي يقدر يعيش بمياه الحنفية :dontudear:
انما العربيات دي مرهفة المشاعر ... حاجة كدة ياباتي او كوري او اوربي .... يعني ديليكاه ... مش ح تستحمل مياه الحنفية
يقوم زورها يلتهب ( اللي هوا مدخل المياه ) وامعائها تتسد ( اللي هيا السربنتينة ) و يجيلها التهاب مزمن في فتحة الشرج ( اللي هيا كوع الثرموستات )
وطبعا ده ح يصاحبه ارتفاع في درجة الحرارة ( اللي هيا درجة الحرارة ) وارتفاع في ضغط الدم ( اللي هو المياه )
وده غالبا بيؤدي مع مرور الزمن الى وفاتها ( اللي هو بوظان الريدياتير )
انا شايف ان بدل الخساير دي كلها ... وده كمان غير اتعاب الدكتور ( اللي هي اجرة الصنايعي ) أحسن تجيب مياة ملونه .... انا اعرف ان فيه نوع سعودي كويس وسعره معقول ....
وخلي مياه الحنفية دي للبشر
انا بستخدم مياة عادية من سنة و الامور كلها تمام لكن لو فيه خطر منها اعمل ايه ينفع اغيرا بمياة خضراء ؟
لو حابب تغيير لميا خضراء ممكن تعمل تنضيف كويس لدوره التبريد لغايه لما الميا تروووق خالص وتبقه شفافه وبعدها حط الميا الخضرا , ويستحسن ميا خضرا بتركيز خفيف , بلاش التركيز العالي زي النوع الأمريكي اللي في علبه معدن عشان بتاكل المواسير الداخليه للريدياتير وبتعمل نشع
لو عاوز تغيرها
روح لأي محطة بنزين يكون فيها مكنة غسيل ريدياتير .. او واحد بتاع ريدياتير .... خليه ينظف الريدياتير ويحطلك المياه اللي انت عاوزها .... خضرا .. او حمرا .. او زرقا .... ودي فرصة اليومين دول علشان تدخل ع الصيف والريدياتير نظيف
لكن اوفر ليك اشتري المياه من بره وهو ينضف ويغيرهالك بس
هي مش تمام ولا حاجة ، لان العيوب مابتظهرش على طول ، والتآكل بيحصل عندك بس مش ملحوظ دلوقتي .
انا عن نفسي بفضل الميه المقطرة لأنها مافهاش سرقة ولا غش تجاري ، بس لو في نوع ملون مضمون ، يبقى أفضل لأنه درجة غليانه أعلى من الميه ، وفي اي محطة ممكن يتغير ومش غالي.
والله يا باشا انا بتفق مع بعض الاعضاء
بس عيب المياة العامة الخطير هو تأكل طبات المياة وكوع المياه
بس برده المياه الخضراء في مصر معظمها مضروبة فريحت دماغي بقيت احط مياه عادية وكل فترة بغير طبات المياه
لو العربية معاك من الزيرو ودايما بتحطلها مياه خضراء+مقطرة...يبقي تكمل علي كدة علي طول....لو بقالك فترة ماشي بمياه عادية يبقي اوعي تحط مياه خضراء علشان هاتاكل الرادياتير ودورة المياه عموما.
بحط مياه عاديه من الحنفيه من سنه ونص ومفيش اي مشكله لا العربيه بتسخن ولا اي حاجه
ساعات كانت بتمشي بالأسبوع والقربه مفيهاشي نقطه ميه وبرده عااااااااادي جدا
احيانا كتير بحس ان عربتي دي ماشيه ببركة دعاء الوالدين
وخصوصا انها في اقل من 3 شهور مشت اكتر من يوم من غير زييت خالص وبرده مفيش حاجه حصلت
شكرا لكل الأعضاء الذين تفاعلو مع موضوعى
وواضح انه كان موضوع مهم و فيه جدل كثير
و ننتظر المزيد من الأراء و الخبرات
خلي بالكو من الميه المقطره لانها في منها مضروب كمان
انا بجيب الزجاجة الصغيرة اللى ب 1.5 من بنزينة جنب البيت يعنى ضمنها اكتر من اى مكان تانى.
وبتقعد معايا كتيييييير اوى كل فين وفين لما بزود شوية . وبخلى معايا زجاجتين فى الشنطة احتياطى
هيا بس فى الاول اخدت كتير لحد ما الدورة والقربة اتملوا .
هى المية المقطرة و بس
كنت بحط مياة من الحنفية بس هاجيب مياة خضرا احسن
هو المشكلة فين بالظبط يا جماعة فى مية الحنفية ... انها يعنى فيها رواسب واملاح ولا حاجة تانية .:O_stupid[1]:
ولو دى المشكلة ما احنا ممكن نحطلها مية معدنية هههههههه:shine[1]:http://img101.herosh.com/2010/03/21/328082236.jpg
ايوه بالظبط كدة....والميه المعدنية فيها املاح برده.....الي بيستعمل ماية من الحنفية بقاله فترة يخلي باله انه لو حط مايه خضراء احتمال كبير جدا الرادياتير عنده يبقي زي المنخل لانها هاتشيل الصدا وتفتح مكانه اخرام.
مش عارف ليه الناس معتقدة أن المياه المقطرة مش حتجيب صدأ؟؟؟؟؟؟؟؟؟؟؟
يا إخوة الصدأ ليس له علاقة بتقطير المياة الحكاية أن الأملاح غير موجودة في المياة المقطرة وبالتالي تقل الرواسب كثيرا ولا يظهر الصدأ بسرعة لكن أي حديد ساخن يتعرض للمياة الخالية من الإضافات حتى لو كانت مقطرة لابد من تكوين طبقة الصدأ واسألوا أي كيميائي في هذه النقطة.
لابد من المياه التي بها مانع صدأ أو مايسمى Rust Inhibitor سواء كانت خضراء أو زرقاء أو حمراء وده شيء معروف عالمياً.
واللي عاوز يتأكد من كده ينزل المياه المقطرة من الموتور في مرة من المرات ويشوف فيها صدأ ولا لأ مش كده ولا إيه.
شكراً لكم جميعاً.
انا ليا راي لاخواني في المنتدي
اكيد كلنا عندنا تكييف
افضل ميه للردياتير هي الميه اللي بتنزل من التكيف هي افضل بكتير من الميه المقطره وعن تجربه لكل العربيات اللي في العيله قديم وحديث
وابقي جربوا وقولولي ايه الاخبار
عندى سؤال مهمو
انا اول ما استلمت العربية زيرو بعد يومين لقيت لون بنى حولين القربة من جوة لكن اللون ده بيروح في الايد عادى هل ده من مكونات المية ولا صدا واعمل ايه علشان اللون الغريب ده يروح
اللون ده حولين القربة من جوة مش فى الميه نفسها كانها رواسب
طيب الصدا يجي منين اذا كان الردياتير الومنيوم
والكوعة والموتور ستيل او مش صفيح على الاقل (على ما اعتقد) والخراطيم مطاط ؟!!!!
:rfds:
انا غيرت طلمبة الماء بسبب تلفها وتزييقها لأنى كنت باستخدم مية الحنفية