ساعدوني في اختيار عربيه في حدود 60 الى 70

**ahmedpharma** · 17-03-2010 09:12 PM

الأول السلام عليكم

يا شباب عايز رأيكم ضروري
أنا محتار في اختيار عربيه

أنا حاطط ميزانيه حوالي من 60 الى 70 و ده أخري خالص يعني بعد ال 70 دي هبقى على الحديده

أنا كان في بالي اشتري عربيه ألماني محترمه فكان في بالي 3 عربيات

1- bmw 316 موديل 92 لحد 96
2- أوبل فكترا 1600 موديل 2001 لحد 2003
3- أوبل استرا موديل 2004 أو 2005

و طبعا يهمني أن تكون حاله العربيه ممتازه و يا سلام لو أوتوماتيك يبقى زي الفل

فايه تقييمكم للعربيات دي من ناحيه الاعتماديه و اسعار قطع الغيار و الصيانه و الجوده؟؟

و لو ترشحولي عربيه من دول تكون ايه؟؟

فعلا أخوكم محتار و محتاج حد زي الأخوه اللي في المنتدى هنا يكون فاهم و يفيدني
و لكم جزيل الشكر

في انتظار ردودكم

**TheBuccaneer** · 17-03-2010 10:51 PM

Bmw e36 1993, 1994 من رأيى. و صدقنى مش هتندم فى يوم على الشراء. بس نصيحة أبعد عن السوق. دور على المواقع و فى الوسيط و ربنا الموفق, اثبت على ال bmw طول الطريق بالنسبة للأوبل أسترا هى ضيقة من الداخل ده معلومة حبيت تعرفها.

**eskenderiya** · 17-03-2010 11:17 PM

3- أوبل استرا موديل 2004 أو 2005

**lambo100** · 18-03-2010 04:02 AM

bmw316 tb3n

**mantoros** · 18-03-2010 12:51 PM

bmw for sure 1992-1994
بس مش هتلاقي 1996 نضيف بالسعر ده
لو عربية نضيفة اوي اوي ب70 هتبقي 1994
لكن طبعا السوق فيه 95 و 96 ب70 الف بس عربيات ربنا يحفظك منها..........انسي كلام التجار و الافندية الفتايين !!! مفيش موتور جديد بعد 95 و طالع و نضيفة اوي هتقل عن 75 و طالع حسب الموديل (وصولا الي 90 الف في 1997 النضيفة اوي)

و ربنا يكرمك بعربية محترمة بنت ناس يا رب...

**ahmedpharma** · 18-03-2010 10:45 PM

شكرا يا شباب على ردوكم الجميله و على مساعدتكم

الواضح أن الكل مع البي ام تمام الكلام

نتوكل على الله و ندور عليها و ربنا يكرمنا بواحده حالتها حلوه

معلش يا أخ mantoros بالنسبه لموضوع الموتور ده
أنا سمعت فعلا أن لحد 94 في موتور و بيقولو عليه الأبيض و ده وحش و بياكل كامات
و من 95 فيه موتور تاني اللي هو الأسود و ده محترم
مش عارف يا ترى ايه مدى مصداقيه المعلومات دي؟؟؟

مستني ردودكم

**TheBuccaneer** · 18-03-2010 10:53 PM

المشاركة الأصلية كتبت بواسطة ahmedpharma

شكرا يا شباب على ردوكم الجميله و على مساعدتكم

الواضح أن الكل مع البي ام تمام الكلام

نتوكل على الله و ندور عليها و ربنا يكرمنا بواحده حالتها حلوه

معلش يا أخ mantoros بالنسبه لموضوع الموتور ده
أنا سمعت فعلا أن لحد 94 في موتور و بيقولو عليه الأبيض و ده وحش و بياكل كامات
و من 95 فيه موتور تاني اللي هو الأسود و ده محترم
مش عارف يا ترى ايه مدى مصداقيه المعلومات دي؟؟؟

مستني ردودكم

يا باشا الموتور الأسود ده اسمه اما M52 أو M54. ده بيكون 2000 سى سى فيما فوق الى حد 2800 سى سى. الموتور الموجود لل E36 نوعين اما M40 او M43.

على حسب ما سمعت من ناس كثير لكن دون تأكيد شخصى إن ال M40 هو ده اللى بيأكل كامات إلخ, وده أخره ال E36 1992 او E36 1993 لكن أنا مش متذكر. عالعموم هناك موضوع فى قسم البيع والشراء بعنوان M3 engine price حضرتك هتلاقى فيه رد بأنواع المواتير ده و شكلها مع العلم إن ال M42 غير موجود بمصر.

**ahmedpharma** · 18-03-2010 11:15 PM

شكرا أخي TheBuccaneer على ردك و معلوماتك

سؤال تاني بقى صغير معلش هو أنت معاك BMW دبانه 316 ؟؟

يا ريت تقولي مميزاتها و عيوبها من واقع خبرتك العمليه مع العربيه دي

و يا ريت يا شباب اي حد عندو معلومات عن مواصفات و مميزات و عيوب ال BMW 316 92 to 96 يفيدني بيها و أبقى شاكر جدا ليه

مستني ردودكم الجميله

**Kazzaz** · 19-03-2010 03:39 PM

نصيحه هات حاجه تانيه غير البي ام الe36 ... و الاوبل استرا دي مش حلوه يعني الفيكترا افضل اختيار من اللي انت حاطط بس مره تانيه السوق في اناع كثير حلوه جدا شوف كده و بص بصه تانيه

**mantoros** · 19-03-2010 05:26 PM

شوف يا سيدي
الموتور القديم هو الm40 و هو يشاع عنه انه موتور بياكل كامات و السير الكاتينة فيه عادي مطاط بيتغير في السرفسة
و هو من 91 الي اول 94

اما الموتور الحديث هو m43 و هو الافضل بالتأكيد لانه اطول عمرا و اكثر كفائة و السير للكاتينة فيه جنزير حديد لا يتغير و هو يبدأ من اخر 94 (نادرا) و لكن معظم العربيات بهذا الموتور يبدأ من 95 و طالع

اسعار السيارات حتي 94-95 حتي 70-75 الف
و لكن السيارات من اول 96 نزل فيها كمبيوتر و abs , air bag و تكييف تاتش ديجيتال اوتوماتيك و اسعارهم تبدأ من 80 و طالع الي 90 الف للعربيات النضيفة و اعيد مرة اخري "العربيات النضيفة" اي العربيات اول يد و متصانة و دواخلها سليمة تماما و كبس الموتور محترم و ليس بها مصاريف او مشاكل...

و لا تفرح بعربية بسعر رخيص لانك في المقابل سوف تخسر كثيرا جدا جدا جدا و ربنا يحفظك
و للمرة الالف....سيبك من كلام الاخوة الفتايين و التجار في الاسعار و اسال عن عربيات البيوت اول يد
و ربنا يكرمك و يوفقك