الموضوع: سؤال عن الزواج

طبعا بعد صلاة الاستخارة
مفيش بعد رد كمال وياقوت
توكل على الله
مفيش بني ادم خالي من العيوب
ولو هي عيبها ان ابوها بخيل مش شرط تكون هي بخيلة

انا شايف ان شخصية الاب مبتأثرش بشكل كبير على البنت
الام شخصيتها مؤثره اكتر في البنت
الا في حالات بتخالف القاعده دي
حاول تعرف الام اكتر وشخصيتها
ورأيها في موضوع البخل ده
بس طبعا من تحت لتحت وبخبث شويه علشان ميبانش انك عاوز تعرف رأيها علنا بس اكيد هيوصلها ده
والاستخاره قبل كل شئ

انا رأي ان انت لازم تفكر في كذا نقطة.

أولا: موضوع بخل الأب ده انا مش شايفة فيه اي مشكلة لأن مش بالضرورة ان البخيل أولاده يكونوا بخلاء بالعكس ساعات بيبقوا مخنوقين و نفسهم يصرفوا و يفكوا على نفسهم. و زي ما الناس هنا قالتلك الموضوع يفرق لو الراجل هو اللي عنده المشكلة دي لأن الراجل هو اللي بيصرف.

ثانيا: هل المشكلة الوحيدة في اهلها هي البخل؟ يعني فيما عدا موضوع الفلوس هل هما على خلق و تعاملاتهم حسنة و لا لأ؟ لأن انت بعد الجواز حتفضل على اتصال و ثيق بيهم, فأخلاقهم و طريقة تعاملهم حتأثر عليك بعد كدة وعلى أولادك, عكس موضوع البخل ده اللي مش حيفرق معاك لأنك مش مستني منهم حاجة ماديا. يبقى مهم أوي انك تدرس أخلاقهم و تشوفها.

ثالثا: هل البنت أخلاقها كويسة و عاجباك فعلا و لا بتحاول تقنع نفسك بيها؟ اللي واضح من صيغة السؤال ان انت مستخسر البنت و مش عايز تاخدها بذنب أبوها. مهم أوي انك تكون مقتنع بيها و بطباعها و أخلاقها, مع الأخذ في الأعتبار ان مفيش حد خالي من العيوب, أنما العيب اللي ممكن واحد يتقبله ممكن واحد تاني يشوفه لا يطاق. المهم ان انت تكون مقتنع بيها تماما بعيد عن فكرة ان انت مش عايز تظلمها, لأن أكيد لو انت ما كملتش الموضوع دلوقتي أحسن ما تفركشه قدام لنفس الأسباب, فلازم تفكر من دلوقتي اذا كنت انت حابب تكمل الموضوع بمميزاته و عيوبه و لا لأ.

أخيرا طبعا متنساش تكثر من الاستخارة و ان شاء الله ربنا يوفقك للي فيه اللخير.

المشاركة الأصلية كتبت بواسطة brown-eyes

معلش يا جماعة بردو ادخل في الموضوع واسال علي شوية حاجات
هي ايه مواضفات الجوز البخيل لان محدش بيكون شايف نفسه بخيل
يعني مثلا لما اتخانق مع مراتي عشان بتخلص الشور جيل اللي هو 1 لتر في اسبوعين يبقي انا كده بخيل ولما اتخانق معاها عشان لازم تنشف وشها في في مناديل ولا يمكن تنشفها في فوطة يبقي انا كده بخيل ولما اشوفها بتنشف مرة ارضية الحمام بمناديل وازعقلها يبقي انا كده بخيل
ولما هي يكون ردها ان لو اخر ففلوس في جيبها وقدامها تجيب شور جيل او اكل هتجيب الشور وان الشور اهم عندها من الاكل وان انا كده بخيل
بجد انا بدات اشك في نفسي
انا اترددت جدا قبل ما اكتب الكلام ده لان حاسس ان الحاجات دي من اسرار البيت ومينفعش تطلع بس انا علي اخري ده غير حاجات تانية كتير بس ماينفعش تتقال
عموما يا جماعة لو حد يحب يتكلم معايا علي الخاص ياريت !

أولا ربنا يصلح لك الحال يا رب و يهدي سرك مع زوجتك.

أنا حبيت أرد على مشاركتك عشان ساعات الرجالة بيبقوا مش مقدرين طريقة تفكير الستات و العكس صحيح طبعا.
مبدأيا و متزعلش مني من وجهة نظر حريمي أه طبعا انت كدة تبقى بخيل
معلش انا بتكلم بصراحة و بحط نفسي مكان مراتك. الستات بصفة عامة المنتجات الخاصة بالعناية بالشعر و البشرة و الميك أب....الخ, اللي هي كل الحاجات النسائية دي تعتبر مهمة جدا و من الأساسيات عندهم. و هي حاولت تشرحلك ده لما قالتلك انها الحاجات دي عندها أهم من الأكل و الشرب. لما هي تحس ان انت - أسفة في اللفظ - بتقرط عليها في الحاجات دي بتبقى حاسة ان انت بتستخسر فيها, لأن دي تعتبر الحاجات الوحيدة في طلبات البيت اللي خاصة بيها هي. طبعا انا مقدرش احكم و لا أحب أسالك اذا كانت الحاجات دي بتقصر معاك في الميزانية فعلا و لا انت بتتكلم فيها من باب عدم الأسراف, انت بس اللي تعرف ظروفك, انما اللي بحاول أوصلهولك ان المشكلة الأساسية ان انت بتبص للحاجات دي باعتبارها رفاهيات ممكن التقليل منها و هي شايفاها أساسية.

ثانيا واضح من عرضك للمشكلة ان انت المسئول عن ميزانية البيت, طيب ليه متحاولش تشركها معاك في الميزانية أو حتى تديلها مصروف البيت و هي تتصرف, عشان أولا هي تقدر الألتزامات و الظروف اللي بتخليك تدقق على الحاجات دي, ثانيا عشان تتأكد ان انت مش بتتعمد تستخسر فيها. أعتقد لو عملت كدة ممكن تلاقيها هي من نفسها بتراعي حاجات كتير عشان حتبقى مقدرة ظروفك. في نفس الوقت انت ممكن تقتطع جزء معين تديهولها يبقى زي مصروف شخصي ليها و للحاجات الشخصية بتاعتها بعيد عن مصروف البيت عشان تحسسها انها مش طول الوقت مخنوقة و مستنياك تتعطف عليها بالحاجة اللي هي محتاجاها. معلش انا عارفة ان كلمة تتعطف عليها دي بايخة بس أنا أتعمدت استخدمها عشان أحاول أوصلك هي ممكن تكون حاسة بأيه.

النقطة الأخيرة اللي لازم تاخد بالك منها ان الخلافات على الأمور المادية دي من أكتر الحاجات اللي ممكن تهز العلاقة الزوجية و تخليها متوترة. لازم تتكلم معها و تفهمها - و الكلام ليك انت كمان - ان فلوس الدنيا كلها متساويش ان انتوا يبقى فيه سكينة و صفاء في علاقتكوا ببعض. مينفعش الكلام في الماديات يبقى سبب للخناق و انكوا تبعدوا عن بعض, بالعكس حتى لو فيه ضائقة مادية الزوجين بيمروا بيها في أي وقت المفروض يكونوا بيتعكزوا على بعض عشان يعدوها. مفيش ظروف في الدنيا مبتعديش و المركب بتمشي, بس تعاملنا خلال المواقف و الازمات المخلفة هو اللي بيفرق وبيخلينا قدام يا أما نبص على المشاكل و المحن و نلاقي انها قربتنا من بعض أكتر يا أما بنلاقينا سبنا الظروف تبعدنا عن بعض.

و في الأخر بدعي ليك و لينا كلنا أن ربنا يوفقنا مع أزواجنا و يجعل بينا كل خير و مودة و رحمة.

المشاركة الأصلية كتبت بواسطة مؤمنة

انا شايفه ان حضرتك مش لاقى فى البنت الحاجات ال رسمها لشريكة حياتك وبالتالى اى حاجه صغيره حتشوفها فيها او فى العائله هتتفسر بشكل تانى خالص
والطبيعى فى فتره الخطوبه ان العريس هو ال يبين كرمه وبزياده شويه علشان اهل العروسه يبقوا مطمنين على بنتهم
يا ريت تصلى استخاره وما تظلمش البنت معاك

موضوع الكرم دة موضوع نسبى ممكن تحديد ايه هو الكرم بالظبط
من واقع تجربتى انى انا خطبت 3 شهور من اسوا 3 شهور بالرغم من الادب والاخلاق العاليه
انما الطبع يغلب التطبع
وللعلم ان كل الجيل من البنات مش عندهم اللى موجود زمان عند ام وجدة كل واحد وهى (ان الست لازم تتطبع بطبع جوزها) دلوقتى اسهل حاجة تقول انا كدة واتربيت على كدة
زى ما فى مثل يقولك (بلدك هى المكان اللى فيه جوزك)دلوقتى انت لازم تاخد شقه قريبة من امها
ولو ما اخدتش تقولك نعيش مع ماما ونروح بيتنا خميس وجمعه كانها شقة فى مصيف
انا عارف انى طولت عليكوا
بس موضوع الزواج موضوع شائك واستحاله هنلاقى اتنين متفقين على راى لان كل واحد له نمط حياه حابب يعيشها زى ما هو راسمه بين متعه الدنيا والالتزام بالدين
اما موضوع ان الاب بخيل دة ممكن يكون حرص مش بخل (الراجل تعب وشقى فى الفلوس اللى عملها)رايى الشخصى ان لو هى بخيله او اتعودت على كدة فى بيت ابوها دة مش مشكله لانها ممكن تتعالج مع الوقت
الاصعب موضوع الكدب نصيحة منى لو مافيهاش ولا عيب الا الكدب سيبها احسن لان دة مش هايتعالج لو لفيت مستشفيات ومصحات العالم كله (مرض مزمن)