مأساه شراء سيارة تويوتا من تويوتا فرع العباسية!!
مكنتش ناوي اتكلم عن القصة دية ومش من عادتي اني ازم في حاجة او حد بس حبيت اوضح المأساة الي دايرة في تويوتا . مش تشهير حاش لله لكن علشان لازم نشوف حل والدنيا تتصلح.
الي شجعني اكتب القصة ديه اني لقيت اكثر من واحد مش مبسوط من سياسة المبيعات والتسويق لتويوتا مصر
من حوالي شهرين اخويا الي اصغر مني اشترى سيارة كورولا2010 اوتوماتيك عادي ادفانسيد من تويوتا مصر المركز الرئيسي الي في العباسية.
طريقة التعامل في منتهى السوء والإستهتار وزي ميكون بتدفع نصف ثمن السيارة وبيدوك الباقي هبة او بيمنوا عليك انهم يبيعولك تويوتا مع انه استلم بعديها بأكثر من شهر!! ودافع 50 الف مقدم ودفع الباقي قبل ميستلم والله!!... والله ندمت اني دليته عليهم مع أن الواحد اتعامل معاهم بما يرضي الله ودخل وحجز زي الناس مبتحجز مردتش الجأ لواحد زميلي شغال هناك وكان هيخلصني ويسلمني بسرعة سواء من التوكيل او من معارض تانية وده كلة لان اخويا اتعرف على العربية واتشرحتلة (شرح سطحي جدا) من احد ممثلي المبيعات فعملنا بالأصول وكملنا مع ممثل المبيعات.
ومع ذلك واخذ العربية من غير الطبب الأمامية وجابوهالوا بعدها بأسبوعين ومسلموش الولاعة غير بعد مرجعلهم ومحدش شرحلوا العربية ولا سلمهالوا والي كان واقف معانا زميلي مش الي باعهالوا!!! وبردة نسيوا يدونا الكتاولج وطلبناه منهم بصراحة قمة الإهمال والإستهتار
والغريب ان ده صدر من مدير مبيعات تويوتا مصر !! واحد ممثلي المبيعات
وعمل شكوى فيهم ولا حس ولا خبر
فعلا حرام تويوتا ترضى ان يكون من يمثل المبيعات عنها في مصر بالشكل ده
انا مبحبش اتكلم عن حد بسوء بس ده ظلم في المعاملة.
علما إني لما شتريت النيسان من السبع والله الناس كان ناقص يشيلوني يركبوني في العربية:) ومتابعة وتسليم ولا اروع وشرح وظائف كل حاجة وتحربة كل حاجة لدرجة إني زهقت وكمان بعتوا واحد معايا رخصلي العربية وانا قاعد وي الباشا
وعربية نيسان صني ب 93 الف جنية مش تويوتا كورولا ب 160 الف جنية!!
ناهيك عن ضعف السياسة التسويقية الي كلنا شفناها في تسويق ال كورولا ذات فيتيس mmt وسوقوها على انها الجيل الجديد من ناقل الحركة الأوتوماتيكي!!
وكله في الأخر جه على دماغهم. وعلى حساب سمعتهم. مش بتكلم على ازمة تويوتا لأن تويوتا شركة محترمة تحترم العميل حتى لو اخطأت بتديله حقة وبتعتذر وده عكس تماما مع يحدث في مبيعات تويوتا مصر.
انا هنا بتكلم على واقع حصل معانا من ممثل مبيعات ومدير مبيعات جميع الفروع ومن قسم الشكاوي الي لم يكلفوا انفسهم عناء الإتصال بعد الشكوى.
لكن طبعا فيه ناس كتير محترمة في تويوتا لا اشك لكن النماذج ديه في المناطق ديه مش مقبولة إطلاقا.
وتقبلوا تحياتي
م/ احمد علاء
