الموضوع: حاجز السيفيك وعندى مشكلة

بص يا باشا انا رأى انك عارف ابنك اكتر مننا اذا كان حريص و عاقل و غير متهور و بيتحمل مسؤلية العربية يبقى استنى السيفيك و ابقى علمة عليها اصل هية اوتوماتيك و سهلة القيادة المشكلة فى الزوايا و هوة واحدة واحدة و بالراحلة حيتعود و لازم هوة يكون عاوز يتعلم السواقة و ياريت فى الأول تقولة ازاى يسوق و توريلة انت و تقولة شايف كذا و كذا و خد بالك من كذا و بعدين روحو فى حتة فاضية خالص و خلية يطلع و يرجع و يلف بالعربية كذا مرة لمدة 3 ايام كدة و بعدين خدة فى الشوارع تحت البيت و طبعا تكون جمبة و ياريت متوتروش و هوة سايق يعنى متقولوش حاسسسسسسسسسسب مرة واحدة او خد بالك بصوت عالى و كدة خلية هوة يتولى الأمور و لو فية اى ملاحظة ياريت تبقى بالراحة و بهدؤ و واحدة واحدة بعد ما يكون خلاص عارف الزوايا و قادر يسوق على الطريق تطلع معاة فى شوارع ضيقة يعنى حارة واحدة ( زى الترام عندنا فى الأسكندرية ) و تعودة انة يبص فى المرايات و ازاى يظبطها و واحدة واحدة تخلية يخش فى مناطق زحمة و بتمشى بالراحة و تخلية يسوق و برضة و انت جمبة و بعدين تبدأ بقى تقولة لما تتأكد انة خلاص بيسوق كويسة انزل مثلا اركنلى العربية فى الحتة دية او غيرلى مكانها او لفها و كدة و يكون لواحدة و انت متبقاش جمبة اقصد انك تبقى مثلا واقف على الرصيف و تشوف حيتصرف ازاىو بعدين تبدأ تخلية يمشى فى طرق سريعة شوية ( مش قصدى الصحراوى لأ فى مناطق السرعة فيها كويسة مش بطيئة ) زى البحر عندنا فى الأسكندرية و تبقى جمبة و تقولة ازاى يمشى فى حارتة و ازاى يغير الحارة و لازم يدى اشارة و الكلام دة و يبص كويس فى المرايات و تفضل معاة كام يوم كدة و بعد ما تتأكد انة خلاص بيسوق كويس ابقى سيبة بقى هوة حيتعود لواحدة على الطريق و الكلام دة و لو انت خايف على السيفيك و دة طبعا حقك :) تشتريلة مثلا 127 فى الأول حالتها جيدة و بعدين تبقى تبيعها و الميزة فى الحكاية دية انك مش حتخسر فيها يعنى لو اشتريتها ب 17 حتبيعها ب 17 برضة او 16 و بلاش مثلا 128 حتكون اغلى و ال127 عربية كويسة يعنى معقولة

و فى النهاية دة رأى الشخصى و ممكن يكون لحد تانى رأى اخر و شكرا

سيدى الفاضل صاحب الموضوع
أولا :- مبروك على السياره و ربنا يديك خيرها و يبعد عنك شرها
ندخل بقى فى الموضوع
علمه السواقه بنفسك على السيفيك فى أى منطقه واسعه و فاضيه بالطريقه اللى هقولك عليها
فضى نفسك ساعتين فى اليوم لمده يومين
هات عوائق على قد ما تقدر ( أقماع صغيره أو كبيره اللى بيحطوها فى تدريبات الكوره أو أزايز ميه بلاستيك مليانه أى حاجه تبقى ثابته على الأرض و متضرش العربيه لو خبطت فيها أو داست عليها ) و خليه يعدى ما بينها بطريقة الزجزاج
هات نفس العائق اللى استخدمته و اعمل بيه مكان للركن و خليه يركن فيه بضهر العربيه ( بواسطة المرايات متخليهوش يبص ورا )
اعمل حرف S بواسطه استخدام نفس العوائق و خليه يروح عادى و يرجع بضهره ( برضه بالمرايات ) و كرر الموضوع ده كتير لحد ما تحس انه بقى بيلعب بالعربيه و بعدين اعمله حرف M و كرر الموضوع ( يروح بوشه و يرجع بضهره ) و بعدين خليه يلف بيك بين العمارات اللى جنب البيت فى وقت يكون فيه الشارع فاضى و بعدين اطلع معاه على طريق عادى و متخليهوش يجرى و اتفرج على تحكمه فى العربيه مع العلم انك تقوله سيب مسافه بينك و بين اللى قدامك و تعرفه كيفية استخدام الاشارات مثلا قبل ما يلف يدى اشاره بمسافه كافيه و قبل ما يركن يشغل الانتظار و الحاجات دى
بعد اليومين
مبروك
ابنك بقى أستاذ سواقه و هيسوق أحسن منك و هتنبهر فى تحكمه الرائع بالعربيه
و هتديله العربيه و أنت مطمن عليه و على العربيه