الموضوع: ظاهرة no love

المشاركة الأصلية كتبت بواسطة ramylancer

انا كمان لسه منفصل عن خطيبتى بسبب انى مع الاسف محترم ومش لافف وداير وطول عمرى مش عاوز ارتبط ارتباط عادى وكنت بقول ان الواحد لازم تكون مراتى اول واحده فى حياتى بس عموما معظم البنات كده هتريحها هتتعبك ولو تعبتها هتريحك انما تبقى محترم وبتحها وحنين معاها ومش مخلي نفسها فى حاجه هتتنمرد

المشاركة الأصلية كتبت بواسطة ramylancer

وعموما البنات عاوزين واحد تفصيل بمعنى انها عاوزه يغير عليها وقت ما هى عاوزه يغير عليها ويكون حنين معايا وقت ما هى عاوزه يكون حنين معاها و ينفذلها طلباتها وقت ما هى تكون عاوزه كده ويتنرفز عليها وقت ما تكون هى عاوزه يتعفرت عليها

بالنسبة للردين اللي فوق دول رغم انهم بيتناقضوا مع الرد الأخير ده:

المشاركة الأصلية كتبت بواسطة ramylancer

والبنات اهم حاجه انك توازن معاهم لانك فى حاله انك بتحب واحده لو كنت بتغير عليها و بتقفش عليها وخروج لأ واللبس ده مش هينفع و الميك اب ده اوفر هتقول عليك خنقه ورخم وسجنها وهتضطر انها تكذب عليك علشان تعمل اللى هى عازاه و لو كنت برضه بتحبها و مدلعها ومش مخلى نفسها فى حاجه و بتخاف على شعورها و لو غلطت بتصبر عليها هتقلب عليك وتقول ده مش محسسنى انى مخطوبه و مهودنى فى كل حاجه حتى لو كنت انت مديها الثقه علشان انت بتحبها ومستنى انها تبقى اد الثقه ده فالمهم انك توازن بين الغيره والحنيه والدلع والقفش

اللي عجبتني اخر حتة فيه (وهي التوازن) لإن فعلا التوازن ده اهم شئ ومطلوب من الطرفين على فكرة لإن برده الرجل ميحبش البنت اللي مهتمة بيه زيادة عن اللزوم (عشان بتخنقه) وميحبش البنت اللي سايباه براحته ومش بتغير عليه خالص ( لإنها يإما باردة ومبتحبوش يإما بتخونه هي كمان) وكتير من الصفات اللي التوازن فيها مطلوب بشدة.
لكن في عندي تعليق بسيط ياريت لو تتقبله مني.
مش شرط تكون انفصلت عنك عشان انت مش لافف وداير ولا بتديها على دماغها والاسباب دي خالص
الانفصال ليه اسباب معلنة (يقبلها المجتمع والأهل والعريس والأصدقاء الغير مقربين اوي) واسباب اخرى غير معلنة لايعلمها سوى العروسة نفسها وفي بعض الأحيان الأصدقاء المقربين بشدة.
من ضمن الأسباب المعلنة اللي هي : اصله مش بيغير عليا اصله مش حنين اصله مش لافف وداير اصله ...... الي اخره من الأسباب في حين ان السبب الحقيقي ممكن يكون عدم الإرتياح والتوافق النفسي بين الإتنين أو صفة معينة في الطرف الأخر هي معرفتش تتكيف عليها (واللي من وجهة نظر الناس ممكن تكون تافهة وتعدي لكنها بالنسبة ليها Fatal Error) واللي مينفعش تتقال صراحة عشان متجرحش الطرف التاني أو تخلي الناس تقول عليها انها بتفتري وبتتنمرد مثلا.
لكن مفيش بنت هاتكون بتحب واحد وهو بيحبها بجد وفي مساحة تفاهم بينهم هما الإتنين كافية انها تتمم الموضوع بأقل نسبة مشاكل معتقدش ابداً انها هاتتنمرد عليه او تسيبه عشان مش لافف ومش داير والحوارات دي لإن بإختصار اللافف وداير ده عمره ماهيريحها وهايحملها فوق طاقتها وهايفضل طول عمره يقارنها باللي لف ودار معاهم وعمرها ماهتعرف ترضيه وحتى لو عرفت ترضيه لفترة مؤقتة بعد فترة هايزهق منها ويرجع يلف ويدور تاني برده (لإنه اصبح طبع فيه) فمش من مصلحتها ابدا انها تسيب واحد عشان مش لافف وداير.
الست بتكون محتاجة راجل يفهمها ويفهم طبيعتها (وحط مليون خط تحت كلمة طبيعتها دي) اكتر من انه يكون لافف وداير ومقطع السمكة وديلها لإن في رجالة لافين ودايرين كتير ومع ذلك ميفهمش طبيعة المرأة واحتياجاتها برده.

المشاركة الأصلية كتبت بواسطة Most_H

اولا بحييك على توقيعك بشدة!!!!!!!!!!!!!!!!!!!!!!

تانية جاحة، ممكن توضح ازاى ردين ramylancer الاولنيين متناقضين مع الرد الاخير؟؟؟

ميرسي يافندم بس اصلي لسة مقروصة من الموضوع ده في كذا موقف فمتنرفزة من موضوع تعدية الشارع دون الإلتفات لحركة السيارات واتجاهها.

بالنسبة للتناقض فهو كالتالي:
جملة "معظم البنات كده هتريحها هتتعبك ولو تعبتها هتريحك انما تبقى محترم وبتحها وحنين معاها ومش مخلي نفسها فى حاجه هتتنمرد"
وجملة "وعموما البنات عاوزين واحد تفصيل"

معناهم ان البنات صعب ارضائهم وانهم مبيعجبهمش العجب وانك مهما عملت حاجات كويسة معاها هاتتنمرد عليك وتتعبك
وانا شايفة ان ده بيتعارض بشدة مع الرد الأخير اللي فيه جملة "والبنات اهم حاجه انك توازن معاهم "
يعني المشكلة مبقتش في البنت دلوقتي المفروض التوازن ده الراجل هو اللي يعمله ويعرف امتي يشد عليها وامتي يصالحها وامتي يغيب عنها وامتي لازم يكون قريب جدا منها.
التوازن ده مطلب طبيعي جدا في كل علاقات الدنيا كلها لإن القاعدة بتقول إن "الشئ اللي يزيد عن حده يتقلب لضده" مش كدة ولا إيه؟

عموما مش معني ان بنت رفضت ولد يبقي الولد ده وحش أو فيه عيب مثلا او ده شئ يسيئ ليه ابدا بالعكس ممكن تكون المشكلة عندها هي وهو في طبع ممكن يكون كويس مع بنت تانية لكنه مش متماشي معاها هي شخصياً.
وكتير جدا بنشوف اتنين ممتازين وكويسين جدا لكنهم مينفعوش مع بعض ابداً وده لايقلل ابداً من شأن اي حد فيهم.
قال عليه الصلاة والسلام : " الأرواح جند مجندة ماتعارف منها ائتلف وما تناكر منها اختلف " متفق عليه .