اكيد لازم ادافع بحكم اني بنتمي لهذه الفئة (الستات) اللي مفيش مرة تيجي سيرتهن الا وتنهال عليهن جميع انواع السباب والشتائم والدعاوي ويصب الرجال كامل غضبهم عليهن وكأن ربنا خلقنا عشان نعذبكوا مثلا مع ان ربنا خلقنا نكمل بعض مش نعذب بعض.
بس يعني ايه "مفيش دعم اما نشوف هاتوصلي لفين" مش فاهماها الجملة دي
وعموما رغم اني دافعت (عن نفسي بما اني بنت يعني) لكني لم انفي الأخطاء اللي بتقوم بيها بعض السيدات في السواقة يعني متحيزتش وقلت ان كل الستات فلة شمعة منورة والرجالة دول كخة ويع وياي.
انا قلت كل جنس فينا ليه اخطاؤه وعيوبه وطبيعته المختلفة عن الجنس الآخر بس احنا لحد دلوقتي مش قادرين نتكيف على الإختلاف ده او حتى نتقبله.
اما بقي حكاية انكوا لو مضايقتوناش هاتضايقوا مين؟ فدي مشكلتكوا انتوا مش مشكلتنا احنا ولو عاوزين تضايقونا اوكي Peace الميدان واسع وفارس لفارس بس استحملوا النتيجة بقي ومحدش يرجع يعيط (وعلى الباغي تدور الدوائررررررررر )
هههههههه
والله يادوللي انتي شكلك بتعاني زيي من الموضوع ده وبيحصلك مواقف كتير تشل زي اللي انا بشوفها
المشكلة ان كل اسبوعين أو كل شهر ع الاكثر تلاقي موضوع جديد اتفتح يحمل نفس محتويات الموضوع ده
- مرة تعمل ايه لو لاقيت ست سايقة قدامك بطيئة
- تعمل ايه لو لاقيت ست سايقة وراك وريحت عليك
- تعمل ايه لو لاقيت سايقة على يمينك وكسرت عليك
- تعمل ايه لو لاقيت ست سايقة على شمالك وكسرت عليك برده
- تعمل ايه لو لاقيت ست سايقة البراشوت فوق العربيات وبتفكر - تعمل هبوط اضطراري على سقف عربيتك
- او سواقة الستات ربنا ياخد الستات منهم لله الستات الهي يجيلهم ويحط عليهم الستات
- او نفسي الستات يبطلوا سواقة ويبطلوا يخرجوا من البيت ويبطلوا يتنفسوا خالص
يعني كلها مواضيع تدور حول سلوك الستات ومدي القهر اللي حاسين بيه الرجالة ياعيني من التعذيب اللي بنعذبلهم كل يوم.
عارفة انا بفكر اطلب من الإدارة انها تعمل كل شهر Event كدة عنوانه سواقة الستات خش فضفض براحتك
بحيث انه يبقي فرصة كويسة لكل الناس اللي مقهورة من سواقة الستات انها تخش تنفس عن نفسها وتعيد وتكرر الكلام اللي بيقولوه كل مرة عن الموضوع ده
زي بالظبط الشباب اللي كل خميس بالليل ينزلوا يقعدوا ع القهوة مع بعض ينعوا همهم ويلعبوا طاولة ويشربوا كاكاو وكل خميس لازم يعملوا الطقوس دي ومبيزهقوش منها ابداً بالعكس ممكن يتخانقوا مع زوجاتهم لو حصل ظرف خلاهم ميروحوش حديث الخميس بتاعهم ده .
ودي موسوعة ايه دي بقي ان شاء الله
اكيد موسوعة مجانين ع الطريق
او موسوعة اللي عايزين يضربوا بالنار مش كدة
ولا موسوعة الإنتحاريين؟
هههههههههههههههه
هو موقف مستفز
بس انا برده مرة لاقيت واحد سايق وبياكل
وتخيل بياكل ايه
كشـــــــــــــــري
ايون
ماسك علبة كشري في ايده وبالمعلقة وعمال ياكل وكوباية الشاي اكيد موجودة جنبه عشان يحبس
وامبارح واحد كسر عليا عشان بيولع السيجارة (وساب الدريكسيون خالص وعربيته اصلا بتحدف) ومش حاسس بإنه عمل اي حاجة غلط خالص .
السؤال هنا بقي البنت اللي كانت بتعمل كدة ارتكبت خطأ ع الطريق يعني كسرت على حد او ريحت على حد او تسببت في حادثة لأي حد؟
طبعا مش معني كدة اني موافقة على سلوكها بس مجرد سؤال يعني
بس الستات عموما عندهم قدرة انهم يعملوا كذا حاجة مع بعض بدون مايفقدوا تركيزهم
يعني بتلاقيها بتقلب الأكل ع النار وبتسمع الراديو وبتتكلم في التليفون وشايلة ابنها وبتديله الببرونة.
عادي جدا
الرجالة بقي مفيهومش الصفة دي خالص يحبوا يركزوا في حاجة واحدة بس (ولما يخلصوها يدخلوا في اللي بعديها) ولو حد اتكلم جنبهم وهما بيكتبوا حاجة مثلا مبيبقوش سامعينه اصلا
مش عاملين نفسهم مش سامعينه
لأ فعلا حاسة السمع عندهم بتكون مفصولة تماما .
لكن ده بصراحة ميشفعلهاش خصوصا ع المحور يعني دي بتستهبل بجد
طب كانت تعملها في طريق زحمة شوية مش طريق سريع .
المفضلات