الموضوع: ممكن مساعدة

معايا لانسر 1300 موديل 2005
عندى مشكلة ان عداد البنزين مش بيقرا روحت للكهربائى غيرلى العوامة جبتها ب 150 جنيه
و اشتغل العداد تمام الف كيلو و رجع ما يقراش تانى
هو فين المشكلة

99% العيب من العوامة و ممكن تكون العوامه الجديده باظت هى كمان بعد 1000 كيلو لأنها واضح انها مش أصلى لأن الأصلى أكتر من 150 جنيه على ما أعتقد و البشمهندس طارق ممكن يقولنا سعرها فى التوكيل كام؟

أنا كنت جايبها أصلى و لكن مش من التوكيل ب 300 أو 350 مش فاكر بالضبط بس أكيد هى فى التوكيل أرخص لأن محلات قطع الغيار لما بتبيع الأصلى فعلا بتاع التوكيل بتبقه مزوده عن التوكيل عشان تكسب فيها و أنا للأسف كنت ساعتها مستعجل و عاوز أخلص و التوكيل محتاج مشوار الصبح فى معاد شغلى أو الإنتظار يوم الجمعة عشان طبعا أجازه و أروح فرع بيع قطع غيار الكيت كات بيبقه فاتح يوم الجمعة من قبل الصلاه....


بمناسبة الكلام ده انا بطالب التوكيل من خلال البشمهندس طارق بإن يكون فيه فرع بيع قطع غيار قريب من مصر الجديده و ليكن فرع بيع قطع الغيار بتاع مركز جسر السويس بس يكون فاتح لوقت متأخر من الليل هو و فرع الكيت كات كمان عشان مثلا لو أنا عند الميكانيكى بتاعى بالليل و ليكن الساعه 10 مساء مثلا و عاوز أحصل على قطعة غيار أصليه من التوكيل يكون متاح ليه بدون اللجوء لمحلات قطع الغيار العاديه اللى هى طبعا بتكون سهرانه و ساعتها بتكون هى الحل الوحيد فى مثل هذه الظروف و لو حد عنده الأصلى هيستغل كده و بيستهبل فى السعر و اللى يغيظ انه بيحلف ان التوكيل بيبعها أغلى؟؟؟؟؟!!! و أنا ببقه عارف سعرها فى التوكيل و عارف انه كداب.

الخلاصه عشان انا رغيت كتير...........أنا بأطالب بسهر منافذ بيع قطع الغيار التابعه للتوكيل لوقت متأخر من الليل.