الموضوع: ايه أغبى حاجة عملتها بعربيتك

كنت فى اشارة الجلاء بالدقى وواقف ولقيت التاكسى ورايا عمال يدى كلاكس ومش بس كدة ده بيزقنى بالعربيه رحت نازل ازعق لقيت الناس كلها بتقولى ايه يا بك ايه ياحاج
انت عمال تريح بضهرك على الراجل وهو يكلكس ولا انت هنا طبعا وشى جاب الوان وسكت ومش عارف ارجع العربية ولا اتأسف ولا اعمل ايه
مرة تانيه فى اول الهرم فى شارع بينفذ على خاتم المرسلين وفى تقاطع والناس الى فى التقاطع مصرين يخشوا برغم ان طريقهم واقف وقفلوا على بصراحة اتجننت لانى كنت متاخر على الشغل وبوصل المدام قمت متنرفز وقافل على الكل وشادد الهاند وساحب المفاتيح ونازل من العربية وبزعق ومتنرفز وانا ضغطى عالى المهم من النرفزة معرفتش اقول ولا كلمه صح من الزعيق والتهديد بعدم المشى
وطبعا الناس ضحكوا والمدام ضحكت
وواحد قالى ياحاج انت راجل طيب صلى على النبى وامشى وحقك على
انا طبعا انا ضحكت ومشيت

طبعا الواحد اخطاءه كتير مره كنت بجري ورا عربيه باسات وكان راكبها راجل كبير وكان معايا العيله وحمايا وحماتي كنا خمسه المهم الراجل يشد بالباسات وانا عاوز اثبت للي معايا اني راكب احسن عربيه في العالم وصلنا 170 بعد شويه انا هديت لاني اتزنقت بين عربيات بتاع الباسات طبعا اختفي ومعنتش شايفه قولت هيروح مني فين هجيبه يعني هجيبه فوجئت وانا علي 160 اني طالع كوبري علوي ونزلت من الكوبري لقيت ملف جامد جدا طبعا انا شوفت الملف وروحي راحت العربيه صفرت ومالت جامد انا اعتقد انها يمكن مللي وكنا بالسلامه واللي كانو معايا نزلو صويت لكن الحمد لله ربنا ستر من يومها وانا معنتش بشد مع حد خالص الكلام ده كان طريق المنصوره القاهره

على طريق المحله طنطا ....
ماشى حوالى 175 او 180 ...
طبعا سرعه كبييييييره جدااااااااااااااا
لقيت ادامى عربيه مرور فى اليمين ..
و جمبه عربيه تانيه مش فاكر ايه ..
المهم قلت انا لو فرملت هفرمل جااااااامد اوى و ممكن متجبنيش ...
قلت اخد غرزه...
هوووووب
داخل الغرزه ...
اكتشفت انها متجبنيش اصلا ...ههههههههههههههههه
لانى كنت سرحان ابص اشوف عربيه المرور راكبها عسكرى بس ولا معاه ظابط ..!!
مش عايز اقولها الحركات الى عملتها بالعربيه فى نص الطريق ..
وااااااااااااقف على الفرامل ..
و عمال اجيب العربيه يمين و شمال على ما تهدى ...
و الحمد لله عدت على خير ...

مره تانيه معدى من ادام معرض عربيات فى طنطا ..
و الطريق ادامه واقف ...
صحبى بيقولى بصصصصصصصص العربيه دى ..
اديرت ابص ...
و سرحت
طاااااااااااااااااااااااا اااااااخ
دخلت فى الى ادامى هههههههههههه


مش فاكر ايه تانى بس المواقف كتير !!ههههههههه

غلطه عمرى انى جريت ورا بى ام فى صلاح سالم و مشين على 100 تقريباً مش بجنون وعلى الشمال , عربيه اصفر كنارى 127 عايزه تلف و ترجع , انا لمحت حاجه صافره دخلت قدام البى ام و نور فرامل البى ام نور و العربيه وقفت و اتسوحت انا وكل الناس الورايا و لقيت واحد معدى من جمبى بالفرامل و فى ظرف ثانيه الطريق كله كان حيلبس فى بعضه انا اساساً لحد دلوقتى معرفش وقفت ازاى من غير مدخل فيه دى الفرامل قفشت و زحلقه و عينى وجعتنى و صدعت و رجلى سابت و هو ولا الهوا ولا كأنه كان ماشى على 20 , من سعاتها و انا استحاله امشى ورا بى ام تانى

انا كنت ماشى فى طريق زراعى بسرعه
والرؤيه كانت صعبه من الاتربه
ومره واحده اتفاجئت بمطب عالى جدا
ولحظات وطوخ طاخ طوخ
ومش عارف مين اللى طفى النور ساعتها
والحمد لله كانت شوية خساير بسيطه

المشاركة الأصلية كتبت بواسطة m2die4

غلطه عمرى انى جريت ورا بى ام فى صلاح سالم و مشين على 100 تقريباً مش بجنون وعلى الشمال , عربيه اصفر كنارى 127 عايزه تلف و ترجع , انا لمحت حاجه صافره دخلت قدام البى ام و نور فرامل البى ام نور و العربيه وقفت :c_laugh[1]: و اتسوحت انا وكل الناس الورايا و لقيت واحد معدى من جمبى بالفرامل و فى ظرف ثانيه الطريق كله كان حيلبس فى بعضه انا اساساً لحد دلوقتى معرفش وقفت ازاى من غير مدخل فيه دى الفرامل قفشت و زحلقه و عينى وجعتنى و صدعت و رجلى سابت :c_laugh[1]: و هو ولا الهوا ولا كأنه كان ماشى على 20 , من سعاتها و انا استحاله امشى ورا بى ام تانى

هو يا باشا كلوكوا بتجروا ورا البي ام ولا ايه

أنا بقى عملت حاجه مش متخيل الغباء دا جالى منين!
مره كنت بجرى على مصر السويس بعربيتى القديمه
وهفت فى دماغى أشوف لو دوست فرامل وبنزين العربيه هتمشى ولا هتقف
غباء غباء مستحكم
وعلى 100 كم فى الساعه روحت ضارب فرامل بالشمال مع بنزين باليمين
طبعا العربيه فرملت فرمله!
غير صوت الفرمله الى سورنى
كان فى أصوات ناس بتنده على حيوانات
وماشاء الله أبويه أتشتم وأمى أتبهدلت وأجدادى وأسلافى
و كل فرد فى العيله أتشتم فى اليوم دا
أنا بعدها كنت ماشى واحده واحده من هول الصدمه
عايز أقول أنى كأنى كنت ماشى وكل الناس الى ورايا بيعدوا واحد واحد يشتمنى وأنا طبعا مقدرش أرد
أتذليت فى اليوم دا وعمرى مهنسى قد أيه أنا كنت "حمااااااااااااااار" :))

المشاركة الأصلية كتبت بواسطة cryptonx

اول ماكنت بتعلم سواقة ... واحد طلع من uturn قدامي بعربية شاهية و خمس في ال uturn و حرق و طلع !

قلت انا مش اقل من الشاهين ... و رحت عامل زيه .. بس طبعا متوقعتش رد فعل السيارة و النتيجة اني لفيت نصف لفة و كنت حكمل في الرصيف .. علشان تاخر رد فعلي في رد الدركسيون .. و طلعت ,, و الناس ضحكت عليا .. و بطلت الف من ال u-turn ده من ساعتها :)

جامد أوى الموقف دا :))))))
وحته أنك لما تعمل حاجه غلط فى مكان متعتبوش تانى
أنا كدا بردو :)))))