رجاءا المساعده من المحله لسيتى ستارز

**dr_tamer_sh** · 27-03-2010 08:57 PM

كنت عاوز اعرف ايه الطريق الافضل لسيتى ستارز لو انا جاى من المحله يعنى طريق مصر اسكندريه الزراعى علما بانى فى طرق القاهره صفر ولا اعرف اى شئ نهائيا

**Khaled_Nowaihy** · 27-03-2010 09:12 PM

بعد نهاية الطريق الزراعى والمؤسسة
تمشى لغاية كوبرى عبود
تنزل يمين من تحت الكوبرى تبقى فى طريق السواح
تمشى فيه لآخره حتلاقيه بيلف يمين
تبقى وصلت الزاوية الحمراء ... حتاخد شمال شارع سكة الوايلى
تمشى فيه على طول لغاية آآآآآآآآآآخره كوبرى ينزلك فى منطقة كوبرى القبة بجوار كلية الفنية العسكرية
تكمل وتطلع بعد ذلك كوبرى الفنجرى ,, بعد ماتنزل منه حتلاقى أرض المعارض على اليمين واستاد القاهرة على الشمال
كمل على طول ... سوف تتقاطع مع طريق النصر ... تدخل فيه شمال (يمين-U turn- شمال)
تمشى فيه على طووووووووووول
حتلاقى على يمينك الآتى:
- جامعة الأزهر
- المنصة
- حا تعدى شريط مترو يبقى ده تقاطع يوسف عباس
- مسجد رابعة العدوية (تقاطع شارع الطيران)
- محطة بنزين مصر للبترول - تبقى وصلت تقاطع شارع عباس العقاد
- التقاطع التالى مكرم عبيد
- التقاطع اللى بعده اسمه احمد فخرى ... حتاخد اول U-TURN بعديه وبعدين أول يمين تلاقى سيتى ستارز على الشمال.

**dr_tamer_sh** · 28-03-2010 04:56 PM

متشكر جدا على سرعه الرد بس كان ليه استفسارات بسيطه:
1- بالنسبه للطريق الدائرى واضح كده انه اسهل ولكن اعتقد هيكون طويل جدا مش عارف رأيكم ايه؟؟؟؟؟؟؟
وبالنسبه للدخله السمسن اللى عند مدينه السلام دى هل دى هى اللى عند موقف العاشر ولا دخله تانيه؟؟؟؟؟وهل الكوبريين اللى هطلعهم دول هم كوبرى الهيكستب وكوبرى ال 4,5 ولا ايه لانى حاولت افهم الطريق من الخريطه وده اللى وصلته ومش عارف اذا كان صح ولا غلط
2- بالنسبه لو دخلت من جوه البلد ياريت ياريت توضيح اكتر من عند كوبرى عبود لانى مش عارف افهم الطريق كده لحد كوبرى الفنجرى تقريبا يعنى هدخل منين بالظبط وهل هطلع كوبرى اسمه ابو وفيه ده عشان ادخل سكه الوايلى زى ماحضرتك كاتب ولا ايه؟؟؟؟؟
معلش انا تعابكم معايا بس انا لا افقه اى شئ فى شوراع وطرق القاهره وهمشى ينصايحكم مع الخريطه

**Khaled_Nowaihy** · 28-03-2010 05:34 PM

المشاركة الأصلية كتبت بواسطة dr_tamer_sh

متشكر جدا على سرعه الرد بس كان ليه استفسارات بسيطه:
1- بالنسبه للطريق الدائرى واضح كده انه اسهل ولكن اعتقد هيكون طويل جدا مش عارف رأيكم ايه؟؟؟؟؟؟؟
وبالنسبه للدخله السمسن اللى عند مدينه السلام دى هل دى هى اللى عند موقف العاشر ولا دخله تانيه؟؟؟؟؟وهل الكوبريين اللى هطلعهم دول هم كوبرى الهيكستب وكوبرى ال 4,5 ولا ايه لانى حاولت افهم الطريق من الخريطه وده اللى وصلته ومش عارف اذا كان صح ولا غلط

دا ابو سلمى طلع بيعرف مصر اكتر من المصاروة يا جدعان وكمان اللى جاى من بحرى مع انه صعيدى
فعلاً ..... وصفة الأستاذ ابو سلمى احسن من اللى انا وصفتها لحضرتك ... هى اطول شوية لكن حاتوصل اسرع
الدخلة اليمين هى فعلاً بتاعة موقف العاشر
وفعلاُ الكبارى اللى حاتقابلها هى كوبرى الهايكستب وكوبرى 4.5 الذى يبعد عن سيتى ستاررز 5 دقائق

**Khaled_Nowaihy** · 28-03-2010 05:58 PM

المشاركة الأصلية كتبت بواسطة abosalmaa

اللفة اللى شرحها لك اخونا دى طويلة جدااااااااااااا وفيها مناطق زحمة جداااااااااا
شوف ياسيدى
هتمشى من المحلة لطنطا ثم يمينا فيسارا كوبرى طنطا الى القاهرة حتى كوبرى الدائرى قبل شبرا الخيمة ب4 كيلو
تعدى من تحت الدائرىوتكسر يمين تطلع الدائرى تمشى مسافة حوالى 25 كيلو او اقل هتوصل عند نفق اللى يطلعك على طريق الاسماعيلية والقاهرة الجديدة متدخلوش ادخل يمين مخرج مدينة السلام امشى على طول لحد الحرفيين هيقابلك كوبرى سياراات اطلعه وامشى لحد ميقابلك كوبرى تانى اطلعه هينزلك عند النادى الاهلى الجديد بمدينة نصر تالت يو تيرن تدخل فيه وترجع وتدخل شمال فى مكرم عبيد هيبقى سيتى ستار على شمال

لا ده ستى سنتر مش سيتى ستارز يا ابو سلمى

اما الوصفة التانية دى مشكلتها ان معظم الطريق زحمة رهيبة
وتوصل بالسلامة

المشاركة الأصلية كتبت بواسطة khaled_al_nowaihy

دا ابو سلمى طلع بيعرف مصر اكتر من المصاروة يا جدعان وكمان اللى جاى من بحرى مع انه صعيدى
فعلاً ..... وصفة الأستاذ ابو سلمى احسن من اللى انا وصفتها لحضرتك ... هى اطول شوية لكن حاتوصل اسرع
الدخلة اليمين هى فعلاً بتاعة موقف العاشر
وفعلاُ الكبارى اللى حاتقابلها هى كوبرى الهايكستب وكوبرى 4.5 الذى يبعد عن سيتى ستاررز 5 دقائق

التصحيح: سيتى ستارز أول شارع يمين بعد ثالث u-turn من بعد كوبرى 4.5

**Khaled_Nowaihy** · 30-03-2010 05:08 AM

المشاركة الأصلية كتبت بواسطة abosalmaa

هههههههههههههههههه والله انت زى العسل انا صعيدى الجنسية قاهرى الاقامة والمولد بس انا سافرت جميع انحاء مصر لدرجة انى بفكر اعمل موضوع عن اى مكان تحب تروحه فى مصر اسال وانا اساعدك قدر المستطاع ومش عارف ايه رايكم

أنعم وأكرم يا أستاذ ابو سلمى ... أنا أيضاً قاهرى المولد والاقامة بس والدتى صعيدية وباحب واحترم الصعايدة جداً حباً فى الله وحباً فى أمى رحمها الله. ده غير ان اعز اصدقائى واصدق رجالة على الاطلاق تعاملت معاهم هم الصعايدة.
دى ميزة رائعة جداً انك زرت وتعرف أماكن كتير، أنا بقيت اتوه فى مدينة نصر دلوقت والله يا أخى