إجراء بسيط جدا وغير مكلف لتحسين اداء عفشة الصنى (صامولة ريجلاش الديريكسيون)
انا جايب خبر كويس لكل مالكى الصنى من اعضاء المنتدى
انا قررت لأول مرة اربط عفشة الصنى بإيدى واستكشف المزيد عنها
فى الأول هقول لكم على الخبر الهام وبعدين هتكلم شوية شكل عفشة الصنى
انا كنت نازل تحت العربية وبدور على حاجة معينة فى العربية عارفها من واقع خبرتى مع سيارات الفيات وكنت عايز اعرف الصنى فيها زيها وللا لأ،
الحاجة دى هى صامولة الريجلاش بتاعة علبة الديريكسيون
فى الأول ملقيتهاش وقلت يبقى مش موجودة (لأن فيه عربيات مافيهاش الصامولة دى) خصوصا انها فى الشاهين مثلا كان مكانها واضح جدا لدرجة لنى كنت بضبها وانا قاعد جنب العربية بمجرد انى ادخل ايدى من جنب العجلة اشمال وانا بهدوم الخروج من غير ما تتوسخ، المهم نرجع للصنى، قررت فى النهاية انى ارفع العربية وادخل بالكامل تحتيها وقد كان وبعد بحث مضنى لقيت الصامولة المذكورة،
مكانها فى علبة الديريكسيون فى الناحية الشمال من العلبة عند اتصال العلبة بالبارة بتاعة عجلة القيادة ، بالضبط فوق المقص الشمال، والصامولة وشها لمقدمة السيارة ولونها اصفر مقاس 24(مش متأكد لأنى حركتها بكلابة وليس مفتاح بس انا جربت معاها مفتاح 22 مجابهاش)
الصامولة دى فى اى عربية هى اللى بتتحكم فى درجة كتم الإحساس بالمطبات اللى بيتنقل للسائق من عجلة القيادة، لما نلفها فى اتجاه الربط (عقارب الساعة) تحسن كتم المطبات ولما نلفها فى الإتجاه العكسى تققل من كتم المطبات،مع ملاحظة ان كل ما بنعلى درجة الكتم الديريكسيون بيتقل والعكس بالعكس
لو انت حاسس ان العفشة ناشفة فى المطبات من خلال عجلة القيادة، روح للميكانيكى او العفشجى وقول له يقفل لك ريجلاش الديريكسيون، ولو مش عارف مكان الصامولة اوصفهوله كما بالأعلى، بس متقفلهاش اكثر من ربع لفة وتجرب الأول علشان الديريسكيون ميبقاش تقيل فى إيدك
انا قفلتها ربع لفة النهاردة واداء العفشة اختلف خالص (نفس اللى كنت بعمله فى الشاهين)
بالنسبة لعفشة الصنى فالفرق الوحيد اللى انا حسيت بيه ونا تحتيها عن الشاهين هو شكل المقصات ، لأنها معتمدة على مقصات صاج على شكل حرف واى الإنجليزى، مربوطة فى الشاسيه من نقطتين ومربوطة فى العجلة بنقطة واحدة(بيضة)، على عكس مقصات الشاهين والريجاتا اللى على شكل بارة حديد (بارة مصمته وليست صاج)، عموما العربيات الحديثة كلها حل فيها المقص الصاج محل المقص الحديد بتاع زمان، فيما عدا ذلك شكل العفشة تقليدى جدا بدون اى اختراعات، نفس طريقة ربط المساعدين فى دشمة العجلة بمسمارين ومن اعلى فى جسم جسم السيارة ببطاحة ذات ثلاثة مسامير، والسوستة محملة على المساعد وعلبة الديركسيون متصلة ببارتين حديد بدشم العجلات وضبط الزوايا من خلال بارات الديريكسيون، يعنى بالمختصر مافيهاش اى اختلافات عن اللى احنا متعودين عليه، بعكس اللانوس مثلا اللى كان فيها حاجة غريبة جدا هى ان بارة الديريكسيون ماسكة فى المساعد مش فى دشم العجلات،
الإختلاف الهام اللى لاحظته فى عفشة النيسان عن ما اعتدته فى الفيات هى مقاسات المسامير، يعنى فى الفيات كانت الأرقام الشهيرة للصواميل هى 10-13-15(قليل جدا)-17-19-22 وخصوصا 13 الللى كان بيتقال عنه انك لو معاك مفتاحين 13 تفك عربية فيات وتركبها بالكامل، لكن فى النسيان الأرقام ماشية 12-14-15-17-19-22 ، كل المسماير اللى انا كنت متعود انها 13 فى الفيات كانت 14 فى النيسان
اتمنى ان شوية المعلومات دى تكون مفيدة