أنا و السارينة و الشرطة في خدمة الشيروكي
إمبارح كنت مروح بعد الشغل وبعد لفة طويلة من الدقي لغاية ميدان الرماية ولقيت نفسي نسيت مفاتيح الشقة في الشغل , رجعت تاني الدقي وانا مروح تاني ومش شايف قدامي في الاتجاة من الكورنيش ( عند القصر العيني ) علشان آخد الدائري وجيت كدة عند مصر القديمة وسامع صوت سارينة و نور عربية اسعاف او شرطة مش شايف ,
المهم بما اني مواطن صالح ( المفروض ) قعدت ادي كلاكسات للعربيات قدامي واحاول آخد يمين الطريق علشان نعدية لانة مشغل السارينة على طول, وانا عمال اقول ربنا يستر لو كانت اسعاف ويوصل بالسلامة .....لغاية قبل مطلع الدائري ... لقيتها عربية شرطة وعمال ياخد غرز .. أخدت يمينى جنب الرصيف والاقية كسر عليا ووقف قدامى ... عارفين لية, كان فية عربية شيروكي ( موديل قديم ) وقفت جنبة علشان يمشي قدامها يوسعلها الطريق وقاعدين يتكلموا مع بعض ووقفوا الطريق...
قعدت ازمر لهم ورحت عامل غرزة من بينهم بعد ما تحركوا ومشيت وانا محروق دمي منهم ... لقيت بتاع الشرطة ماشي ورايا وبردة مشغل السارينة وعمال يديني نور عالي ... مش عاجبة اني عديت منهم وعطلت الموكب المهيب بتاعهم ...
رحت واقف على مطلع الدائري علشان اقولة اية الهبل دة.
عارفين اللي جنب السواق بيقوللي اية..... انت المفروض مواطن توسع الطريق للشرطة.
لقيت نفسي بقولة يلعن ابوك انت والشرطة والبهايم اللي ماشيين وراك ( الناس اللي في الشيروكى ) أحنا ناقصين عطلة يا ولاد .....
وسيبتة ومشيت وهو طاير ورايا وعمال يديني فى نور عالى ( ونسى العربية الشيروكى )
لولا اني كان معايا ابني وكنت مش شايف قدامي ( اقسم بالله العظيم – ولو اني عمرى ما عملتها – كنت لبستهم في بعض )
تفتكروا المفروض الواحد يعمل اية مع المخلوقات دي؟وهل كدة لما اجدد الرخصة هلاقي مخالفات نوعها اية ( حسبي الله ونعم الوكيل )