لا هى العربيه كويسه جدا هى فيها بس الحجات دى ماشيه حاجه وخمسين الف وعربيه كويسه هى بس التكيف و الدركسيون فا ياريت اعرف منك الحجات دى ايه نظامها وشكرا والعربيه 2005 بانوراما بحال كويسه تعملها كام
عرض للطباعة
لا هى العربيه كويسه جدا هى فيها بس الحجات دى ماشيه حاجه وخمسين الف وعربيه كويسه هى بس التكيف و الدركسيون فا ياريت اعرف منك الحجات دى ايه نظامها وشكرا والعربيه 2005 بانوراما بحال كويسه تعملها كام
بالنسبة للخبطة دى مش لازم تبقى إسكترا، الإسكترا مش بتبان وإنتا واقف. الإسكترا بتعمل بوش فى الدركسيون يعنى بيلف جزء دون دوران نفس الجزء فى العجل أو بتعوم مع السرعة أو بتخبط مع المشى مش و أنتا واقف.
غالبا اللى عند حضرتك بطاحات لو كان فيه خبط شمال و يمين عند المساعدين أو و هو غالبا ده ظنى إن اللى عند حضرتك كان عيب فى الموديلات 2005 و أوائل 2006 و هو أن الدركسيون لما تجيبه للأخر يخبط فى معدن وكأنه دليل أنه وصل للأخر و علاجه سهل جدا عند التوكيل و هو وضع سيلكون على مسمار فى نهاية عامود الدركسيون وبتنتهى مشكلة الصوت.
بالنسبة لكود الكاسيت هتلاقيه مكتوب فى كتالوج العربية و أتمنى يكون موجود فيها لأن لو مش موجود ده بيدل أن صاحب السياره كان مهمل فيها. سؤال برده أحب أسألوا لحضرتك الكود بتاع الكاسيت بيروح لما نفك البطارية طيب ليه البطارية إتفكت هل صاحب السيارة غير البطارية قريب جدا؟؟!! لأنه مش ممكن يكون ماشى بيها مده من غير كود الكاسيت.
على ما أعتقد المرايات الضم لا يوجد لها فيوز بدليل تحذير الوكيل من عدم العبث بهم خوفا من تخريب الكمبيوتر و الضفيرة فأعتقد إن اللى عند حضرتك إما مفتاح الضم أو المرايات نفسها و أحذر حيث إن ثمن المراية الواحدة 2500 جنيه.
نصيحة كما قال لك الأعضاء من قبل روح للتوكيل لو كانت العربية عجباك و إدفع 500 جنيه فحص شامل و أهرف كل حاجة عن العربية قبل الشراء لأن الميجان لو ملعوب فيها بره بتكون مشاكلها كتيره جدا و مكلفة جدا.
و ربنا يوفقك فى الشراء.
مشكور جدا على طب هو الموديل ده البانوراما يعمل كام وكمان اتكيف قالى فى مشكله كده مش عارف مقاومه او كده والكد لو مش موجود الكتالوج مبيكنش مكتوب فى العربيه وشكرا
موديل 2005 تقريبا بيبقى من 65 ل 70 ألف حسب الحالة و الكيلو متر.
بالنسبة لموضوع التكييف لم أسمع قبل كده عن مقاومة بتبوظ فى التكييف (ده كلام حد بيبيع) و بعدين لو هى مقاومة (ثمن المقاومة 10 قروش) سهلة كده ليه مغيرهاش صاحب العربية؟؟!!
خد بالك علشان فى بعض الموديلات فيهم مشاكل فى كمبريسور التكييف و ده ثمنه 6 ألاف جنيه.
بالنسبة لكود الكاسيت هو موجود فقط فى كتالوج السيارة و لو الكتالوج مش موجود لا سبيل إنك تعرف الكود إلا من التوكيل عن طريق الكمبيوتر.
مشكور جدا وانا موضوع التكيف ده حقولو هو يعملوويدينى العربيه سليمه وباذن الله خير وهى ماشيه 58 الف وحالتها كويسه بس حضرتك قلقتنى فى موضوع التكيف
بس حضرتك موضوع ماشية كام ده مش مقياس لنظافة العربية حضرتك شوفت دفتر الصيانات بتاعها على الأقل فى 3 سنين اللى هما بتوع الضمان و بيكون ختم التوكيل موجود و هل عمل الصيانات اللى بعد الضمان فى التوكيل و لا لأ؟؟
خد بالك إن التكييف ساقع و سخن و عليك تجربة الدورتين و هل بيأثر على العربية (رجرجة أو سحب للكهرباء -ضعف الكشافات العالية مثلا لو شغلت التكييف- أى صوت غريب)
جرب الكاسيت خصوصا الcd و جرب فتحة السقف و شوف بتفتح و تقفل بسهولة و لا لأ و هل فى أى صوت تزييق و هى ماشية فى المجرى بتاعها و هل بتصل للأخر و لا لأ؟
جرب مساعدين الشنطة
جرب مساعدين العربية الأربعة عن طريق الضغط على أطراف العربية الأربعة ثم تركها مرة واحدة إذا طلعت بشويش يبقى كويسيين أما لو طلعت بسرعة و نزلت تانى تبقى بايظة.
خد بالك جنوط موديل 2005 كانت بتتعوج من المطبات الجامدة فتأكد من عدم وجود لحامات بها أو تعوييج و يا ريت تجربها على سرعة عالية علشان تكشفلك عيوب كتير بعفشة العربية.
فى حاجات كتير لازم تتفحص مش قادر أحصرهالك دلوقتى لكنى مازلت بنصحك بكشف التوكيل.
ربنا يوفقك إن شاء الله.
ما المشكله انى عربنت من غير ما اكشف فا مبنفعش ارجع اقوله اكشف هو الموضوع الوحيد هو الى اقدر اتكلم معاه موضوع التكيف فا ياريت لو تقدر تنصحنى باى حاجه فتحة السقف شغاله كويب بتفتح وتقفل بس بتفتح للاخر ازاى اصلها حته صغيره الى جوه ولما بتفتح من بره برده مش حته كبيره قوى وكمان ياريت تقدر تقولى ايه الى ممكن يبوظ فى التكيف غير الكمبروسور والحجات دى ايه الحاجه البسيطه الى تبوظ فى التكيف وبجد تعتبتك معايا ومشكور جدا
مفيش تعب و لا حاجة بس أصل الميجان بالذات بتبقى صعبة لو ملعوب فيها أو اللى كان سايقها مهمل و مش فاهم فيها و بيصلحها عند أى ميكانيكى تحت البيت.
بالنسبة للتكييف هو شغال و المروحة شغالة و الشاشة شغالة و مفيش تسقيع و لا فيه مشكلة تانية علشان أقدر أساعدك.
هل التسخين شغال و لا برده لأ ؟
لاحظ ال rpm لما تدوس زرار التكييف هل فيه تغيير ولا لأ ؟
منتظر إجاباتك...
على فكرة موضوع الكشف بعد دفع العربون ميزعلش إنت مش بتشترى سندوتش معجبكش مش مشكلة مش هتشتريه تانى دى عربية بكذا ألف و المفروض هتقعد بيها شوية و المفروض تعرف كل اللى فيها قبل الشراء و ديه حاجة متزعلش.
موضوع التكيف انا شغلته بس مكنش فى حاجه بتطلع من فتحات التكيف بس الشاشه بتاعت التكيف كانت شغاله وكنت بنقص وعلى درجة الحرارة بس مكنش فى حاجه وكمان انا مخدش بالى من rpm فا ياربت تشرحلى موضوع اrpm ومجربتش اسخن برده وكمان موضوع لكشف انا و كشفت اكشف فى بنزينه وكده ولا اكشف فى مركز صيانه لرينو ولا فى التوكيل بس هو شكله مكنش بيصين فى التوكي
الزميل العزيز من الواضح أن العربية دى فيها إنه...
الميجان لو معملتلهاش صيانة فى التوكيل بتتبهدل بيها بعد كده
واحد بايع عربية عامله 58000 كيلو موديل 2005 لازم حالة العربية تبقى فورة و الصيانة فى التوكيل و الكتالوجات فى مكانها و على الأقل صيانات ال3 سنين بتوع الضمان معمولة كلها مع فواتيرها.
طيب فكرت تبص على الإستبن شكله إيه....
على فكرة سهل جدا عداد الكيلو متر يتلعب فيه مش ده أبدا المقياس.
إنت عندك مرايات لوحدهم ب 5000 جنيه و التكييف ممكن يخش فى الشىء الفلانى ده غير بأه مفاجات الميجان الجميلة لو إنك مصلحها بره التوكيل و دم قلبك اللى ممكن تصرفوا عليها.
أصلا موديل 2005 كان أكتر موديل فيه مشاكل و حكاية مقاومة التكييف و فيوز المرايات و كود الكاسيت كلها علامات مطمنش خالص!!!!!!!!!!!!
لو العربية دى حاسس إنها لقطه خدها التوكيل و التوكيل فقط و أطلب فحص شامل ب 500 جنيه و أسأل عن تكاليف صيانة التكييف و المرايات و شلهم من تمن الشراء و ده حقك... المفروض يسلمك عربية سليمة أو يخصم تمن الإصلاحات.
نصييييييييحححححة أخيرة متشتريش ميجان ملعوب فيها بره التوكيل... كهربتها كتير و شغلها بالكمبيوتر و الفتاوى بره التوكيل بتودى فى داهية.
و ربنا يوفقك لما فيه الخير.