اداء تكيف m11 في يومين الحر

**medoragab** · 03-04-2010 02:33 PM

بسم الله الرحمن الرحيم

كنت عامل تقرير عن السيارة وكنت بقول التكيف عادي ومش جبار و ماشي حالة وتضح الاتي

صليت الجمعة بتاعت امبارح وكنت رايح اسكندرية و زي منتو عارفين في موجة حر بدأت من امبارح
المهم قلت فرصة كويسة اجرب العربية في الحر و انا معايا ناس تلاتة صحابي وربنا يستر متكسفنيشي
المهم سخنت العربية كويس و رحت اشتريت معطر و علقتة وسميت الله وتوكلت علي الله و مشيت وبدات اشغل المكيف قلت لغاية لما اروح لصحابي يكون التكييف تمام المهم يا معلم شغلت التكييف علي اخرة برودة ومروحة هة يا رب يبرد هة يارب يبرد ولا اكن في حاجة

انا بقالي خمس دقائق ماشي والتكيف يادوب جايب نسمة هوا باردة خفيفة متعملشي حاجة

اصحابي ركبو واديها تأليس يامعلم --اية مروحة السأف الي انت مشغالها -- انت باين نسيت وشغلتو علي السخن -- واديني كلام زي السامير

المهم انا كنت ماشي براحة ياعني اولاني وتاني معدتشي سرعتي عن 20 او 30
جالي الهام ان التكيف مش واخد كهربتة كويس المهم رحت قارص علي المتور شوية اولاني وتاني جبت 4 rpm
حسيت بعديها الماتور فاق ويامعلم بعديها علي طول الحلوة اتكلمت
التكييف يامعلم طلع برودة شديدة اوي ولقيت العيال زمايلي بيقولو اية انت كنت طافي الكمبروسور بتاع المكيف و شغلتة ولا اية ايوة كدة حسنا ان التكييف شغال وبعد خمس دقائق تانين لقيت الي راجب جنبي بيقول لا كدة انا ممكن افطس من البرد رحت موطي المروحة و موطي درجة البرودة خليت التبريد بعد on بدرجتين والبرودة وطتها ثلاث درجات
وسالت الناس الي ورا واحد قالي سبني انام و التاني قالي كدة فلة اوي

و علي فكرة احنا لسة مطلعناش علي الطريق

المهم عدي ربع ساعة وطلعنا علي السريع ومرة واحدة سمعت واحد ورا ها ها ها تتتتشششششششششششو
تكيفك يا معلم جابلي برد و لقيت الي جانبي بيقول خف يا عم شوية احنا كدة حنفطس كلنا
اية الاسكيمو الي احنا اعدين فية دة
المهم رحت موطي الحرارة شوية كمان درجتين ياعني تقريبا فاضل درجتين كمان ويدخل علي الاحمر
الحمد للة وصلنا ولما جينا ننزل من العربية كل الي نزل رجع تاني من الحر
والحمد للة كلهم ابدو اعجابهم بالتكيف والتلاتة قالوليتكييف ممتاز ورائع
في واحد فيهم معاة ماتركس2006 والتاني معاة شاهين 2008 والتالت اوبل فيكتر2003
-------------------------------------

خلاصة الكلام

التكيف بيعمل بكفائة عالية اوي بعد عشر دقائق و بعد ما تكون مشيت و جريت علي الاول و التاني شوية يادوب تفويقة بس
-------------------------------------------------------

بالنسبة للسحب علي اساس مشغل التكييف و مركب تلاتة طبعا بيقل شوية لان علي حد علمي التكيف الكويس بياخد حوالي 300 الي 400 سي سي من الماتور
بس انا اصلا بجري المهم السحب بيقل شوية بس مبيدياشي ياعني في التسارع مع عربية جنبك العربية مكسفتنيش والله وكل الي راكب معايا ابدو اعجابهم الشديد بالعربية والتلاتة قالولي احنا راكبين عربية الماني برافهية الكوري بتكييف اليباني
-------------------------------------------
معلشي طولت عليكم

**ahmad--ezzat** · 03-04-2010 02:36 PM

العمليه مش عمليه اول عشر دقائق وبعد كده بيشد...الموضوع ان الشمس بتولع العربيه كلها بما فيها الكومبرسور والخراطيم وطقم التكييف كله...فالهواء لما بيخرج ساقع بيوصلك دافى شويه....لما الخراطيم تبرد ومكونات التكييف تسقع بتلاقى نتيجه....اللى يثبت كلامى جرب اركن العربيه فى الظل الصبح...وشغل التكييف هتلاقى هواء ساقع على طول

**ash257** · 03-04-2010 03:05 PM

المشاركة الأصلية كتبت بواسطة ahmed_nubira

العمليه مش عمليه اول عشر دقائق وبعد كده بيشد...الموضوع ان الشمس بتولع العربيه كلها بما فيها الكومبرسور والخراطيم وطقم التكييف كله...فالهواء لما بيخرج ساقع بيوصلك دافى شويه....لما الخراطيم تبرد ومكونات التكييف تسقع بتلاقى نتيجه....اللى يثبت كلامى جرب اركن العربيه فى الظل الصبح...وشغل التكييف هتلاقى هواء ساقع على طول

كلام سليم وانا مجرب الموضوع ده

**medoragab** · 03-04-2010 03:12 PM

المشاركة الأصلية كتبت بواسطة ahmed_nubira

العمليه مش عمليه اول عشر دقائق وبعد كده بيشد...الموضوع ان الشمس بتولع العربيه كلها بما فيها الكومبرسور والخراطيم وطقم التكييف كله...فالهواء لما بيخرج ساقع بيوصلك دافى شويه....لما الخراطيم تبرد ومكونات التكييف تسقع بتلاقى نتيجه....اللى يثبت كلامى جرب اركن العربيه فى الظل الصبح...وشغل التكييف هتلاقى هواء ساقع على طول

كلامك سليم 100*100

بس انا كنت راكن في جراج مأفول وبارد
انا قصدي ان الماتور مكنشي ميدي التكييف المطلوب فلما دوست شوية علي المتور التكييف فاق
انا مش فني ولا بعرف في الميكانيكا اوي انا ظنيت كدة

**hemaa_82** · 03-04-2010 04:07 PM

انا مبحسش بالمشكلة لان انا اساسا سواقتي مابين 3 و 4 rpm ....

**Hegazio** · 08-04-2010 10:52 AM

الموضوع مالوش دعوة بكهربا .. هي العربية اخدت وقتها علي ما تطلع الهوا السخن اللي جوة
نصيحة ... دايما أول دقيقة ف أي عربيية .. تخليها تجيب هوا من بره و تفتح الشبابيك