النهاردة لقيت نفسى فاضى و مازال عندى مشكلة تأخير الدوارة صباحا مع ريحة بنزين نيه فى اللانوس 99 كما قلت قبل كدة. المهم لرحت للميكانيكى مدحت اللى فى أول فيصل فى شارع أحمد كامل (كان أحد الأعضاء قال إنه عنده سكنر) علشان أشيك على العربية وأشوف قصة الرشاشات دى. بصراحة الراجل زوق جدا فى التعامل و فاهم. على طول حط العربية فى السكانر و قعد يشرح لى القرايات كلها بس للأسف مافهمتش كتير بس عجبنى إنه فاهم يعنى أفتكر إنه قال لى إن قراية البوابة لازم تكون 0.60 و حد فتحها زيادة و فعلا كان فى ميكانيكى نص لبه كان رجرشهالى بالمفك و علالى العربية قبل كدة. المهم ظبطهالى بسرعة. أجمل حاجة فيه إنه مبيفتحش شغل و مبيحبش يغير إلا لما تكون الحاجة محتاجة فعلا تغيير. فمثلا بالنسبة للرشاشات قال لى إنه حيحط منظف فى تنك العربية و أفول بعدها و بعد 300 كيلو أرجعله. ممكن الموضوع يتحل و حلاحظ الفرق فى السحب و إستهلاك البنزين و لو ماتحلتش حنغير برشاشات أكسنت إستيراد من واحد فى فيصل عند الشبراوى أخر
المطبعة. و ميزته إننا حنجربهم الأول على جهاز الألتراسونيك عنده و بعدها نجربهم فى العربية و نقيس بالسكنر و ممكن نرجعها تانى ليه لو فيهم مشكلة.
حجرب الأول 300 كيلو دول و أشوف الموضوع حينتهى على إيه.نسيت أقول السكانر كان 40 جنية و المنظف 30 جنية و ماخدش مصنعية لحد ما أجيله تانى يمكن الرشاشات تنظف و ماحتجش أغيرها
ياريت لو حد من خبراء المنتدى يشرح لنا السكانر و قراياته لأنه فعلا بيوضح كل حاجة فى العربية من البطارية للشكمان.