للإخوة اللي مصرين على إنه يوجد فرق بين الياباني و الكوري

http://www.jdpa.com/NeWs/ReLEaSeS/pr...asp?ID=2006082

اللينك ده من موقع J. D. Power إحدى مؤسسات McGraw Hill
و بيتكلم عن الجودة في صناعة السيارات من ناحية الإعتمادية و العيوب و الأعطال و أرجو إن الأخوة يلاحظوا إن تاريخ التقرير منتصف 2006 يعني حتى قبل هيونداي ما تطرح كل الموديلات الجديدة في برنامج 24/7 أي طرح 7 موديلات جديدة كلياً خلال 24 شهر.
ما علينا، زي ما حضراتكم شايفين إن هيونداي تأتي مع BMW و كرايسلر و Lexus و بورش و تويوتا ضمن السيارات الأقل أعطالاً و تأتي ضمن GMC و جاجوار و Lexux و نيسان و بورش ضمن السيارات ذات أقل مشاكل في التصميم.

بالنسبة للجودة بصورة عامة تأتي Lexus و بورش في الطليعة في قطاع السيارات الفخمة و تويوتا و هيونداي و هوندا في قطاع السيارات العادية (طبقاً للتقرير).
بصورة عامة الترتيب بورش في الصدارة تتبعها Lexus ثم هيونداي ثم تويوتا ثم جاجوار.

و تقول الدراسة أن هيونداي دخلت ضمن أعلى 3 ماركات للمرة الأولى في تاريخها خاصة مع طرح موديلات توسان و سوناتا و أزيرا و إلنترا و تيبورون.
و يوجد رسم بياني يوضح هذه المعلومات بالأرقام.
أرجو أن يتسع صدر الإخوة لهذه المعلومات و شكراً.

اكيد هيونداى تطورت كتير بدليل اقتحام سياراتها امريكا واوروبا معقل السيارات المحترمة..لكن هل كل الموديلات بنفس الجودة ..

كلام مظبوط بس ماتنساش إن كل شركة بتنزل موديلات معينة تناسب كل سوق يعني صعب نشوف الأزيرا في مصر زي ما صعب نشوف الكامري و بنفس المنطق صعب نشوف الماروتي في السويد أو أمريكا.
أما كون سيارات سيئة بالمطلق فأنا الحقيقة غير مقتنع بهذا الكلام... يعني ممكن في قرية مصرية صغيرة اللي يجيب توك توك يبقى حقق حلم حياته و تكون بالنسبة له و لإحتياجاته و الأهم إمكانياته أحسن وسيلة إنتقال في الدنيا بينما لو سألت مواطن في الخليج المفهوم مختلف تماماً... أنا شايف إن كون عربية حلوة و عربية وحشة بالمطلق كدة كلام غير سليم..
الفكرة إنت بتسوق أنهو عربية في أنهو سوق و لأنهو عميل...
أنمنى أسمع رأي حضرتك على هذا الكلام..
و شكراً على الرد

هذا هو رأيي منذ زمن و كنت أختلف مع الأخوة الذين يرشحون سيارة لأحد الأعضاء لمجرد أنها ياباني بغض النظر عن السيارة نفسها خصوصا إن دولة مثل كوريا تقوم بإنتاج منتجات ذات جودة عالية و لا تقوم بالتقليد الأعمى مثل الصين
و أحترم بشدة من الكوري الهيونداي نظرا للجودة التي يقدمونها في سيارتهم و إهتمامهم بتقديم منتج ذات عمر ليس بالقصير و جاء هذا التقرير ليثبت صحة كلامي
و شكرا يا أستاذ أحمد على نقل هذا الخبر

كلام جميل بس إسمحولي اختلف معاكم :o.
لو السؤال هل هيونداي اثبتت نفسها كمنافس قوي و في طريقها لتصبح وسط الصفوة تبقى الاجابة بالتأكيد نعم..... لو السؤال هل الالانترا في مصر منافس قوي للانسر أو حتى كورولا .....ماشي
لكن السؤال هل فيه فرق بين الياباني و الكوري.... يبقى اه فيه فرق.... و واضح كمان و الموضوع ده اتقال فيه كلام كتير قبل كده و في الاخر ناس زعلت

شكرا يا أ / أحمد ،،

علي الموضوع ،،

بس هوا لن يكون ذو تأثير ،،

بسبب كلمة قريتها في منتدي سيارات أمريكي ،، و كانوا بيتكلموا علي Jdpower تحديدا ،،،

( الجوائز لا تعني شئ ،، السمعة تعني كل شئ )

بس اتفق مع توت المبالغة فظيعة و غير منطقية في المنتدي في النقطة دي ،،

انا معاكم في الكلام.........
يعني المقارنه تكون في نفس الفئه........
غير بصراحه هي برضوا راحه نفسيه.....يعني فيه اللي شايف ان الكوري بالنسبه ليه 100%
و مش فارقه اوي من الياباني.....و فيه اللي شايف العكس
و انا عن نفسي بحس ان الكوري عماتا ضعيف الاعتماديه من حيث الاستحمال....
و اكتر ماركه كوري.....و بجد بحترمها جداااااااااا و ماشوفتلهاش حاجه و حشه هي الكيا فقــــــــــــــــــط
و فيه حاجه يمكن ناس كتير مش واخده بالها منها .....ان ذي ما بتجلنا في جميع المنتجات ...درجه تانيه و تالته...
نفس الكلام بينطبق علي العربيات.......فيمكن تلاقي ناس كتير ممكن تشتكي من نوع و في نفس الوقت ناس بتلعن فيها

اقتباس:

---

المشاركة الأصلية كتبت بواسطة 3mr Farrag

و فيه حاجه يمكن ناس كتير مش واخده بالها منها .....ان ذي ما بتجلنا في جميع المنتجات ...درجه تانيه و تالته...
نفس الكلام بينطبق علي العربيات.......فيمكن تلاقي ناس كتير ممكن تشتكي من نوع و في نفس الوقت ناس بتلعن فيها

---

يا جماعة مفيش حاجة أسمها أحنا بيجيلنا درجة تانية و ناس أخرى بيرحلهم درجة أولى
الصيني صيني في كل مكان في العالم
و عن تجربة ....... و كوريا لما تصدر هيونداي في مصر هي هي نفس العربية اللي بتروح أمريكا مع أختلاف المواصفات و ليس الجودة
ياريت يا جماعة نفهم إن أحنا أخترعنا عقدة الاضطهاد و صدقناها و نرددها كل يوم
و شكرا

اقتباس:

---

المشاركة الأصلية كتبت بواسطة tutankhamoun

يا جماعة مفيش حاجة أسمها أحنا بيجيلنا درجة تانية و ناس أخرى بيرحلهم درجة أولى
الصيني صيني في كل مكان في العالم
و عن تجربة ....... و كوريا لما تصدر هيونداي في مصر هي هي نفس العربية اللي بتروح أمريكا مع أختلاف المواصفات و ليس الجودة
ياريت يا جماعة نفهم إن أحنا أخترعنا عقدة الاضطهاد و صدقناها و نرددها كل يوم
و شكرا

---

أنا غير متفق مع هذة النقطة المتعلقة بالمنتج الصينى بالذات فالصين تنتج منتجات تختلف درجة جودتها حسب السوق الموجهة الية من حيث مدى الاقبال على السلع الرخيصة من عدمة وأيضا تعتمد الصين فى سياستها التصديرية على الحالة الاقتصادية للبلد المستورد وذلك عند توزيع منتجاتها من حيث الجودة من الدرجة الاولى الى الدرجة العشرين والدليل أنك تجد الصين تصدر الى أمريكا ودول أوروبا أعلى جودة وتغزو السوق الامريكى والاوروبى والى دول أخرى أقل جودة بكثير وذلك يرجع الى الحالة الاقتصادية للدول وفقر أو غنى هذة الشعوب ومدى الاقبال على المنتجات الرخيصة رديئة الجودة

بالنسبة للصينى: مش الصين هى اللى بتصدرلنا جودة اقل، انما المستوردين اللى عندنا هما اللى بيستوردوا البضاعة الصينى الرخيصة وبالتالى بتكون ذات جوده اقل.
الصينيين عندهم من كل منتج درجات جودة مختلفة وكله بتمنه.

اما عن جودة هيونداى فهى فعلا بقت من المالركات المحترمة سواء من جودة الخامات او الاعتمادية او حتى الأمان. بس علشان مانظلمش الماركة لازم نستبعد الهيونداى اللى بتتجمع فى مصر من المقارنة
يعنى عايز تحكم عليها يبقى تقارن الالانترا باللانسر والكورولا ، بس ماتقارنش الفرنا مثلا بالياريس لأنه اكيد فى الحالة دى الياريس تكسب

اقتباس:

---

المشاركة الأصلية كتبت بواسطة h_hezzah

بالنسبة للصينى: مش الصين هى اللى بتصدرلنا جودة اقل، انما المستوردين اللى عندنا هما اللى بيستوردوا البضاعة الصينى الرخيصة وبالتالى بتكون ذات جوده اقل.
الصينيين عندهم من كل منتج درجات جودة مختلفة وكله بتمنه.

اما عن جودة هيونداى فهى فعلا بقت من المالركات المحترمة سواء من جودة الخامات او الاعتمادية او حتى الأمان. بس علشان مانظلمش الماركة لازم نستبعد الهيونداى اللى بتتجمع فى مصر من المقارنة
يعنى عايز تحكم عليها يبقى تقارن الالانترا باللانسر والكورولا ، بس ماتقارنش الفرنا مثلا بالياريس لأنه اكيد فى الحالة دى الياريس تكسب

---

هو ده الكلام اللي محدش عاوز يصدقه
ويقعدوا يقولوا مبالغه
يا اخواني انا شوفت العجب من غبور في عربياته
انا مش عارف هو انا بيني وبينه طار بايت
ولا ليا عين تالته
كويس ان في حد شايف اللي انا بشوفه فير عربياته

اقتباس:

---

المشاركة الأصلية كتبت بواسطة h_hezzah

لازم نستبعد الهيونداى اللى بتتجمع فى مصر من المقارنة
يعنى عايز تحكم عليها يبقى تقارن الالانترا باللانسر والكورولا ، بس ماتقارنش الفرنا مثلا بالياريس لأنه اكيد فى الحالة دى الياريس تكسب

---

طبعا صح ،،

بس عشان تبقي المقارنة موضوعية ،،

قارن الفيرنا بالإيكو ،،

و الياريس بالنيو اكسنت أو الريو

نفس الجيل و نفس الفئة ،،،

بخصوص نظرية المؤامرة ،،

حتي الصيني في الصناعات الثقيلة مفيش حاجة اسمها فرز اول و فرز تاني ،،

مش عشان هما ناس كويسين و ضميرهم صاحي ،،

عشان تكاليف التصميم و شراء التكنولوجيا و خطوط الإنتاج تخلي عمل منتج درجة تانية مستحيل

ممكن شركة زي تويوتا تروح تشتري شركة اندونيسية و تنزل عربيتها باللوجو بتاعها ( أفانزا )

مش تويوتا تعمل كورولا بجودة تعبانة لمصر و كورولا بجودة ممتازة لدول اخري

اقتباس:

---

المشاركة الأصلية كتبت بواسطة Abdm

أنا غير متفق مع هذة النقطة المتعلقة بالمنتج الصينى بالذات فالصين تنتج منتجات تختلف درجة جودتها حسب السوق الموجهة الية من حيث مدى الاقبال على السلع الرخيصة من عدمة وأيضا تعتمد الصين فى سياستها التصديرية على الحالة الاقتصادية للبلد المستورد وذلك عند توزيع منتجاتها من حيث الجودة من الدرجة الاولى الى الدرجة العشرين والدليل أنك تجد الصين تصدر الى أمريكا ودول أوروبا أعلى جودة وتغزو السوق الامريكى والاوروبى والى دول أخرى أقل جودة بكثير وذلك يرجع الى الحالة الاقتصادية للدول وفقر أو غنى هذة الشعوب ومدى الاقبال على المنتجات الرخيصة رديئة الجودة

---

الصين لا تورد لك ما تحبه هي و لكن ما تذهب أنت و تستورده بنفسك
يعني المستورد يذهب ليشتري ما يريد
أما عن موضوع إن المنتجات الصيني السيئة مش موجودة إلا في الدول النامية مثل مصر فهذا الكلام عار من الصحة تماما
منتجات الصين السيئة موجودة بكثرة على أرفف محلات أنجلترا و فرنسا و الولايات المتحدة و كل دول العالم
و سمعة المنتج الصيني واحدة في كل مكان
و يقولون عليه في انجلترا
chinese shit
و شكرا

انا كلامي انهم مش بيعملوا حاجه تعبانه علشان يصدروها لينا....
بس العربيات اللي بتنتج فيها اي نوع من العيوب......
و مش معني كلمه عيوب يعني فيها مصيبه.....ذي الحاجات البسيطه الكتير اللي بنشوفها....
و بالنسبه لينا ديه حاجات تافهه و ممكن ما نبصش عليها اصلا.....
اما بره بتفرق معاهم صغيره و كبيره في التقفيل و في كله....
علشان كده قلت بتجلنا درجه تانيه

يا جماعة فعلاً مفيش حاجة إسمها عربية فرز تاني يعني إنتو متخيلين مثلاً إن شيري بتنزل A11 في مصر من خط إنتاج فيه بلاستك رخيص و صاج أرفع و موتور تعبان و بتنزل في أمريكا من خط إنتاج تان في مكان تاني و موردين تانيين و عمال تانيين؟!!
دة كدة يبقى أرخصلهم ينزلوا السيارة المميزة في كل حته بدل التكاليف دي و الغلبة دي.
الفكرة إن فيه منتجات جيدة و منتجات سيئة و بس و المستوردين في مصر هما اللي بيتحكموا في الحكاية دي حسب رغبتهم و خطط تسويقهم و الشرائح المستهدفة عندهم من المستهلكين..
نفس الشيري و البريليانس و غيرهم هما هما في مصر و أسيا و أوروبا و أمريكا (لو بيروحوا أوروبا و أمريكا أنا معرفش) ممكن بس المواصفات تزيد أو تقل طبقاً لكل سوق و ممكن كمان تنزل بإسم تاني لأسباب تسويقية بحتة يعني مثلاً في إنجلترا و أيرلندا الأوبل بتنزل بإسم فوكسهول و اللانسر في أمريكا أعتقد بتنزل بإسم ميراج .

اقتباس:

---

المشاركة الأصلية كتبت بواسطة Ahmed Anwer

شكرا يا أ / أحمد ،،

علي الموضوع ،،

بس هوا لن يكون ذو تأثير ،،

بسبب كلمة قريتها في منتدي سيارات أمريكي ،، و كانوا بيتكلموا علي Jdpower تحديدا ،،،

( الجوائز لا تعني شئ ،، السمعة تعني كل شئ )

بس اتفق مع توت المبالغة فظيعة و غير منطقية في المنتدي في النقطة دي ،،

---

أتفق معاك تماماً إن الأمر أصبح إن السمعة تعني كل شيئ لكن يظل علينا كناس عندها معرفة بالسيارات إننا نفكر و نحلل ..

اقتباس:

---

المشاركة الأصلية كتبت بواسطة 3mr Farrag

انا معاكم في الكلام.........
يعني المقارنه تكون في نفس الفئه........
غير بصراحه هي برضوا راحه نفسيه.....يعني فيه اللي شايف ان الكوري بالنسبه ليه 100%
و مش فارقه اوي من الياباني.....و فيه اللي شايف العكس
و انا عن نفسي بحس ان الكوري عماتا ضعيف الاعتماديه من حيث الاستحمال....
و اكتر ماركه كوري.....و بجد بحترمها جداااااااااا و ماشوفتلهاش حاجه و حشه هي الكيا فقــــــــــــــــــط
و فيه حاجه يمكن ناس كتير مش واخده بالها منها .....ان ذي ما بتجلنا في جميع المنتجات ...درجه تانيه و تالته...
نفس الكلام بينطبق علي العربيات.......فيمكن تلاقي ناس كتير ممكن تشتكي من نوع و في نفس الوقت ناس بتلعن فيها

---

+111111111111111111111

بمناسبة هذا الموضوع ،،

انتصار اخر لهيونداي

Hyundai Beats Mercedes in Reliability Test

Hyundai Motor has beaten prestigious European car brands like Mercedes, BMW and Audi in a reliability survey by a British car magazine. Korea’s largest automaker ranked sixth in an annual reliability survey conducted by What Car? magazine in association with independent warranty provider Warranty Direct. GM Daewoo Automotive & Technology was also among the Top 10.
The survey was based on the repair claim rate, average repair costs and average repair time. Hyundai came in sixth out of 30 in repair claim rate with 16.2 percent and first in average repair costs and time with 135 pounds and 1.2 hours. GM took eighth place with a repair claim rate of 21.9 percent, repair costs of 278 pounds and repair time of 2.6 hours.

The top was firmly in Japanese hands, with Honda chosen as the most reliable brand with a repair claim rate of 9.9 percent, followed by Mazda, Toyota, Nissan and Lexus. Mitsubishi came in seventh place between Hyundai and Daewoo. Skoda and Mercedes-Benz were the only two European carmakers in the Top 10.



منقول من هذا اللينك عن مجلة what car

http://english.chosun.com/w21data/ht...508070011.html

اللي بعض الأخوة بيحبوها أوي

و كما نلاحظ فإن هيونداي في المركز السادس من حيث قلة الأعطال

و الترتيب

هوندا
مازدا
تويوتا
نيسان
ليكزس
هيونداي
ميتسوبيشي
جي ام دايوو
مرسيدس
سكودا

مع ملاحظة إن هيونداي تأتي في المركز الأول من حيث تكلفة الأعطال و وقت الإصلاح

و هذا هو المهم بمعني أن هذه الأعطال غير مؤثرة

اقتباس:

---

كما نلاحظ فإن هيونداي في المركز السادس من حيث قلة الأعطال

و الترتيب

هوندا
مازدا
تويوتا
نيسان
ليكزس
هيونداي
ميتسوبيشي
جي ام دايوو
مرسيدس
سكودا

---

ما قلناش حاجة يا باشا ...بس بص حضرتك على القائمة تاني... أول خمسة يابانيين و من العشرة الاوائل ستة يابانيين .... يعني زي ما قلت قبل كده الكوري كويس (هيونداي تحديدا) بس مش زي الياباني

اقتباس:

---

المشاركة الأصلية كتبت بواسطة Chicco

ما قلناش حاجة يا باشا ...بس بص حضرتك على القائمة تاني... أول خمسة يابانيين و من العشرة الاوائل ستة يابانيين .... يعني زي ما قلت قبل كده الكوري كويس (هيونداي تحديدا) بس مش زي الياباني

---

ماشي بس من العشرة الأوائل ،،

مش من الخمسين ،،

يعني الفرق مش سنين ضوئية ،،

و زي ما سامسونج عملتها و خدت المركز الأول من سوني في الإلكترونيات ،،

و زي ما كوريا خدت المركز الأول في بناء السفن من اليابان ،،

و داخلة دلوقتي علي صناعة الروبوت بس طبعا لسه المقدمة يابانية في هذا المجال

الدور علي السيارات بس لسه شوية عشان سمعتها القديمة المنيلة

و إحنا في انتظار تقرير JDPOWER لسنة 2008 هيكون الحكم علي موديلات هيونداي الحديثة بعد 2005

و لكل مجتهد نصيب ،،

و ادينا بنشجع اللعبة الحلوة ،،،،

اقتباس:

---

و ادينا بنشجع اللعبة الحلوة

---

يا باشا احنا حتى التشجيع مش كويسين فيه :(

أوافق حضرتك تماما على رأيك... الفرق مش سنين ضوئية ولا حاجة و الكوري في طريقه للمقدمة ....حتى الصيني و الماليزي و الهندي حياخد وقته و يوصل.
النقطة اللي بقولها الكوري ....هيونداي... كويس بس مش زي الياباني...تويوتا هوندا نيسان مازدا ميتسوبيشي .... لسه شوية ولا إيه :)

اقتباس:

---

المشاركة الأصلية كتبت بواسطة Chicco

النقطة اللي بقولها الكوري ....هيونداي... كويس بس مش زي الياباني...تويوتا هوندا نيسان مازدا ميتسوبيشي .... لسه شوية ولا إيه :)

---

بالنسبة ليا كعميل هادفع فلوس لسه ثلاث شويات

مش هاروح اشتري عربية عشان خدت جايزة !!!!

و انا شايف قدامي اللانسر مثلا ( رغم إني مبحبهاش ) بأجيالها بطة و كريستالة و بومة ( الأسماء المعربة ) اثبتت جودة هايلة

بس كتقييمات و ريفيهوات و خلافه ،،، تويوتا و هوندا فقط مش كل الياباني

و ده كلام ارقام المبيعات و تقييمات الجودة من المؤسسات المختلفة

عموما برده اللي بيشتري كوري مش خسران مثلآ في المنتديات الخليجية بيقيموا الموضوع كده :_

1- فرق سعر ،،بسعر الياريس اشتري النترا بسعر الكورولا اشتري سوناتا ، بسعر الكامري اشتري ازيرا

2- جودة هتعيش خمس سنين من غير مشاكل مؤثرة و دي فترة كافية و قياسا علي الأجيال القديمة مش الأجيال الحديثة

3- بالنسبة ليهم وده الغريب عكسنا تماما ،، أسعار الياباني مبالغ فيها و سرقة ،،

بالنسبة لينا في مصر رخص قطع الغيار و الصيانة و توفرهم شئ هام ،، حتي لو بتشتري عربية جودتها خيالية و بتمشي بالشمس و الهوا زي ما في

المنتدي بيقولوا لأنك متضمنش تلبس في مطب ،، سواق ميكروباص يديك بوسة ،، غير إننا بنجيب العربية اللي بيجبوها بره اساسا عشان يشتري

حاجات السوبر ماركت و نفتكرها عربية سباق و عربية سفر و عربية عائلة و وقت الزنقة تشتغل نص نقل

فميزة في الكوري إنه بينزل بمواتير 1600 CC حتي في أصغر فئاته تستحمل طلباتنا حاليا من تكييف و أتوماتيك و خلافه ،،

يعني إمكانيات اعلي بجودة مقبولة ( علي أسوأ تقدير ) بسعر و تكاليف تشغيل مناسبة

كلام جميل و كلام معقول ما أقدرش أقول حاجة عنه لكن السوق المصري المجنون مش لاقي فيه حاجة منطقية ;):d

اقتباس:

---

المشاركة الأصلية كتبت بواسطة Chicco

كلام جميل و كلام معقول ما أقدرش أقول حاجة عنه لكن السوق المصري المجنون مش لاقي فيه حاجة منطقية ;):d

---

في مصر لو أخذت رأي أي حد يقولك هات ياباني
و كل لما تسأل عن عربية ياباني
يقولك كفاية أنها ياباني ........ و مين يشهد للعروسة
في مبالغة كبيرة جدا في موضوع بلد منشا السيارة في مصر و يقل هذا الكلام في الدول المتقدمة و ينظرون إلى المنتج نفسه و ليس بلد نشأته ما عدا الصين سمعتهم ما شاء الله مسمعه في ارجاء المعمورة
...................................
رأيي الشخصي البحت
إن في شركات غير يابانية أصبحت تقوم بإنتاج جيد و منافس في الجودة مع لمعان اسم اليابان على المنتج و أيضا لمعان و بريق جودته و سمعته
أنا أشعر أن شركة هيونداي مثلا لها انتاج ممتاز من ناحية الجودة
و سيارتهم في مصر خصوصا اجيال ما بعد سنة 2000 تشهد بذلك
و أيضا كيا ....... شركة محترمة جدا
و دايو ........ سيارة الشعب الأولى مع الفيرنا
و بروتون الماليزية التي تقدم موديلات جميلة بجودة جيدة جدا و لكن وكيلها الغير معني بالاعلانات و التسويق مش مخليها مشهورة قوي في مصر على عكس انجلترا مثلا

من الآخر العربيات الياباني ممتازة
و الشركات الأخرى الكوري أيضا ممتازة
و أنا لا أرى فرق كبير إلا في الإسم

اقتباس:

---

المشاركة الأصلية كتبت بواسطة tutankhamoun

في مصر لو أخذت رأي أي حد يقولك هات ياباني
و كل لما تسأل عن عربية ياباني
يقولك كفاية أنها ياباني ........ و مين يشهد للعروسة
في مبالغة كبيرة جدا في موضوع بلد منشا السيارة في مصر و يقل هذا الكلام في الدول المتقدمة و ينظرون إلى المنتج نفسه و ليس بلد نشأته ما عدا الصين سمعتهم ما شاء الله مسمعه في ارجاء المعمورة
...................................
رأيي الشخصي البحت
إن في شركات غير يابانية أصبحت تقوم بإنتاج جيد و منافس في الجودة مع لمعان اسم اليابان على المنتج و أيضا لمعان و بريق جودته و سمعته
أنا أشعر أن شركة هيونداي مثلا لها انتاج ممتاز من ناحية الجودة
و سيارتهم في مصر خصوصا اجيال ما بعد سنة 2000 تشهد بذلك
و أيضا كيا ....... شركة محترمة جدا
و دايو ........ سيارة الشعب الأولى مع الفيرنا
و بروتون الماليزية التي تقدم موديلات جميلة بجودة جيدة جدا و لكن وكيلها الغير معني بالاعلانات و التسويق مش مخليها مشهورة قوي في مصر على عكس انجلترا مثلا

من الآخر العربيات الياباني ممتازة
و الشركات الأخرى الكوري أيضا ممتازة
و أنا لا أرى فرق كبير إلا في الإسم

---

+1000000000000000
و عايز اقول زيادة عن كدة يا جماعة الموضوع نسبي بحت... يعني مثلاً إللي بيخلي الناس في مصر تجيب سيفيك أو حتى أفينسيس و ما تجيبش باسات (نفس الفئة) هو إيه؟؟
نفس اللي بنقولوا... لإن السيفيك و الأفينسيس سيارات ممتازة و فيها نفس الكماليات و الإمكانيات اللي في الباسات بسعر أرخص.. اللي بيجيب الباسات بيبص للإسم و الصناعة الألماني ... بس مش معنى كدة إن السيفيك و الأفينسيس الياباني وحشين ...
يعني يا جماعة اللي راكب إس كلاس دة على كدة أكيد بيقول ياباني مين يا عم دول لسة قدامهم 100 سنة..

ما تنسوش إن الإكسل إشتغلت مع الشرطة فترة ... صحيح قصفوا عمرها لكن نفس الشيئ حصل مع الكورولا الياباني و اللي فاضل منها شوفوا منظروا عامل إزاي و دلوقتي معاهم نوبيرا و متوقعلها نفس المصير......

و يا جماعة موضوع السيارات الكوري تفيل مصري دة انا بصراحة مش فاهم الناس نازلة سلخ في العربيات دي ليه؟ كتير أعرفهم معاهم إكسيل و أكسنت و فيرنا و لانوس و العربيات زي الفل ماشاء الله و أكتر عربيات شايفينها في الشارع و شغالة رزع طول النهار مع الشركات و مندوبين شركات الأدوية مع صيانة قليلة
و السيفيا إتجمعت في مصر و السوناتا بتتجمع في مصر و الشيروكي بتتجمع في مصر و الـ 406 و الـ 405 دة غير الـ E و الـ S class و الـفئة الثالثة و السابعة..
و شكراً..