تقرير البلوبيرد سيلفي بعد شهر و 1650 كم
السلام عليكم
البلوبيرد سيلفي
انا قصتي مع العربية دي بدأت في معرض اوتوماك 2009. كانت فيه واحدة كحلي منها منورة الجناح بتاع نيسان. و لأن جناح نيسان كان في اول المعرض، كانت اول عربية لفتت نظري يومها. و لما لفيت في لمعرض كنت باقارن كل عربية اركبها بيها، و في الاخر قبل ما امشي رحت و ركبتها مرة تانية.
المهم ان من يومها و انا باحاول استشف اي اخبار عنها وسألت في موضوع سابق اذا كان حد اشتراها و جربها مالقيتش.
المهم من حوالي ست اسابيع لقيت شركة اوتو ايجيبت عاملة عروض جديدة على العربية دي و تخفيض في سعرها فتوكلت على الله و اشتريتها بعد صلاة الاستخارة.
السيارة من انتاج مصنع دونج فونج الصيني المشترك مع نيسان. و الموجود في مصر منها فئة واحدة هي اللي انا باوصفها سعرها المعلن بعد التخفيض 132 الف بس ممكن تاخد خصم على السعر ده انت و شطارتك.
فيها فتيس اوتوماتيك و تكييف طبعا - باور ستيرنج كهربائي- 2 ايرباج- ABS,EBD, BA - فرش جلد - ابنوس- فتح التنك و الشنطة من الداخل- حوامل اكواب امامية و خلفية - زجاج كهربائي امامي و خلفي و بتحكم من عند السائق- انوار ضباب امامية و خلفية - مقابض نيكل - Smart Key لفتح و قفل السيارة و ادارة المحرك بدون مفتاح
و مواصفات السيارة موجودة على موقع نيسان مصر في الرابط التالي
Nissan Home
عايز اقول لكم ان العربية دي ادتني احساس رائع من يوم ما جبتها. عارفين زي ايه؟ زي اللي يخطب و يتجوز عن حب.
الفرق بين ركوب العربية دي و ركوب الصني عامل زي الفرق بين انك تخرج مع خطيبتك، و انك تخرج مع واحد صاحبك.
اولا الشكل الخارجي شيك جدا يديك احساس بالفخامة و الرقي. المنظر الجانبي (البروفيل) بالذات رائع. و كمان المقدمة و المؤخرة في منتهى الجمال.
الصالون الداخلي فخم جدا جدا، الكراسي مكسوة جلد و التابلوه مطعم بالخشب. العدادات واضحة جدا و انوارها و الوانها جميلة. العربية مجهزة براديو سي دي و ايريال الراديو موجود في الزجاج الأمامي. التابلوه للي شافوا التيدا فيه شبه كبير من تابلوه التيدا بس الخامات افخم.
اميز و احلى حاجة في العربية هي اتساع الصالون الداخلي. و بالأخص في الخلف. و على حد قول احد المواقع المتخصصة ان اتساعها الداخلي لا يصح ان يقارن بفئتها من السيارات متوسطة الحجم و انما يقارن بالفئة الاكبر مثل (تويوتا كامري).
الحاجة المميزة جدا في العربية دي ان مالهاش صوت تقريبا. العزل عن الأصوات الخارجية ممتاز و صوت الموتور بالكاد تسمعه لو بتشد.
الديريكسيون ناعم و تدوره بصباعك (Electric Power Steering).
و علشان كده اول ما تركب العربية تلاقي نفسك مرتاح في مكان واسع و فخم و هادي، و ده بالتالي بينعكس على طريقة القيادة، تحس انك مش عايز تشد و لا تجري. و ده ليس لأنك مش تقدر وانما لأن حالة الهدوء و الاستمتاع اللي انت فيها بتخلي سواقتك هادية علشان تستنى في العربية اطول وقت ممكن. ده حتى في الاسابيع الأولى كنت باتلكك لأي مشوار علشان اخدها و اخرج بيها و اسمع ام كلثوم كمان.
اماكن التخزين في الصالون كتيرة و الكونسول اللي في الوسط و هو مقفول يستعمل ايضا كمسند للذراع اليمين.
المتعة الكبرى بقى لما اخدت العيلة و ركبنا كلنا فيها. كنا كلنا مرتاحين و الأولاد ورا كانوا هايصين.
دلوقتي بخصوص اداء العربية.
انا قلتلكم ان مالهاش صوت، ولكن العربية دي من اللي يحبوا يشتغلوا في صمت. يعني لو حبيت تشد بيها استجابتها رائعة، و ناعمة جدا . الكيك داون فيها خطير.
هي باختصار في السحب زي الصني بس من غير صوت، و يمكن احسن شوية كمان.
سقتها على سرعة 160 بدون تكييف، و 140 بالتكييف (و حاولت ازود بس الطريق ما ساعدش بس العربية كانت بتقول) و الثبات الشهير بتاع نيسان و لا كلمة فيه. و في الغرز برضه مافيش مشاكل.
استهلاك البنزين: لو حسبت متوسط جوه و بره البلد و التكييف شغال معظم الوقت حوالي 220 كم الصفيحة.
على الطريق و سايق 140-160 و التكييف شغال 200-220 كم الصفيحة.
على الطريق و سايق 90-100 و التكييف شغال 320-360.
حاجة كده تفكرني بالكريستالة الله يرحم ايامها.
على فكرة السرعات و الإستهلاك ده و العربية محملة بالعيلة بكاملها مش و انا لوحدي.
الفتيس الأوتوماتيك بتاعها زي الصني زى التيدا فيه نفس النقلات و الأوفر درايف بس من الحاجات اللي مش فيها و افتقدتها: ال Shift Lock Override Button اللي هو الزرار الأحمر اللي قدام الفتيس في الصني اللي بيفك الفتيس من البارك و انت طافي العربية. و ده معناه انك لازم تركنها صف اول مظبوط و ما ينفعش صف تاني. و على فكرة ما بتحسش بالنقلة خالص و انت ماشي من شدة النعومة.
بالنسبة للعفشة
العفشة في منتهى النعومة يعني ما بتدبش في المطبات زي الصني ما بتعمل بس نعومتها دي بتديك احيانا احساس بالمرجحة في بعض المطبات بس مش حاجة مزعجة بالمرة. كمان هي تقريبا اعلى من الصني شوية
طبعا فيه حساس للركن في الاكصدام الخلفي ده غير ان المرايات الجانبية الرؤية فيها ممتازة اوسع و افضل من الصني. زر تشغيل المرايات الجانبية عامل زي بتاع الكورولا . اما مراية الرؤية الخلفية اللي في الصالون فالرؤية منها يعوقها درجة انحدار الزجاج الخلفي و وجود مسندين للرأس في الخلف, بس مقبولة.
من الآخر دي عربية تستاهل تمنها
طبعا مستعد لإجابة اي تساؤلات
مع تحياتي
د. عيد
ملحوظة: حاولت احمل صور و ما عرفتش