الموضوع: **ألــــــــــــــف مبــــــــروك إنضمــــام وائـــل عطية لمالكى فـــورد فوكـــاس**

وائل طول عمره بتاع المفاجآت :)

ألف مبروك و ربنا يباركلك فيها

ألف شكر لحضراتكم جميعاً على الشعور الطيب دا وعلى الكلمات الجميلة اللي اتقالت وهى دي الباقية بالنسبة لي لأن العربية إلى زوال والإنسان نفسه إلى زوال ولا يبقى إلا الذكرى الطيبة ...مرة أخرى باشكر كل من استقطع جزء من وقته لتهنئتي.
بالنسبة للعربية ..هى الحقيقة معايا بقالها شوية وماكنتش عايز أعمل موضوع عنها علشان ماأزعجش حد بأني أخد من وقته علشان يباركلي ..ومن ناحية تانية إحنا مع بعض على الحلوة والمرة وفضل المنتدى بأعضائه عليا كبير ..
المهم ..حبيبي محمود حفناوي هو اللي خد المبادرة وبلفتة جميلة عمل هو الموضوع دا وباشكره عليه..بس هو نسي يقول إن العربية مستعملة مش جديدة ..فأنا حبيت أوضح النقطة دي..هى موديل 2003 أوتوماتيك 1600 سي سي جميع الكماليات (تكييف باور سنتر - 4 زجاج كهربائي تاتش رفع وخفض - ABS - Air bag - مرايات كهرباء - مفتاح ريموت لفتح وغلق الأبواب وفتح الشنطة ورفع وخفض الزجاج) يعني الحمد لله فيها تقريباً كل حاجة وجبتها بسعر كويس .
ولما اتعرضت عليا العربية دي لقيتها معقوله قوي بالنسبة لسعرها وإمكانيتها ودا خلاني أسحب مقدم حجز الياريس (كنت هاجيبها كاملة أوتوماتيك)، فعملت مقارنة سريعة كده بينهم وتوصلت إن الفوكاس أنسب بالنسبة لي في الوقت الحالي.
ملحوظة : أنا كنت برده حجزت الـ SX4 قبل الياريس ولما اتصلوا بيا علشان أستلم اترددت تاني واسترديت فلوسي
المهم ..الحمد لله العربية للآن كويسة جداً وحاسس إنها عربية قوية وعملية بدرجة معقولة ..ادعولي إنها تكون اختيار موفق إن شاء الله.
لأي استفسار أنا تحت أمر حضراتكم

مليون مبروك و ربنا يبارك لك فيها ان شاء الله .

بتخيل موقف مضحك .. إفرض قدرا(لا قدر الله طبعا) يا أستاذ وائل انك بتفرمل وانت ماشى عادى قمت سامع "إيىىىىىىىىىىىىىىى" .. صفارة فى تيل الفرامل .. قمت جاى تركن لقيت فيه عيب فى الدركسيون.... هتعمل إيه ؟

يعنى نفهم من كدة ان الساحة الأمريكية هتدب فيها الروح؟

طبعا وائل من الأصوات المؤثرة جدا فى المنتدى ورأيه الفنى له مصداقيته والتالى معنى شراؤه للفورد ان فيه شريحة عريضة من شعب المنتدى هتحط الفورد فى اعتباراتها وهتفكر فى شراءها

عموما يا باشا الف مبروك (مش هقوللك وتدوبها فى عرق العافية علشان انا عارف انها مكيفة وبالتالى لا مجال للعرق، كما ان الفورد فورد لو دابت رفارفه) وربنا يملاهالك بركة من الإكصدام للإكصدام

الف اف الف مبروك