اخيرا و بعد لف و سؤال و تدقيق في سوق العربيات لمدة شهور استقريت علي السيريون و حجزتها من اسبوع

و استلمت و رخصت انهاردة الحمد لله ..
و بجد كل الشكر للناس اللي في المنتدي خاصة ابو عبد الله لأن اي سؤال كنت بسأله هنا كنت بلاقيله اجابة فورية
و فادني سواء في مرحلة الاختيار او التعاقد

انا جبت اللون الأحمر ..
و بجد الناس في شركة دايهاتسو ناس محترمة جدا جدا .. المندوب اللي طلع معايا من الشركة عشان يرخصلي العربية
وراني كل حاجة في العربية ساعة الإستلام .. شاملة طقم الدواسات و طفاية حريق و العجلة الستبن .. الخ

و ساقلي العربية لغاية المرور و اما وصلنا انا معملتش اي حاجة هو اللي كان بيخلص الورق و هو اللي علق النمر و كل حاجة و كان راجل محترم جدا .. و الصراحة انا اتكسفت من مجهوده يعني فا حطيت مبلغ في ظرف و اديتهوله بعد ما خلصنا قاللي ابداااا لا يمكن .. و قعدت اتحايل عليه ييجي 5 دقايق مرضيش برده و قاللي ده شغلي يا استاذ و الله عيب .. و ده كبر الشركة في نظري اوي لأن عادة محدش بيعمل كل المجهود ده الا لو عايز يتغمز بحاجة

غير اللي كان ماسك الورق من الأول .. كان كل شوية يكلمني و يعرض عليا خدمات و مخليني علي اتصال بالموضوع خطوة بخطوة و خددت معاد للإستلام .. و في الوقت بالدقيقة كانت العربية قدامي و فيها كل حاجة تمام

بجد الناس دي متعبتنيش في اي حاجة بجد .. انا حاسس اني معملتش اي حاجة بنفسي هما خلصوا كل حاجة انا يادوب كنت موجود بس ساعة التعاقد و ساعة الترخيص .. ما شاء الله وكيل محترم جدا .. و اسمع انه كدة في الصيانة برده

اما بالنسبة للعربية نفسها فا انا اتأكدت فعلا اني اخترت الأختيار الصح .. انا مشيت بيها حوالي 36 كيلو كانت ثابتة جدا ..
الدريكسيون ريشة .. الباور بتاعها رهيب .. و الكاسيت صوته حلو كنت واخد معايا سي دي عشان اجربه

الدبرياج كانت خفيف شوية اول ما ارفع رجلي العربية تبطل .. بس قالولي في التوكيل ان الموضوع ده هيفك مع الوقت لأنه لسة جديد
و العربية بطلت مني كتير في المرور و الناس كانت بتبصلي بصة "ما تتنيلوا تتعلموا السواقة قبل ما تجيبوا عربيات !!" ههههههههه
شغلت التكييف من باب الفضول كدة 5 دقايق مع ان كنت بردان جدا من غير حاجة .. بس لقيت صوت الموتور عادي جدا و صوت التكييف نفسه مش باين اكني مش مشغله ..

و الحمد لله كله عدا علي خير و روحت بيها البيت و اهي مركونة في الجراج
و انشاء الله اصورها و احط الصور قريب