الموضوع: ما هو ضغط إطارات ال 320 موديل 2009؟

كلامك سليم 100% يا أحمد باشا ، العربية بيكون عليها label مرسوم فيه ودعين على الاقل ، وضع فيه 3 ركاب و شنطة صغيرة ، و دي الحمولة العادية و ليها ضغط ، و وضع تاني خمس ركاب و 3 شنط و دي أقصى حمولة و ليها ضغط تاني .
و هتلاقي جانب كل حمولة رقم للكاوتش الأمامي و رقم للكاوتش الخلفي ،
بس المعلومة إلي أحب اضيفها إن الضغط بيكون مكتوب بالبار ، يعني الرقم هيكون 2.2 و 2.4 مش 22 و 24 ، و دول لزم يتحول إلى PSI الاول عشان هنا في مصر بنستعمل ال-PSI مش البار ، أرجو من الأستاذ ياسر يراجع الارقام تاني كويس لأن كدة فعلاً قليل قوي ، هو أكيد مش هيحس بمشكلة لأن ال-run flat هيستحمل، بس مع الوقت هيقلل عمر الكاوتش و هيتأكل بسرعة .

المشاركة الأصلية كتبت بواسطة yasserelsayad

هى 22 و 24 صح وهو ممكن يتأكد من الـ label لو شاكك و بعدين 2.4 bar يعنى حوالى 35 :) وانا بتكلم على ضغط الهواء فى الظروف العادية ومهما كان الحمولة اخر الكاوتش يبقى 32 مثلا عشان ميبوظش عشان دا جنط 16

ماعلش يا ياسر باشا ، هو إيه علاقة إن الكاوتش يبوظ بإن الضغط يزيد عن 32 و إن قطر الجنط يكون 16 ؟ هل فيه سبب علمي لكدة ؟
ضغط الكاوتش المناسب لكل عجلة في العربية بيكون معتمد على حجم الهوى المناسب داخل الكاوتش و كمان الوزن الواقع على هذا الكاوتش ، و بالتالي داخل فيه قطر العجلة و عرضها و ارتفاعها و كمان الوزن فوق المحور دة ، و دة عادي جداً يزيد أو يقل ، و طبعاً كمان بيتغير مع درجة الحرارة ، يعني صيف و شتاء ، الضغط الاقصى إلي بيتحمله الكاوتش بيوصل إلى 50 و 60 PSI ، و أكيد ال-run flat هيكون أعلى من كدة كمان ، بس احنا مش بنتكلم على أقصى ضغط احنا بنتكلم على ضغط تشغيل .
بالنسبة للضغط المناسب للعربية دي (أنا راجعت الكتالوج عشان أتأكد بس ) هو فعلاً 32 أمامي و 35 خلفي في الحالات العادية و في التحميل الزيادة ، يعني الحالتين واحد . و كاتبين معلومة تانية بالنسبة للطرق السريعة ذي ما أحمد علاوي قال إن في السرعة أعلى من 160 ضغط أمامي 32 و خلفي 39 .

المشاركة الأصلية كتبت بواسطة Ahmad Allawy

غير التآكل بقي كمان..
بيضرب من الجنب كده بعد ما بيعمل زي البالونة كده اللي بتطلع مع المطبات.. ودي شوفتها لما دورت علي النت.. في صورة ليها..

أحمد باشا كلامك سليم مرة تانية ، بس في حالة العربية دي مش هتعمل بلونة لسبب بسيط جداً ، و هو إن الكاوتش دة run flat ، و الميزة في ال run flat إنه بيكون الجوانب بتاعته قوية جداً عشان تستحمل وزن العربية لما يكون مفيش هوا فيها ، عشان كدة مش هتعمل بالونة بس مع الوقت هتكسر و تعمل شقوق