(تخاريف 1) ... سلامه يبحث عن سياره ... PAYOO
البطل:- مواطن مصري مطحون أسمه "سلامه"
بعد عناء السنين وبهدلته مع العربيات القديمه المكسره قرر يطلع إلي تحت البلاطه ويخرج تحويشة العُمر ويقتني عربيه جديده
البطله:- سيارة من السيارات المنتشره في مصر وبنت حلال برضه زي "سلامه" وأسمها لسه مانعرفوش عشان "سلامه" لسه ماخترهاش
------------------------------
"سلامه" بعد طول تفكير وبعد سؤال القريب والغريب قرر انه يرتبط بسياره بنت حلال زيه عشان ترحمه من البهدله إللي أتبهدلها مع السيارات القديمه المطحونه
"سلامه" نزل المعارض والتوكيلات وبدأ يتفرج على العربيات عربيه عربيه
وفي مره من المرات نزلت معاه أساعده في اختيار عربيه مناسبه له ولاحظت أنه بيعمل حاجات غريبه وتصرفاته الغريبه دي خلت أصحاب المعارض تقلق منه قوي لأنه كان بيقرب من كل عربيه و يهمس وكأنه بيوشوشها !!!!
طبعا الناس أفتكرته مجنون لأنه بيكلم العربيه وانا عن نفسي مافهمتش هوه بيعمل أيه وبيحاول يكلم العربيه ليه ؟؟
وسألته وقال لي انه لازم يكون فيه ألفه بينه وبين العربيه إللي هايرتبط بيها ولازم لما يكلمها ترد عليه
طبعاً أنا ندمت على أني سألته السؤال ده ، وندمت أكتر أني نزلت معاه أصلا
بس فضوللي خلاني أسأله سؤال تاني
سألته ليه يا "سلامه" بتعتبر إن علاقتك بالعربيه علاقة أرتباط ؟ مع أنك ممكن كل فتره تقتني عربيه مختلفه ؟
قال لي :- لاااااا أنا مش زي بقيت الناس أنا مقدرش كل شويه أغير عربيه وأخسر فيها فلوس ، وكمان أنا وعربيتي بيبقى في عِشره بيننا و ألفه و مودة و .... و..... (فضل يكلمني عن العِشره وكانه رايح يتجوز)
المهم في اليوم ده مالقيناش حاجه مناسبه له خالص لأني أكتشفت أنه حاطت ميزانيه للسياره أول عن أخر 30ألف جنيه ومافيش عربيه جديده بالسعر ده
وتركت "سلامه" يكمل مشوار البحث عن سيارته إللي بيحلم بيها ومن وقت للتاني بقى يجي لي يحكيلي على إللي بيحصل
---------------------------------
تعالوا نشوف مع بعض "سلامه" وصل لأيه ؟؟؟
"سلامه" في يوم وهو بيدور على بنت الحلال لقى عربيه "فيرنا" لونها أبيض في أبيض ، وقف قدمها زي الصنم وماتحركش وظل يتخيل نفسه الفارس إللي راكب فرس أبيض وبدأ يقرب منها بشويش خطوه خطوه وهوه متحفز وبيترعش وكأنه رايح يلمس واحده ست (والعايذ بالله) وأول ما حط أيده على الكبوت سمع الـ"فيرنا" بتقوله:- عيب كده يا "سلامه" ماتلمسنيش إلا لما نرتبط رسمي"سلامه" شال أيده بسرعه وهو مكسوف وقالها :- أسف جدا يا "فيرنا" بس أنا معرفش اتقدم لمين واطلب أيدك من مين ؟؟
قالتله:- عندك خالي "غبور" أتقدمله وأطلب أيدي منه وهوه إن شاء الله هايوافق وهايجهزني أحسن جهاز بس على قد ما هاتدفع من مَهر
قال لها:- طب ومَهرك كام يا " فيرنا "؟؟
قالت له:- أتكلم مع خالي "غبور" في الأمور دي أنا مابتكلمش مع حد في الأمور دي
قال لها :- هو أنت مصريه يا " فيرنا " ؟
قالت له:- لا أنا اصلي (كوري) وتجميعي (مصري) وفي شوية حاجات فيا مصري
قال لها :- يعني كوريه مصريه؟
قالت له:- أيون أنا كورية الأصل مصرية الفرع ، عجبتك بقى ولا لأه ؟
قال لها :- أنتي تعجبي الباشا يا حلوه انتي يا بيضه يا سكر يا....
برقت له ونورت النور العالي وقالتله:-أيه ده يا "سلامه" انت هاتخليني أغير فكرتي عنك ولا أيه ؟ انت بتعاكسني ولا أيه؟
قال لها :- لا والله يا " فيرنا " مش قصدي معاكسه ولا حاجه لا سمح الله ، أنا هاروح حالا أطلب أيدك من خالك
ومن غير ما "سلامه" يفكر ولا يسأل ولا يشور جري بسرعه وخلص الأجراءات ودفع إللي معاه مقدم لعربيته الجديده بالرغم من إن سعرها ضعف الميزانيه إللي كان حاططها في دماغه ومع ذلك ما هموش وجاب العربيه إللي حس أنها بتناديه زي ما قال لنا قبل كده
وإن شاء الله هانتابع مع بعض يوميات "سلامه" و "فيرنا" ولو عاوزين تناقشو سلامه أنا ممكن أجيبه يقعد كل يوم ساعه يرد على رسائلكم إللي هاتسيبوها هنا
وأشوف وشكم بخير
"PAYOO" صديق "سلامه" الروح بالروح