الموضوع: تغطية لمهرجان الشيكولاتة

أولا أحب اوضح للكل ان الموضوع بقصد تغطية الحدث فقط ، و لا يقصد منه اغاظة اى شخص او جريان ريق أى أحد ...

الأربعاء الماضى و بعد انتهاء معركة الأمتحانات الشهرية لبناتى و الحمد لله ، لقيت الآنسات راجعين و معاهم دعوتين لمهرجان الشيكولاتة علشان فصلهم هو الأول فى اليوم الرياضى ...

يا سلام ... دعوتين ... و لمهرجان شيكولاتة ...

فين بقى ال Chocolate Festival ده ... انتركونتننتال سيتى ستارز ... من 1 - 4 ابريل

و طبعا فيه تنويه ان فيه ركن مجانى للأطفال و DJ و عرض ازياء من الشيكولاتة و غيره.

طبعا المكان يبقى علقة موت بالنسبة لواحد زى حالاتى من قاطنى المهندسين و لكن كان لازم انهار و أوافق امام الحاح بناتى و خصوصا انى عارف مقدار المعاناة اللى شافوها فى امتحانات الشهر (اللى كانت ولا امتحانات آخر العام).

الخميس كان موافق 1 ابريل ، اول يوم من المهرجان و ماكانش عندى عمليات و بالتالى غيبتهم من المدرسة و انطلقت فى العاشرة صباحا تحسبا لأى مقالب من زحمة الطريق.

أحب هنا انى اتوجه بالشكر لأخى العزيز الفاضل / كريم منير لأنى اتصلت بيه علشان ماكنتش عارف المكان كويس ، و تفضل مشكورا (و ربنا يكرمه و يجعله فى ميزان حسناته) بالوصف التفصيلى مع كل الدلائل الأرشادية للوصول هناك ،، و فعلا كنت ماشى على وصفه و كأنى عارف المكان بالضبط ، شكرا يا كريم ، اسم على مسمى فعلا.

بعد الوصول عرفت انه فى الدور -4 ، و توجت للقاعة و لقيتهم على الباب بيسألونى "حضرتك معاك دعوة؟" و طبعا أجبته بمنتهى الثقة "اتنين مش واحدة"

و كان أول مقلب ان الدعوة مالهاش علاقة برسم الدخول ... 35 جنيه للفرد ايا كان السن .. يعنى الصغير زى الكبير (المساواة مهمة برضه) .. طيب و الدعوة ؟؟ مالهمش دعوة بالدعوة ...

مافيش مشكلة ... علشان خاطر البنات ... و دفعت الفلوس ..

و كان تانى مقلب ان ده رسم دخول فقط ، يعنى مالكش اى حاجة مقابل اللى دفعته ده ... ولا حتى بونبوناية....

مش مهم ..

دخلنا الى القاعة الرئيسية ..

و كان ثالث مقلب ان الناس لسه بترص الستاندات و الترابيزات علشان هايبتدوا يرصوا الحاجة عليها ... دى الساعة بقت حداشر و مكتوب انه من 9 صباحا .. و لسه بيرصوا و يجهزوا الحاجة ؟؟؟

معلهش اهو نتفرج عليهم..

طبعا كان فيه حاجات شكلها جميل زى مثلا ثمرة قرع عسلى كبيرة و مرسوم عليها بالفواكه شكل وجه ، و مرة تانية بس بطيخة بدل القرعة ، و اطباق فيها بيتيفور اشكال و ألوان ... و الظريف ان لازم انك تحس انك فى مصر ... أول ما الزوار ابتدوا يدوقوا العينات اللى فى الأطباق ... راح اللى قاعدين عليها شالوها ...!!!
فيه ايه يا ناس .. هى دى مش عينات برضه ؟؟ تمام بس دى للعرض فقط مش للأكل ..!!! طب انت بتعرض ايه .. ماهو ده صنف لازم ادوق طعمه علشان احكم عليه ... هو الأكل بيتعرف من شكله و لا من طعمه ؟؟ معلهش ... هو كده ..

بلاش الستاند دى و نكمل جولتنا