تغطية لمهرجان الشيكولاتة

**Dr.SherifMansy** · 06-04-2010 12:33 AM

أولا أحب اوضح للكل ان الموضوع بقصد تغطية الحدث فقط ، و لا يقصد منه اغاظة اى شخص او جريان ريق أى أحد ...

الأربعاء الماضى و بعد انتهاء معركة الأمتحانات الشهرية لبناتى و الحمد لله ، لقيت الآنسات راجعين و معاهم دعوتين لمهرجان الشيكولاتة علشان فصلهم هو الأول فى اليوم الرياضى ...

يا سلام ... دعوتين ... و لمهرجان شيكولاتة ...

فين بقى ال Chocolate Festival ده ... انتركونتننتال سيتى ستارز ... من 1 - 4 ابريل

و طبعا فيه تنويه ان فيه ركن مجانى للأطفال و DJ و عرض ازياء من الشيكولاتة و غيره.

طبعا المكان يبقى علقة موت بالنسبة لواحد زى حالاتى من قاطنى المهندسين و لكن كان لازم انهار و أوافق امام الحاح بناتى و خصوصا انى عارف مقدار المعاناة اللى شافوها فى امتحانات الشهر (اللى كانت ولا امتحانات آخر العام).

الخميس كان موافق 1 ابريل ، اول يوم من المهرجان و ماكانش عندى عمليات و بالتالى غيبتهم من المدرسة و انطلقت فى العاشرة صباحا تحسبا لأى مقالب من زحمة الطريق.

أحب هنا انى اتوجه بالشكر لأخى العزيز الفاضل / كريم منير لأنى اتصلت بيه علشان ماكنتش عارف المكان كويس ، و تفضل مشكورا (و ربنا يكرمه و يجعله فى ميزان حسناته) بالوصف التفصيلى مع كل الدلائل الأرشادية للوصول هناك ،، و فعلا كنت ماشى على وصفه و كأنى عارف المكان بالضبط ، شكرا يا كريم ، اسم على مسمى فعلا.

بعد الوصول عرفت انه فى الدور -4 ، و توجت للقاعة و لقيتهم على الباب بيسألونى "حضرتك معاك دعوة؟" و طبعا أجبته بمنتهى الثقة "اتنين مش واحدة"

و كان أول مقلب ان الدعوة مالهاش علاقة برسم الدخول ... 35 جنيه للفرد ايا كان السن .. يعنى الصغير زى الكبير (المساواة مهمة برضه) .. طيب و الدعوة ؟؟ مالهمش دعوة بالدعوة ...

مافيش مشكلة ... علشان خاطر البنات ... و دفعت الفلوس ..

و كان تانى مقلب ان ده رسم دخول فقط ، يعنى مالكش اى حاجة مقابل اللى دفعته ده ... ولا حتى بونبوناية....

مش مهم ..

دخلنا الى القاعة الرئيسية ..

و كان ثالث مقلب ان الناس لسه بترص الستاندات و الترابيزات علشان هايبتدوا يرصوا الحاجة عليها ... دى الساعة بقت حداشر و مكتوب انه من 9 صباحا .. و لسه بيرصوا و يجهزوا الحاجة ؟؟؟

معلهش اهو نتفرج عليهم..

طبعا كان فيه حاجات شكلها جميل زى مثلا ثمرة قرع عسلى كبيرة و مرسوم عليها بالفواكه شكل وجه ، و مرة تانية بس بطيخة بدل القرعة ، و اطباق فيها بيتيفور اشكال و ألوان ... و الظريف ان لازم انك تحس انك فى مصر ... أول ما الزوار ابتدوا يدوقوا العينات اللى فى الأطباق ... راح اللى قاعدين عليها شالوها ...!!!
فيه ايه يا ناس .. هى دى مش عينات برضه ؟؟ تمام بس دى للعرض فقط مش للأكل ..!!! طب انت بتعرض ايه .. ماهو ده صنف لازم ادوق طعمه علشان احكم عليه ... هو الأكل بيتعرف من شكله و لا من طعمه ؟؟ معلهش ... هو كده ..

بلاش الستاند دى و نكمل جولتنا

**Dr.SherifMansy** · 06-04-2010 12:55 AM

ماكنتوش (كواليتى ستريت) كانوا عاملين ستاند يجنن

جايبين نفس العربية اللى بيجرها حصان مع تمثال للحصان و اللجام و السرج كله مترصع بالشيكولاتة بتاعتهم بكل الوانها ، و بنتين لابسين اللبس الأنجليزى القديم و واحد لابس عسكرى من حراس قصر باكنجهام قدام العربية ، تحس ان الصورة اللى على غطاء العلبة بتاعتهم طلعت قدامك.

شكلهم كان جميل جدا ... و بصراحة كانوا ناس محترمين جدا ، اللى عايز يتصور معاهم يتصور ، و اللى عايز يركب العربية و يتصور معاهم يتفضل يركب ، و بيوزعوا من الشيكولاتة بتاعتهم ، حتى لو اخدت اكتر من مرة ... بصراحة كانوا ناس محترمة جدا.

بعدهم ليبتون كانوا منزلين نوع شاى جديد و بيوزعوا منه للى يحب يدوقه ... بس بصراحة ماحسيتش بفرق بينه و بين الشاى العادى بتاع ليبتون... يمكن لأنى مش من هواة الشاى (انا مدمن قهوة أصلا).

الغريب ان فيه شركات مالهاش دعوة و بتعرض ، مثلا مصر للطيران بيعرضوا الكراسى الجديدة بتاعة الطيارة البوينج 777 و دى فى الرحلات المباشرة لأمريكا و انجلترا و كلها درجة رجال اعمال فقط .

كومبيو مى كانوا عارضين حاجات ليهم كمان..

ايه العلاقة ؟؟؟ مش عارف لحد دلوقت...

كان فيه نافورة بتاعة مكس شكولاتة على حليب و دى شكلها كان جميل و وزعوا اكواب منها على اللى يتفرج عليها..

شركة Passionelle عارضة منتجاتها الجديدة من نكهات غير تقليدية و أول مرة تنزل حسب كلامهم ... و لكن عملا بنفس مبدأ الشركة الأولى اللى عرضت فى الأول فالحاجات دى للفرجة فقط ...

يظهر ان المفروض الواحد يتخيل او يستنتج الطعم هايبقى ازاى من غير ما يجربه !!!

بعدهم شركة تانية اسمها النسمة و دى الشكولاتة بتاعتها من لبن الأبل ... بصراحة كنت خايف تكون ثقيلة او طعمها غريب بس طلع طعمها اكثر من رائع ، لدرجة انى وصيت اختى تجيب منها من الأمارات لأنها الشركة دى انتاجها لسه فى الخليج فقط و مانزلوش انتاجهم فى مصر حتى الآن.

و طبعا شركات تانية زى جالاكسى و غيرها و معظمهم بيسمح انك تدوق المنتج..

و هنا لقيناهم بينادوا على الأطفال علشان يتجمعوا سوا و طلبوا اننا نتبعهم لركن الأطفال ... و رحنا هناك

**Dr.SherifMansy** · 06-04-2010 01:05 AM

المشاركة الأصلية كتبت بواسطة aelhossan

ليا عند حضرتك طلبين
اولا نمرة الاستاذ كريم(عشان لو تهت ولا حاجه)واوفر تمن الجي بي اس

لو حضرتك اخذت بالك من كلامى تلاقى انى باشكره على خدمة قدمها لى ... مش علشان نقلبها تريقة و نضحك على كده ... حضرتك لو رايح مكان ماتعرفوش بتبقى بتدور على اى طريقة تعرف بيها السكة منين ... و عموما ممكن تبعث له على الخاص و تطلب رقمه و تناقش معاه حكاية توفير تمن الجى بى اس

المشاركة الأصلية كتبت بواسطة aelhossan

ثانيا لو امكن تتبناني انا وبنتي عشان احنا الاتنين بنموت في الشكولاته
(بس استحاله ادفع 35 جنيه عشان اتفرج عليها)
ده انا كنت بالمية جنيه دي غرقتها كوفرتينا
وربنا يخليلك البنات
ويجعله عامر

يا باشا اهلا بيك انت و بنتك ، بس واضح ان حضرتك مش مركز فى المكتوب تانى ...

انا مش داير ابعثر فى الفلوس او اتفنجر ... انا كنت رايح لأنى فاكر ان فيه دعوة فعالة مش منظر و بس ، و ماكنتش عارف ان ده رسم دخول بس ... و واضح من كلامى ان ده مقلب و انا شربته ، و لكن كله يهون علشان عيون بناتى ... امال الواحد دوره ايه فى الحياة لولاده ..
اما بالنسبة للكوفرتينا فماكانوش عارضين هناك ... يمكن كانوا مستنيين ان حضرتك هاتعدى عليهم فخافوا انهم يروحوا و ماتلاقيهمش فى مكانهم اللى انت بتجيب منه.
و ربنا يخليلك بنتك و ماتنساناش فى الكوفرتينا اللى هاتجيبها بالمية جنيه ..

و يجعله عامر

**Dr.SherifMansy** · 06-04-2010 01:08 AM

المشاركة الأصلية كتبت بواسطة human12

ههههههههههههههههههههههههه هه

سافرت من المهندسين لسيتى ستارز و دفعت مائه و خمسووووون جنيها مصريا عشان تتفرجوا على الشوكولاتا!!

الله يكون فى عونك

عشان كده انا بتوجس خيفه من اى حاجه فيها كلمه معرض او دعوه او اى حد يقولى مبروك ببقى عارف انى داخل على اشتغاله محترمه

ده اللى حصل فعلا و كان مقلب محترم للعبد لله

بس جاء فى الآخر بفائدة ان البنات قضوا يوم ظريف و كان فسحة حلوة لهم

**Dr.SherifMansy** · 06-04-2010 01:20 AM

ركن الأطفال ده اللى كان متعة فعلا و هون على المبلغ اللى دفعته لما شفت الفرحة فى عيون البنات.

قاعة كبيرة فيها دى جى ، و ترابيزات صغيرة لو حد من الاطفال حب يقعد عليها ، و اخيرا فى اخرها ترابيزة كبيرة 5 او 6 متر عليها كل ما يمكن ان تتخيله من الشيكولاته و منتجاتها ، شرائح شيكولاتة ، ميلفيه شيكولاته ، كور ، قوارب ، نافورة شيكولاتة بنى و نافورة شيكولاتة بيضاء ، و جنبهم طبق كريم شانتى ، و انواع فاكهة (زى الفراولة و الكانتلوب) مغروزة فى اعواد علشان تغمسها فى الشيكولاتة قبل ما تاكلها ، و بيوزعوا قبعة الشيف على الأطفال و يدخلوا عند الشيف وراء الترابيزة و يكتبوا اسمهم على الشيكولاتة بالشيكولاتة البيضاء و ياخدوه ياكلوه بعد ما الكل يصفق لهم ، و جيلاتين عادى و بالشيكولاتة ، و العاب اخرى بيمارسوها زى انهم يملوا قوارب الشيكولاتة بالكاسترد...الخ الخ

بصراحة الجزء ده هو اللى هون على الفلوس اللى اندفعت لما شفت البنات كانوا سعداء ازاى..

و هو ده الجزء اللى قعدنا فيه معظم الوقت

و هو ده برضه الجزء اللى الواحد اكل فيه كل انواع الشيكولاتة لما الواحد زهق بجد منها فى اليوم ده.

اخيرا كان فيه ستاند جميلة جدا فى الآخر عليها منحوتات من الشيكولاتة شكلها رائع ، زى راس تفرتيتى و برج ايفل و اشكال تانية كتير.

و انتهى اليوم و رجعت و البنات فى قمة السعادة و الأنبساط و الحمد لله

هارفع الصور فى اقرب فرصة ان شاء الله

و تحياتى

**Dr.SherifMansy** · 06-04-2010 01:43 AM

المشاركة الأصلية كتبت بواسطة most_h

فى داهية اللى اندفع قصاد فرحة ولادك

ربنا يحفظهم لك :)

شكرا لك..

و هو ده اللى خلانى افرح باليوم ده علشان فرحتهم ..

و بعدين ما هو لو اخدتهم ملاهى ... هاتدفع اكتر و فى كام لعبة الواحدة مش اكتر من 5 دقائق ، و لكن المهم انهم يتبسطوا و يفرحوا و الحمد لله

-

-

-

-

الموضوع: تغطية لمهرجان الشيكولاتة

LinkBack

أدوات الموضوع

عرض

تغطية لمهرجان الشيكولاتة - انشر الموضوع فى :

-

-

-

-

-

المواضيع المتشابهه

⊹. تويوتا كورولا ⊹ 2007 ⋋ عندما تعشق الشيكولاتة ⋌

تغطية معرض اتوماك اخبار اليوم..تغطية تحفة

تغطية السيارة

الكلمات الدلالية لهذا الموضوع

المفضلات

المفضلات

ضوابط المشاركة