الموضوع: معلومات من خبراء الاوبل و كل اللى عندوا فيكترا 97 ،،، افيدونا افادكم الله

المشاركة الأصلية كتبت بواسطة m_hasan204

السلام عليكم ورحمة الله

يا شباب انا معروض عليا فيكترا اوبل 97 2000 سى سى وحالتها جيده ، كاملة اوتوماتيك وفتحة سقف وفرامل abs وايرباج ،، العربية عاجبانى جدا ولكن لانى لسه جديد فى عالم السواقه كنت عاوز اعرف شويه معلومات ضرورية :

- العربية بتستهلك كام فى الصفيحة داخل البلد وفى السفر ؟
- الضريبة بتاعتها كام فى السنة ، انا سمعت انها 1000 جنيه ، هل الكلام ده حقيقى ولا لأ ؟
- قطع غيارها غالية قوى ولا ايه ، وياريت لو حد يجيب اسعار
- اكشف على العربية عند ميكانيكى ولا فى التوكيل ولو التوكيل هيتكلف كام ؟
- السعر العادل ليها كام ؟
- ايه الحاجات اللى لازم اغيرها فى العربية اول ما اشتريها وتكلفتها كام تقريبا ؟

افيدونا يا شباب افادكم الله ،،، مستنى ردودكم يا احلى منتدى

وعليكم السلام ورحمه الله
اولا اتاكد ان العربيه دي وارد الخارج مش مصري او حتي معوقين واتفك حظرها لان المصري منها من غير فتحه سقف وايرباجز . بص علي الزجاج بتاع الشبابيك لو لقيته جي ام فقط تبقي وارد الخارج انما لو مختوم عليه د جريش يبقي ملعوب فيها ماتاخدهاش كذلك الفرش من جوه هتلاقيه بلاشتاين لو الماني انما المصري تاكي .نرجع لموضوعنا ..
-العربيه بتستهلك حوالي 180 كم داخلي وحوالي 220 كم خارجي في الصفيحه
-ضريبتها حوالي 465ج في السنه
-قطع غيارها مش غاليه ومعمره جدا ( ادخل علي المواضيع المثبته هتعرف كل حاجه)
-السعر حسب الحاله بس المصري هنا تعمل من 45 -50 الف بالكتير ,هي مطلوب فيها كام؟
-هتغير سير كاتينه ودسير دينامو وفلتر هوا وبنزين وطقم بوجيهات وتيل امامي وخلفي وتشيك علي بليه الكاتينه والشداد وطرمبه الميه وطبعا هتغير فلتر الزيت مع الغيار بتاعه .
++اتاكد تماما ان التكييف شغال لان تكاليف اصلاحه مكلفه لو هتخلص في العربيه -كمان ياريت تقولنا الموتور لونه اسود من فوق وعليه لوجو اوبل ولا فضي ومكتوب عليه ايكوتك؟؟
وربنا يوفقك.

المشاركة الأصلية كتبت بواسطة m_hasan204

شكرا جزيلا فادى وتامر على الرد ،، العربية صاحبها طالب فيها 51 الف ،،، انا بس اللى موقفنى موضوع الضريبة لانى سألت واحد معرفة ليه ناس فى المرور قالى ضريبتها مش هتقل عن 1000 ،،، انت متأكد يافادى ان الضريبة 465 بس مش هدفع حاجة تانى ،،، وسير الكاتينة والحاجات دى هتتكلف فى حدود كام ؟

منتظر ردك يا فادى ،، ومتشكر على الاهتمام

لو فابريكه بالكامل واتاكدت انها استيراد مش مصري وحالتها حلوه مش ماشيه كتير فسعرها حلو جدا -الضريبه زي ماقلتلك وانا متاكد ان شاء الله وكمان بتقل 50 ج كل سنه مع احترامي لمعرفتك انا والدتي رئيسه قلم في نيابه المرور سابقا -سير كاتينه 65ج,سير دينامو60ج,فلتر بنزين35ج,طقم بوجيهات جي ام 100ج او بوش 65ج ...كله في الحنين .ماقولتلناش الموتور ايكوتك ولا اسود ؟

بص ياسيدي جبتلك نص القانون كمان...
الضريبه 1000ج بحد ادني 200ج للسيارات التي تزيد سعه محركاتها اللتريه عن 1630سم مكعب ولا تجاوز 2030سم مكعب علي ان يخفض هذا الرسم بواقع 5% (50ج) عن كل سنه تاليه لسنه الموديل .
++يعني عربيه موديل سنه 97 بقالها كام سنه؟13 سنه
13 ×50= 650 ج مخصومين من ال1000ج تمام .
اذن 1000-650=350 +رسم تنميه + حاجه كمان =465 ج واي خدمه ..

كلام تامر صح مش معاقين
و اغلب الظن ملعوب فى اساسها الا لو المانى اصلى
و سعرها حلو لو بحالة سليمه قوى