حاجة غريبة جداً حصلت معايا فى وسط البلد!!!

مش عارف إذا كان حد فيكم حصل معاه الموضوع ده قبل كده والا لأ!!

انا كنت فى وسط البلد وكالعادة لو رايح وسط البلد مبخدش العربية عشان الركنة والأرف ده وباخد تاكسى

كنت عند كنتاكى اللى فى ميدان التحريرومستنى تاكسى علشان أروح العجوزة.

عدى تاكسى قولت العجوزة ... قالى لا مش طريقى :(

كان وراه عربية 31 وقفت قدامى وفيها شاب محترم قالى رايح العجوزة قلته أيوه قاللى إتفضل إركب إستغربت أوى بس حسيت إنه شغال تاكسى.

المهم الطريق واضح وكنا بالنهار و مفيش مشاكل قلت أركب معاه وافهم منه فيه إيه!!

سالتوا هو ده تاكسى والا ملاكى ؟!!

قالى لا دى عربيتى بس وانا مروح من الشغل ممكن أخد حد معايا أوصله واجيب بنزين العربية :)

وفعلاً وصلنى العجوزة واديتله الأجرة ومشى وانا واقف مستغرب !!!

تم النقل للاجتماعي
الادارة (1)

يا باشا الموضوع دة انتشر قوى اليومين دول
فى ناس بتجيب عربية ملاكى مخصوص ويشتغلو عليها تاكسى علشان ميدخلش دوامة الاجرة والتامين والفحص كل سنة والضرايب ووجع القلب دة
فدة عادى خالص وهيبقلك كتيرررررر
بس يمكن انت مش واخد بالك منة علشان مش بتمشى من غير عربيتك كتير .

أيوه.. بس ساعات فعلا ناس بتتبرع بتوصيل الغير ، ومنهم أنا - بس لو لقيت أسرة (ويكون عددهم قليل) أو ناس كبيرة فى السن واقفين فى حتة مش سهل المواصلات فيها ويكونوا فى طريقى- مع اتخاذ كافة الاجراءات الأمنية.

الحكاية دي أصبحت منتشرة,شباب كتير بيعماها

ده بيحصل كتير في مصر..دي حركة خليجي في الأصل (تحديدا بتحصل مع أخويا في السعودية كتير) بس طبعا بشروط في مصر..يعني ما فيش واحدة محترمة عمرها تركب عربية ملاكي..
انا حصلت معايا زمااان كان في اسرة من اب وام وطفلين (أكبر ما فيهم عنده بتاع سنتين) كانوا بيجروا ورا اتوبيس ومرضيش يقف لهم مع انهم كانوا على المحطة..المهم انا خدتهم معي وفي آخر المشوار الراجل حب يحاسبني بس انا رفضت..مش تكبر والله بس عشان الثواب ما يضعش

المشكلة هنا هل الموضوع ده يمكن تقبله أم هو مرفوض؟؟ وإذا كان مرفوض هل بسبب الحفاظ على برستيج الملاكي ولا بسبب التهرب من الضرائب ولا بسبب عدم الأمان؟؟؟؟ وهل ممكن واحد بعربية مكيفة يعمل كده (حتة تاكسي العاصمة بقى)

انا عن نفسي لا أرفضه

سواء اللى وصل خد اجره ام عملها ابتغاء مرضاة الله

فده فى الاساس بادره ايجابيه للتعاون بين الناس

كنت بقف لاي حد يكون باين عليه التعب فعلا و اوصله في طريقي بدون مقابل.
لكن دلوقتي و بامانه بقيت بخاف و مش بعمل كده .
اما موضوع الفلوس ف انا شفت كتيييير اوي بيعملو كده سواء في الخليج او في مصر
و مره في صلاح سالم لقيت عربيه شاهين سودا و مركب عليها شبكه و شكلها من الامام و الخلف فعلا تاكسي لكن معلق نمر ملاكي و بيمشي ياخد زباين.
يمكن علشان التراخيص للاجره موقوفه او بيشوف اكل عيشه باي طريقه حلال و دا مش عيب و لا حرام في رايي

موجودين منهم كتير هتلاقيهم كمان عند مول الكمبيوتر بتاع روكسى واقفين يقولك اوصلك فى عربية ملاكى والمهم انهم عربيات حديثة

اكيد دي بادرة كويسة ان الناس تكون ايجابية شوية .. حتى و لو بياخدو فلوس

بتحصل كتير جداً في القاهرة
وبالأخص بعد قرار محافظ القاهرة بإيقاف إحلال تاكسي القاهرة بسيارات جديدة وقصر السيارات الجديدة على سعيد الحظ صاحب مشروع تاكسي العاصمة (القرا تابع لحزمة قوانين حماية الإحتكار والسادة المحتكرين)

لدرجة إني شفت ملاكي شغال تاكسي وحاطط لمبة تاكسي يرفعها على تابلوه العربية وقت لما يشتغل بعيداً عن أعين المرور

لكن أنا بنبه على جميع قريباتي السيدات لو لوحدهم أن لا يركبوا مع تاكسي ملاكي وقبل المشاورة للتاكسي أو ركوبه عليهم بالنظر إلى رقم العربية ولو كانت ملاكي متركبش معاه أبداً
لأنه لو لا قدر الله وطلع مجرم وهي راكبة معاه سيارته الخاصة الملاكي وهي مختارة يبقى رحنا بلاش
لكن بالنسبة للرجالة فالأمر ممكن يكون أسهل

أكثر مكان شفت فيه هذه الظاهرة في القاهرة في مدينة السلام

الموضوع ده حصل معايا فى المنصورة برضه و كنا الصبح و كده فركبت معاه انما طبعا السيدات و البنات لا طبعا فى اى وقت
انما انا شايف ان كل اصحاب العربيات يحاولوا يساعدوا الناس اللى مش معاها عربيات خصوصا لو كانوا فى حته مقطوعه او كدة و اظن لو كانت اسره صغيره او راجل و ست كبار فى السن علشان نكسب ثواب

كنت بعملة كتير وانا نازل من العاشر واخد حد في طريقي بس طمعا في الثواب
وبعد ما مرة حصلت مشكلة بسبب تهاوني في الاحتياط بقيت اخد باللي كويس قوي
وبالنسبة لستات معاك حق يا حازم
بس لا انسى ابدا اني في يوم كنت نازل من العاشر وعند معهد عساكر اللي قدام مدينة الشروق وكانت بعد المغرب بقليل والدنيا ضلمت ومعي اخ من الشركة وكان ملتحي لقيت اخت يبدو عليها علامات الالتزام بشدة قلبا وقالبا
واقفة على الطريق ولابسة اسود ومحدش هايشوفها ولو شافها وحب يقف لها هايكون عداها ب 200 او 300 متر
كنا لسه خارجين من المسجد من صلاة المغرب ولمحتها وقفتلها وقولتلها اوصلك
رفضت تماما حلفتلها اننا مش قصدنا وحش ابدا واننا اخوة لها في الله
ووقوفها في المكان ده هايعرضها لمشاكل كتير وسواقين نقل وميكروباصات وحاجات كدة
والجو مطرة وفي شهر يناير والجو تللللج وافقت على مضض وبعد ربع ساعة محايلة تقريبا واقولها والله انتي صعبانة عليا من اللي هايحصلك وفضلنا واقفين معاها شوية بالعربية انه يجي ميكروباص ولا اتوبيس ومفيش اي حاجة
وافقت في الاخر وركبت وانا سامعها قاعدة ورا بتترعش
صوت الشيخ البنا اللي كان شغال تقريبا وقتها خلاها تهدي وحاسسها حاطة ايدها يا عيني على مقبض الباب
سالتها بس معلش سؤال غلس ايه اللي وقفك كدة في الوقت ده
عرفت انها مدرسة في معهد عساكر الازهري علي الطريق وانها خرجت من 3:30 وعدي اكتر من ساعة ونص ماجالهاش اي حاجة توصلها
حمدت ربنا على نعمة الدابة اللي شايلة الواحد وعرفت قيمتها كتير

واللهي نفسي بس الواحد بدأ يقلق اليومين دول الناس احوالها تخوف...بس عملتها مره واحده من غير قصدي

اللذيذ بقي ان انا كنت مره وقفت اسأل واحد علي طريق قام فتح الباب ودخل قالي كويس ده في طريقي هركب اوصلك...وديه المره الوحيده اللي وصلت فيها حد واقف في الشارع...
بس ياجماعه اعتقد ان انا سمعت حديث ليه علاقه بالموضوع ...ياريت لو حد عارفه يقوله

اقتباس:

---

المشاركة الأصلية كتبت بواسطة moudy2002

يا باشا الموضوع دة انتشر قوى اليومين دول
فى ناس بتجيب عربية ملاكى مخصوص ويشتغلو عليها تاكسى علشان ميدخلش دوامة الاجرة والتامين والفحص كل سنة والضرايب ووجع القلب دة
فدة عادى خالص وهيبقلك كتيرررررر
بس يمكن انت مش واخد بالك منة علشان مش بتمشى من غير عربيتك كتير .

---

فى اكتوبر موجودة كتير اوى وعربيات موديلات جديدة

بصراحة أنا أخاف أوصل أى حد معايا سواء رجل أو إمرأة من اللى بنشوفه وبنقراه فى الجرايد
وربنــا يسترها معانا فى طريقنا

الموضوع دة منتشر عندنا فى السويس وحاجة عادية خالص وليهم كمان أماكن تجمع معينة ومعروفة

انا بعمل الموضوع ده طمعا فى الثواب ليس اكثر
بس مع راجل او سيدة كبار فى السن - وساعات شباب لو الاقيه ماشى فى حته مفاش مواصلات مثلا

يا جماعه عادى جداا يعنى الناس والشباب هايعملوا ايه مش احسن ما يعمل حاجه وحشه اهه بيعمل عمل كويس وفى الاخر يجيب بنزين للعربيه يجيب عشاء وهو راجع لاهل بيته ولا ها نحط ايدنا على خدنا ونقول الدنيا بقت غلاء ومش عايزين الناس تفكر ازاى تكسب قرش بالحلال


هى دى مصر يا جمعه (مسلسل دموع فى عيون وقحه )*عادل امام و صلاح قابيل*

ايه رايك بقي .. انا باركب ببلاش ... ... و مابخدش اجره كمان .. بس داخل نطاق بني سويف و يكون قريب من المكان اللي انا رايحه ..
الخيير عمال يقل في البلد يا جدعان .. هوه ايه اللي حصل في البلد ..

لا والله الخيرما قلش سيدنا النبى بيقول عليه افضل الصلاة والسلام ( الخير في وفى امتى الى يوم الدين)صدق رسولنا الكريم عليه افضل الصلاة والسلام

بس الفكرة يعنى مثلا لو انت رايح مكان معين وقابلت حد رايح نفس المكان اه ممكن تاخده معاك وربنا يجازيك خير
انما مثلا لو حد رايح مكان غير المكان الللى انت رايحه وانت وصلته بنيه الخير والمكسب الحلال مادام انت محتاج المكسب ده يبقى برده خيرو ربنا هايبارك لك
كله خير وكله رزق ان شاء الله

اقتباس:

---

المشاركة الأصلية كتبت بواسطة karim_monir

وبعد ما مرة حصلت مشكلة بسبب تهاوني في الاحتياط بقيت اخد باللي كويس قوي

---

ممكن تشرح الحته دى يا كريم ؟؟ :confused::confused:

الموضوع ده منتشر جدا في اكتوبر
في السعوديه منتشر جدا و عربيات جامده بي ام الفئه السبعه و انت طالع

الموضوع موجود كتير

قشطة كدة - الواحد لقى سبوبة باليل تجيب مصاريفى :-)

انا عن نفسي اخاف اركب شخص مش عارفه معايا في العربيه ممكن يكون حرامي او مجرم حتي لو كانت ست كبيره انا شايف انه خطر كبير