انا معاك ان الفراغ بيخلي في فضول ولازم من ممارسة رياضة او هواية بس دي متنفعش غير في الاجازة الصيفية لان اليوم الدراسي طويل مش مخلي اي وقت فراغ لاي حاجة تاني
[size=4][color=darkorchid
النقطة دي بالذات اسمحيلي حضرتك اختلف معاكي فيها شوية
أنا عارف ومقدر طبعاً النظام التعليمي الغبي اللى ساري فى بلدنا اللى بيعامل الطفل على انه معتقل فى المدرسة وعليه عقوبة أشغال شاقة مؤبدة لازم يقضيها طول النهار ويستمر فيها وهوا فى البيت ولحد ما ينام
بس بصراحة، يتحرق اللى عملوا النظام ده هما ومعتقلاتهم ومدارسهم والتعليم كله، انا مش هضيع على ابني بهجة وفرحة طفولته واعذبه ليل نهار 9 شهور فى السنة عشان أبسطهم، وارجع فى اجازة الصيف اقوله تعالى بقى يا حبيبي شوف تحب تعمل ايه وهو اصلا هيكون منهار نفسياً وعصبياً وجسدياً ومش عايز هيعمل اي حاجة غير انه يعوض النوم اللى اتحرم منه طول السنة
مفروض تكون الهواية ثابتة ومستمرة عشان يواظب عليها ويحبها ويطور نفسه فيها، ولازم بأي شكل من الأشكال أوفرله وقت يومي يمارسها فيه، حتى لو على حساب الأشغال الشاقة المؤبدة بتاعته
تعرفي حضرتك، كان عندي مدرسة عربي فى خامسة ابتدائي كل ما افتكرها يتحرق دمي وابقى عايز ارتكب جريمة قتل جدياً والله، مكانش عندها أي حاجة تعملها غير انها تفتح كتاب القراءة وتقولنا اكتبوا الدرس لحد ما الحصة تخلص، واما نروح برضه يبقى الواجب اننا ننقل الدرس تلات اربع مرات...منتهى العبثية وتضييع الوقت وترسيخ لقاعدة انقل ومتفكرش اللى موديانا فى داهية
وانا بصراحة مش هاقبل على نفسي اكرر التجربة تاني مع ولادي واحرمهم من رياضة أو هواية بيحبوها عشان يقعدوا ينقلوا الدرس 3 مرات ويبسطوا الهانم الميس!
ولو هوايتهم جت على حساب دراستهم مش هخليهم يبطلوها برضه، ليه يعني افضل اضغط عليهم واحطم اعصابهم عشان يجيبوا 98% فى الابتدائية؟ ما يجيبوا 88% هيا الدنيا هتولع؟ كل ده فى سبيل اني اسيبلهم متنفس لحاجة يحبوها فعلاً ويبدعوا فيها فعلاً
انا ارجو ان حضرتك متفتكريش اني متحامل عليكي بصفة شخصية، انا باتكلم عن ثقافة الآباء المصريين بشكل عام، وأنا برضه أعترف ان ايدي مش في النار وماقدرش اقيم الوضع زي حضرتك، بس على الأقل ده اللى نفسي اعمله اما ربنا يرزقني بأولاد إن شاء الله
المفضلات